ESEKEL 40 - PIPÏLIA

¹ Kwipanïn ECHOTYON ompö mïkulögh, asis nyo pö taman köny nyo rel, könyi tömönut odeny kïngeta otini kikïpecha pïnotön akï konyi taman nko angwan kïngeta kepar Yerusalem

² nko koro Israel ompö sïwïyaghtina Tororöt, akutönanïn ngwïny kutïng parak nyo kogh nyoman. Kimi kïgh nyo kilata kanasyan kipoyeghenanïn.

³ Otini kipanïn wölini asïwan chi nyo kilata körkeyïntanyi tay, akitïng pörköyo katani nyo kipimtoy nko lïkip kughyongo or.

⁴ Kïlenchanïn chichay, “Wero chi rosena konyiku aitera yitiku ainama möt kïgh anka tïkwïl nyo oporunyi, ompöwölo kopunyi yi atö oporunyi ngal. Imwochï ngalechï löwïr isïwïyenyi pipö Israel.”

Kuka Okumpö Kongasis

⁵ Asïwan nayat nyo kiwit Kö pö Tororöt* lö talkuch okumpö kiror, kitenö lïkïyay kipimtoy miten sömök, kikogh kïkarkegh nko nayat, kïlïkwï miten sömök kutok akïlïkwï miten sömök ompö töpesïn.

⁶ Atolapay kïwö or nyo pörtoy kongasis akïlany parak akupim aranay, kïlïkwï miten sömök kïröytö.

⁷ Ompö or nyo kiweröy kwen, kimi kori ripï cho le sömök ewu tagh nko ewu löt. Ki karkegh koghïn nko töpesïn pö korichoni aki miten sömök anka tïkwïl, aki miten odeny nko nïsï nyïkiryo nïyetkö. Kimi ato kilïtöy ompö korichay yona, nyo le miten sömök ompö koghïn, kitongoy kö nyo wow nyo portoy Kö pö Tororöt.

^8-9 Kupim köyete kïlïkwï miten angwan kïwö ngwïny, kïlïkwï nyete sörömu or nyo lekïto Kö pö Tororöt aki mita akonga nayatu ompö töpesïn ompö söröm.

¹⁰ Kikarkegh korichï kimi wop anka tïkwïl ompö ato kïlïtöy aki karkegh nïyetwe cho kimuryö chane.

¹¹ Atolapay kupim apukenay kïlïtöy kïlïkwï miten mut nko akonga nko nïsï ompö koghïn aki miten mut ompö töpesïn.

¹² Kimi nayat tawu korichay kikïngar, nyo le sentimiten tömönut mut kutok akï sentimiten tömönut mut ompö töpesïn, akï miten sömök wop anka tïkwïl ompö kö anka tïkwïl.

¹³ Kupim ngat kïngata körköru kö anka ntökwit körköru kot anka kuwer apuke kïlïkwï miten taman nko odeny nko nïsï.

¹⁴ Kupim tïkwïl kö nyo kimi sörömu korichay kikingar, kïlïkwï miten taman ompö töpesïn.

¹⁵ Kïlïkwï miten 25 koghïn pö apuke kïngata nayat okumpö sany ntökwit sörömu köyini mi söröm.

¹⁶ Kimi tïrisyen cho mïnkech nïyetwo korichay löwïr nko nïyet okumpö ori löwïr kikikirchï nïyet sos nayatu akumpö ori kutang apuke.

Okumpö sany

¹⁷ Kwipanïn chichay olït kïrurutyonay orel okumpö sany. Kikilokyï karïn tömönut sömök nayatunay mi okumpö sany. Kimi tawungwa kiroryo nyo kikiputa koghïn kiwit.

¹⁸ Kimi wölo reyteghote kïtïlöy okumpö ori.

¹⁹ Kimi kïrurutyö parak nyo kïlïtöy okumpö ori, kupim chichay kwenu apuketinechay kwodeny kïlïkwï miten tömönut mut. Atolapay kuntöghoghenanïn chichay kiwö kutang okumpö löt.

Ara Okumpö Löt

²⁰ Kupim koghïn nko töpesïn pö apuke ompö okumpö löt nyo kirelöy kokwo okumpö sany.

²¹ Kikarkegh miteni korichay kikingar le sömök mi wop anka tïkwïl nyo pö apuke le chay pö apuketino okumpö kongasis. Ki miten 25 löwïr ompö koghïn, kilïkwï miten taman nko odeny töpesïntö.

²² Kikarkegh kö nyo kilïtöy nko wölay kikighchï sos nko chay mi ara okumpö kongasis, kïlongöy kelyon mut nko odeny, akimi köyini kïlïtuno tökepa kokwö söröm.

²³ Kimi or kokwö antakwagh okumpö löt nyo kïlïtöy okumpö ori tökepa kokwö nyo mi okumpö ori le nyay mi okumpö kongasis. Kupim chichay miten tömönut mut kïngeta or ntökwit are anka.

Kuka Okumpö Tagh

²⁴ Atolapay kumïtanïn chichay atang okumpö tagh, kenyorucha are anka ompö onkunini, kupim nïyetwe okumpö ori wölini kilïtuno kïkarkegh.

²⁵ Kimi tïrisyen apukenete le chay walaka. Ki miten 25 löwïr ompö koghïn aki miten taman nko odeny nko nïsï töpesïntö.

²⁶ Kilongöy kelyon mut nko odeny akimi sörömu wölo kilïtuno. Kikikirchï sos nayatu okumpö ori kïparta apuke.

²⁷ Mi yete tïkwïl or nyo lïtöy kokwe nyo mi ori, kupim chichay apukenay kïlïkwï miten tömönut mut.

Nïyat okumpö ori: Kuka ewu tagh

²⁸ Kumïtanïn chichay ngat olïtön kuka ewu tagh ntorelön nïyat okumpö ori, kupim aranay kïkarkegh nko apuketinechay löwïr mi okumpö sany.

^29-30 Kïkarkegh korichay kikïngar löwïr nko wölo kïlïto nko nïyetwe nko nïyetwo okumpö ori nko chay pö apuketinechay walaka, ki miten 25 ompö koghïn akï miten taman nko odeny nko nïsï ompö töpesïn.

³¹ Kipörtoy okumpö sany wölo kilïtuno. Kikighchï sos nïyetwo apuketinechay, kilongöy kelyön mut nko sömök tökelït ori.

Nïyat okumpö ori: Kuka kongasis

³² Kumïtanïn chichay olïtön kuka kongasis ntorelön okumpö ori, kupim kukanay kïkarkegh nko chay walaka.

³³ Kikarkegh korïn cho kikingar nko wölo kïlïtuno nko nïyetwo okumpö ori nko chay löwïr pö tagh, kiwit tïrisyen nko wölini kilïtuno, ki miten 25 ompö koghïn aki miten taman nko odeny ompö töpesïn.

³⁴ Kikighchï sos nïyetwo apuketino köyoni, kilongöy kelyön mut nko sömök.

Nïyat okumpö ori: Kuka ewu löt

³⁵ Atolapay kumïtanïn chichay olït kukanay pö ewu löt, kïsïwa lö karkegh nko chay walaka.

³⁶ Kitïng kori ripï cho kikïmin nïyetwe okumpö ori nko wölo kilïto nko tïrisyen cho kiwit le chay walaka, ki miten 25 ompö koghïn akïlïkwï miten taman nko odeny ompö töpesïn.

³⁷ Kipörtoy wölo kïlïto kokwo okumpö sany, akikighchï sos kïrop nïyetwo apuke, kïlongöy kelyön mut nko sömök kepus parak.

Korïn cho lekïtö Kuka Okumpö Löt

³⁸ Kimi okumpö sany nayat nyo kituyö nko apuke ompö okumpö löt nyo lïtöy kö nyo wow nyoman. Kikiwunö wölini ropöw cho kïpelöy.

³⁹ Kimi köyete wow mesenï odeny wölini nko wölini cho kiyengo amörostin cho kïpelöy nko amöros pö ngokï nko ropöwo lelut

⁴⁰ nko mesen odeny cho köyay okumpö sany are kunto nko are kumporö.

⁴¹ Kïlö mesen angwan cho mi okumpö sany cho kïyengo amörostin.

⁴² Kimi tïkwïl meseni angwanï cho kikigh koghïn cho pö amörostin cho kïpelöy, kï kiwö parak sentimiten tömönut mut kï sentimiten 75 ompö töpesïn nko koghïn.

⁴³ Kikinama akodetis cho kiwit, cho kile milimiten 75 ompö töpesïn, kikikönoghöy mesanete panye löwïr cho le amörostin.

⁴⁴ Atolapay kwipanïn olïtön köyay okumpö ori. Kimi ori korïn odeny cho mïnkech. Kipörtoy kuke nyo pö köyoni akonga okumpö tagh kïpörtoy nyo pö anka okumpö löt.

⁴⁵ Kïlenchanïn chichay, “Köyï portoy okumpö tagh kïpö tïsï cho ripöy Kö pö Tororöt.

⁴⁶ Kipöyit kot anka nyinö portoy okumpö löt tïsï cho pöghisïyi ompö ato kïpelo amöros. Tïsi choni kï werpö Sadok akï chane opïn ompö mönïngo Lawi cho muköy kïrich ECHOTYON tökïpöghisyechï nyinte.”

Okumpö ori nko tekata Kö pö Tororöt

⁴⁷ Kupim chichay sanyay mi okumpö ori kïlïkwï miten tömönut mut woptine löwïr. Kimi Kö pö Tororöt okumpö ta, kïmi ato kïpelo amöros.

⁴⁸ Atolapay kumïtwanïn ngat olït kuka Kö pö Tororöt, ki miten odeny nko nïsï aki miten mut nko odeny ompö töpesïn nko nïyet nyo le mita akonga nko nïsï ompö wop anka tïkwïl.

⁴⁹ Kimi longtewonta nyo kipustegho köyini kïlïto köyay le miten taman ompö töpesïn akïlö miten mut nko akonga kïröytö, kïmi laintina odeny are kunto nko are kumporö.