ESTA 1 - PIPÏLIA

Kasas Pasti ngala pöytoghin Aasuero

^1-2 Kitöpö asistanka pöytoghintö Aasuero ngacharu paytaghtanyi ompö kanasyanta koro Pasya nyo kikïkuro Susa. Kipöytoy koros cho tïlöy 127, kïngeta India akwit Etopya.

³ Ato mi könyito sömök nyo pö paytaghtanyi, kwighchï akor pöytoghichi cho echön löwïr nko cho kipöytoy koros nko pipö lïkos pö Pasya nko cho pö Mede nko chönökopïr cho kipöytoy koros cho kipka ka pöytoghin.

⁴ Kuparta sïkönöteto paytaghtanyi nyo oror nyaman ompö aro mut nko akonga.

⁵ Akwotini kiwonyö osiswechoni, kwighchï pöytoghintö akor pich löwïr cho echön nko minkech cho kimöngöy Susa, kanasyanta Pasya nyo wow, ompö osis mut nko akonga ompö kiroryo ka pöytoghin.

⁶ Kikïsïlö köyoni sïro cho relach cho kikiwusö pörköy cho kikïnap cho pïchighöch cho pö katani, akewusö taghokö pchörin cho kikïteka silpa cho kikigha kinoyo ka pöytoghin nko koghïn cho relach nko cho pïröch nko sanay cho kwerkwersot nko ngöcher cho kikigha koltin nko silpa.

⁷ Kikitö pich kïgheghsyeghö kari koltin cho sisinchö. Kepagha pich dipay* ompö pöropchö ka pöytoghin.

⁸ Kïgheghsyö pich kïle wölini kichömtoy chane.

⁹ Kwighchï tïkwïl Pasti koko pöytoghin, kor akortangwa cho kimi ka pöytoghin Aasuero.

¹⁰ Otini kitïta asispa mut nko odeny ompö akortanyi, kïturön pöytoghinto, atolapay kïmwochï pich mut nko odeny cho le latan* cho kipöghisyechini nyinte, ompö Meuman nko Pista nko Arpona nko Pikta nko Apakta nko Setar nko Karkas,

¹¹ kïkurï Pasti koko pöytoghin nyo kiloköy tenta atökuporchï pöytoghinto pikachi cho echön nko toyechi atökïsïwa wölo pïchighta nyinte.

¹² Wölo otini kimwochï mötworichi, kïtagh Pasti kïwö, kïnarek pöytoghintö Aasuero nyoman.

¹³ Kitïng pöytoghintö osiswechoni otöp nyo kikuröy pich cho ngöghomöch cho kinkït kirurut nko kirwok, kïlenyona kïkur kirurichi atökïmwochï nyinte kïgh nyo kighöy.

¹⁴ Pïchoni kinyoruno pöytoghintö kingarakat kïnomnyö ato kimököy kï ompö: Karsyena nko Syetar nko Admata nko Tarsis nko Meres nko Marsena nko Memukan, pich mut nko odeny cho pö Pasya nko Mede cho kile echot pö pöyunötenyi.

¹⁵ Kïlenchï pöytoghintö pïchay, “Kayontan ante mötworichu kïpa kïkurï Pasti, wölo kïpeny ngalechan! Lentöy kirurut, kido ne koko pöytoghin ato igh lenyï?”

¹⁶ Kinget Memukan akïmwochï pöytoghin nko wowïntinechi lö, “Melö kemwa Pasti pöytoghin onkït, wölo kemwa wowïntineku akumwa pich löwïr ompö pöyunöto pöytoghi Aasuero!

¹⁷ Akïngetöy ye nyu korka anka tïkwïl ompö pöyunötengu kïsösöy santenyi ato lïm kïgh nyo kegh Pasti koko pöytoghin. Mwoghöy chane lö, ‘Kömwochï pöytoghintö Aasuero Pasti kïwö wölini mi nyinte, wölo kïtagh.’

¹⁸ Ato töp ye nyu ntökïlïm koru echot pö Pasya nko cho pö Mede wölo kötöptö koko pöytoghin kïmwochini nyu poyikwa panini, amelö tökïmi korka ompö woptin löwïr nyo kikonyïtöy santenyi, kïnörekyï nyu mïrön korukwa.

¹⁹ Nyo ato ichömenyi, we pöytoghin imwatïta lö melö tökïmïlo ngat Pasti wölo mi pöytoghintö. Aimwatïta kekir ompö kirurut pö pipö Pasya nko Mede cho melö kïwöghököy. Atolapay ip korketö anka kïköchï otini kömi nyinte nyo tïng otöp nyo karam kïtïl Pasti.

²⁰ Otini kakïmwatïta ngölyontengu kïghömï pöyunötonete mamïnïng, kïkonyït nyu korka anka tïkwïl santenyi ato kö sïkön anta kö meywon.”

²¹ Kïcham pöytoghintö ngölyonto Memukan nko yetïntinechi akwigh nyinte lenyini kamwa Memukan.

²² Kïyonta palaltin kïghömï korostinechi löwïr, ompö kutïwa pich löwïr, kemwochï koros löwïr ompö kutïwa pich löwïr lö mïchini kïpayta mïrön kestonikwa kegh akïngalan ompö kutïwa pikökwa.