ISAYA 20 - PIPÏLIA

¹ Kiset pipö lïko Asirya akïporyeghö pipö Pilisti ompö kanasyanta Asdod, kintöghoghchini Sarkon nyo kiwowö korononi, aki nyinte nyo kipöytoy pipö Asirya cho pö lïk.

² Kökimwochï ECHOTYON Isaya wero Amos könyis sömök cho kökikuwer kïngwïs sarankwachtin nyo kikörmönö muyenyi nko kweghkachi cho kiloköy. Kwigh lenyoni, akïwestotö kïchïrut amelö kiloköy kwegh.

³ Kïlö ECHOTYON, “Kïle wölini köwestotö mötworintenyan Isaya ompö könyis sömök kïchïrut akï puryö kwegh, lïku nyoni kiporunöt nko töngönchin nyo igho ompö koro Misri nko nyo pö Etopya.

⁴ Rötöy pöytoghintö Asirya pikö koroswechoni le odeny kïlïkwï mampustin akïrang chumwak nko poy kïpa kïchïrutöch kimeloköcha kwegh akulak sïro cho mökörtonye löpisöy, ompö arasï nyo pö pipö Misri.

⁵ Susöy kïgh, akïlalïyan pïchoni kökikutö kikönötengwa koro Etopya, akïkwolö kegh owesyo Misri otini kewonyeghö chane kikönötengwa.

⁶ Otini ketï asisoni, kïlö pich cho möngöy sörömu nanampa koro Pilisti, ‘Arose kïgh nyo kegha ompö pïchay kökikönecha lö köghetenecha pöytoghinto Asirya! Ekengötunecha ompö or ne köny?’ ”