ISAYA 15 - PIPÏLIA

¹ Ngölono ngölyontonï pipö Moap. Kakiwur kanastina Ar nko Kir ompö oghö akonga, kïsï nyu koro Moap lasay.

² Kïpusta pipö Dipon wölo kïsogho körkeyïntin akïriryö. Kiriryö pipö Moap, kïrirchï kanastina Nepo nko Medepa ompö nyarïl, kirwach mötöwekwa nko tamughayikwa ompö nyarïl.

³ Akulach sarankwachtin pich cho kipestegho ortïna kanastin. Kiriryeghö pich kwenu kanasyan nko paraku korïn wölo le pörkö.

⁴ Riryot tya pipö Espon nko cho pö Eleale ntökelïma Yaas. Köriryö pipö lïk cho pö Moap akiwonyeghö nyakanat chane lökïr.

⁵ Rirchini mïkulöwunyan Moap! Kepertoy pikachi kutang kanasyanta Soar nko Eklat Syelisyiya. Kïpusta walaka kïrïp or nyo wetöy Luit, akïmi kïrirsot otini petöy, kupertoy walaka kutang Oronaim nko nyarïl nyo wow.

⁶ Ompöwölo kiteny pögho Nimrim, akïsilonchö suswö cho kimi kamasunyi, amelö kitökïngötï kïgh nyo nyaril nyonikïny.

⁷ Kïlenyona nyu, kurit tïkukwa cho chang cho kinyorï nko cho kökikïror, akïpa kwoghyö champilwa nyo mi ketï.

⁸ Kichögh rirata söremwok löwïr cho pö koro Moap. Kikïlïma raranoni kanastina Eklaim nko Peerelim.

⁹ Kipïröchitu pögho kanasyanta Dipon ompö kisön, amelö choni opïn, kitïng Tororöt kïgh nyo gha tya ompö pïchoni, ompöwölo itu pörchö nyo kïpöröy chi anka tïkwïl nyo ngötuno koro Moap.