ESRA 1 - PIPÏLIA

Kömwochï Sayras pipö Yaudi kïmïlisyö

¹ Kipuntö ECHOTYON ngölyontenyi ompö könyi tagh nyo pö paytaghpa Sayras nyo pö Pasya ompö kuti Yeremia. Otini kigh pöytoghin kïmwatïta ngalechï kïghömï pöyunötenyi akukir lö,

² “Kamwa Sayras pöytoghinto Pasya lö, kikonanïn ECHOTYON Tororöt pö yïm apayta ngwïny kïmïkul, akïmwowanïn otekyan nyinte konyi ompö Yerusalem nyo mi koro Yuda.

³ Omïlisyenö Yerusalem nyo mi koro Yuda akwa löwïr cho ochï pikachi atek ngat Kö pö ECHOTYON Tororöt pö Israel, nya kungarakakwa Tororöt nyo mi Yerusalem.

⁴ Akany kungarak piko korononi pïnot cho mïlisyot Yerusalem ompö wölini möngöy. Kutö silpa nko koltin nko kari kö nko kyak nko ropöw cho kitötoy ompö Kö pö Tororöt* nyo mi Yerusalem.”

⁵ Kïpa nyu poyi ortïna pipö Yuda nko cho pö Penchamen nko tïsï nko pipö Lawi nko pich walaka löwïr cho kigh Tororöt kïpa atökïtek ngat Kö pö ECHOTYON Tororöt ompö Yerusalem.

⁶ Kungarak nyu chane pöröriskökwa kari silpa nko koltin nko tïkwïn walaka nko kyak nko karïn walaka cho pö olyot nko ropöw cho kitötoy ompö Kö pö Tororöt.

⁷ Kïkonï Sayras tïkwïl kari Kö pö Tororöt cho kicheng pöytoghintö Nepukadnesa ompö Yerusalem akïwö kutö koto tororötinechi kegh.

⁸ Kïkonï Sayras pöytoghinto Pasya tïkuchete ompö mori Mitredat rorinto ropïyen nyo kitö Syespasar kintöghoghin Yuda.

^9-10 Achï tïkuchoni: tïwanayi koltin cho pö ropöw 30 tïwanayi silpa cho pö ropöw 1,000 tïwanayi walaka 29 tïwanayi koltin cho mïnkech 30 tïwanayi silpa cho mïnkech 410 kari kö walaka 1,000

¹¹ Choni löwïr kï 5,400 koltin nko silpa cho kipï Syespasar nko pïnotkö walaka kïpkana Papilonia kutang Yerusalem.