ESEKEL 4 - PIPÏLIA

Kemustö Esekel wölo kiriktoy Yerusalem

¹ Atolapay kïlenchanïn Tororöt, “Yeo wero chi, chenga mataparyan aitö tawungu atolapay ichoran parak kanasyanta Yerusalem.

² Aigh wölo kiriktoy aitekyï nïyet atolapay aitïkumchï nyïngwïny aitekyï kampin kuwit nko karin cho kïngeto kanasyante.

³ Atolapay icheng karin nyo tapalal aitö kughyongö kwenungu nko kanasyan. Atolapay iparta okumpö kanasyan airik kanasyantanoni. Kiporunöt nyoni ompö Israel.

⁴ “Atolapay iwö irïwotö ewu löt, akwatoni iminyi lenyoni okönoghan parakungu ghöyityo pipö Israel. Ipenyi ghöyityengwa osiswechini löwïr irïwenyi ngwïny.

⁵ Ompöwölo kokoninyi osis 390 cho kyoyitön lö ikösönenyi ghöyityo pipö Israel, osis karkegh nko könyis cho kigh ngokï.

⁶ Atolapay nyini kewanganyi osiswechona, iwaghaka irïwotö ewu tagh osis tömönut angwan, cho ikösönenyi ghöyityo pipö Yuda. Karkegh asis akong nko köny akonga.

⁷ “Atolapay itopön kirikata Yerusalem aipara ewungu nyo mönömönye kïgh aikany kïngor möt kanasyantanoni.

⁸ Orötinyi nyu tömemuk waghaka kegh ntökïtenö kuwonyö osiswechini pö kirikatengu.

⁹ “Atolapay icheng nkanun nko matay nko marakwen nko pinsin nko mosong nko mawelen aikulkulyö ompö tör akonga atolapay ighchï kegh makatin. Omenyi makatinechi osiswechini le 390 irïwotonyi wop akonga.

¹⁰ Kipimöy omisyonini iyomenyi ompö asis akonga kïlïkwï kramtin 230 omenyi lenyoni kitenö osis.

¹¹ Aigheghenyi pögh cho kipimunyi, kikompen odeny ompö asis akonga.

¹² Inoghenyi sïpöpö pich kilïkwï kwen cho igho makatin, atolapay iyam kurosöy pich.”

¹³ Kïlenyona kïlö ECHOTYON, “Omöy nyu pipö Israel makatinekwa cho le sïmnyon ompö koro pipö punton wölni kyopön chane.”

¹⁴ Olechan Ewo, “Echotyon TORORÖT, tomönye osïmnyonön kegh kïngeta ochan mïnïng nko ye. Tomönye kïlït kutinyan pempö meghan anta nyo kam tyony anta nyo le sïmnyon.”

¹⁵ Kïlenyona kïlenchanïn, “Nya okoninyi sïpöpö tïch kuker cho pö pich ighena makateniku.”

¹⁶ Akïlenchanïn ngat, “Wero chi, oköran wölo pkono omisyewut ompö Yerusalem kipimchini pich makaten cho omöy nko tapan, akïgha pöghe cho kipimchini nko mïghöt.

¹⁷ Oghan le nyete tökïchop omisyö nko pögh tökura kegh wölo lata akukoryö ompö ngokikwa.”