ESEKEL 7 - PIPÏLIA

Kölekïtit sörömu pipö Israel

¹ Kungwïnchanïn ngölyonto ECHOTYON lö,

² “Ye o wero chi, anyï kïgh nyo oghan ante Echotyon TORORÖT ompö koro Israel: kikwitïta sörömu kore kïmïkul!

³ “Ketomtö ye söröm ompö akwa, okonokwa ye sitöt nyo ngwan kïrïp kegh nko ortïnekwa. Omungokwa ompö sïmnyontönenkwa.

⁴ Motukekwanye amelö osyonchinokwa nyonikïny. Omungokwa ompö otöptinekwa cho ghach ato onkïtunö lö ochan ECHOTYON.”

⁵ Lentöy Echotyon TORORÖT, “Achona ketwakwa nyörilwok cho toponu kegh.

⁶ Akikwitï nyu söröm, kikwitïta söröm akyowonyekwa!

⁷ Kikwitwekwa nyarïl, we pipö kor kikwitïta sa akilekïtit asis nyo pö tangany melö nyo pö ngörekyö nko asyan ompö nyo kiteghyegho kutïngkot.

⁸ “Osïwïyekwa ye ato lekït ngwonïn pö nörekyenyan. Orwokwokwa kïrïp kegh nko otöptinekwa amungokwa ompö sïmnyontönenkwa löwïr.

⁹ Möminye nyo otukan anta osyonchï, omungokwa kïrïp kegh nko otöptinekwa cho ghach. Ato onkïtunökwa lö ochan ECHOTYON amungsïyi.

¹⁰ “Arose kikutomï kiwonyoghtönkwa, kiyetï rïmö nko menotön.

¹¹ Kiyetï rïmö ketökonotö le lïkïp. Möminye ompö akong nyo ngötu ompö chane anta chongïn pö tïkukwa anta sïkönötengwa möminye nyo nyoru ororyö.

¹² “Kikwitïta akikïlekïtit ato mömïchininye olin kïngarak anta oltoghin kïsönön, ompöwölo ngwïnchini chi löwïr sitenyan.

¹³ Melö tökuyoku oltoghintö kïgh nyo kikwalta kïrkegh tökïsöpöy. Ompöwölo pö sitenyan söpïchiskökwa löwïr, amökïtïnye kïmïla löt amöminye chi nyo chïwïtöy ompö ngokichi.

¹⁴ Kikïkut chane kontï kwigh kegh pich kïtïpï kïpsach, wölo möminye nyo wetöy lïk, ompöwölo kyomïlchan nörekyenyan chi anka tïkwïl.

Sito ngoki pipö Israel

¹⁵ “Mi porsyö sany, kuwongöy amal pich nko kikar ompö kanasyan, meghot cho mi sany ompö chok, kitïng kikar nko amal pich cho mi kanasyan.

¹⁶ “Ryöghchini pich cho köchïwïtyö kutïngkot le cheptuken cho kakyotyeghö ompö mpöghoghöy, akïsönön anka tïkwïl ompö ngokichi.

¹⁷ Wonyot ko chane löwïr akïpotonchö ompö mïghö.

¹⁸ Kulokyï kegh sarankwachtin akïnam chane nyarïl akulum arasï konyikwa akïrwach mötöwekwa löwïr.

¹⁹ Lösyini ropïyenikwa ortïna kanasyan, akïkarkegh koltinekwa nko kïgh nyo le sïmnyon. Ompöwölo memukönye ropïyenikwa nko koltinekwa tökïsörï chane ompö asispa nörekyo ECHOTYON amemukönye tökwam kïpïghyö mutïnekwa nyonikïny, ompöwölo kilïkwï ngokikwa mïsïk ompö chane.

²⁰ Kikwolö kegh chane korikwa cho pïchighöch akwigha karikwa körkeyïntin ompö arisingwa, kilenyona kwigh ECHOTYON tïkuchini kilïkwï sïmnyon ompö chane.

²¹ “Otöninan pipö sany kïpar akïcheng mwokïyis cho pö ngwïny kïlïkwï pörowekwa tökutö arasï chane.

²² Opörtochinan chane patagh tökusïmnyon chelölos Konyan, okönyan kïlïtöy ori kusïmnyon.

²³ “Akwigh kor kïlïkwï kïratyan ompöwölo kikepirir kore ompö rïmut akinyïghï kanasyan pörsyö.

²⁴ Opunan pipö punton cho ghach nyoman kïpka kïmang korikwa, owonyan owesyengwa nyï kwolo kegh, akesïmnyon korikwa cho tïlilöch.

²⁵ Ato nyorï nyarïl kïmach kïyar kalya wölo mönyorunye.

²⁶ Itu nyörilwok cho toponu kegh. Osorekwa werkoy kïmwowok sïwïyagh. Potyegho tïsï kirurut lö weng, akuwonyeghö poy kirurötö.

²⁷ Sonönöy pöytoghintö, akïmeghö mutïnö kintöghoghi akïpotonchö pich ompö kor kïmïkul ompö nyarïl. Oghchinan chane kïrïp kegh nko ighisyewutkökwa, arwokyan chane kïrïp kegh nko kirwokötengwa. Nkïtu nyu chane lö ochan ECHOTYON.”