ESEKEL 10 - PIPÏLIA

Köweghö ororyo ECHOTYON Kö pö Tororöt*

¹ Nyini kyorostan asïwan kïgh nyo kimirö ompö paraku kerupim* nyo lata sapire nyo lentöy chi ngacharu paytagh.

² Kïlenchï ECHOTYON chi nyo kiloköy sïra katani, “Wïyö lïtö kwenu koropetinechinö mi ngwïnyi kerupim, airam ngeset kinyïghï römut ompö kwenu kerupim atolapay aischï kïghömï kanasyan kïmïkul.” Arosan chichay kiwetöy.

³ Kighyöngo nyu kerupim okumpö tagh ompö Kö pö Tororöt otini kïlïtöy ori. Kulum polta köyay pö ori kïmïkul.

⁴ Atolapay kïngeta ororyo ECHOTYON kerupim akughyongö tïtïka ompö Kö pö Tororöt. Kulum nyu polta köyay kïmïkul, akulïwchï löpoyïn pö ororyo ECHOTYON köyay mi ori

⁵ kelïma chöghöto köpepoy pö kerupim kiror, cho kighumöy le kuti Tororöt Kimuktoghin otini kangalan.

⁶ Atolapay kïmwa chichay loköy sïra katani lö, “Chenga ma ompö koropetinechay rimoy ompö kwenu kerupim,” kïwö chichay lenyini akughyongö koropetinechay kamas.

⁷ Kughïto ewunyi ompö kwenu kerupim akïcheng ma nyo kimi kwenungwa akutö mori chichay loköy sïra katani, kïcheng nyu chichay mayay akïlït sany.

⁸ Kilentöy chi kitïng kerupimtin kïgh nyo lenye ewu chi ompö kapepayikwa ori.

⁹ Asïwa koropetin angwan ompö kamasu kerupim anka tïkwïl kïlenye koropetinechoni sönkwöt nyo kwörkwör.

¹⁰ Karkegh kwangwan lentöy chi kinomnyö.

¹¹ Nyini kapa kipetöy kutöngöy wop angwan mötïnye kïwöghökisyö kïparta wölini töngöy. Petöy koropetino tagh wölo ketang kïrïp chinö walaka tïkwïl.

¹² Kicheng konyïn koropetinechay nko mïkulöwu nko kele cho kiwit koropetine kwangwan.

¹³ Kyalïman kekurö koropetinechay koropetin cho rimoy.

¹⁴ Kitïng anka tïkwïl tokoch angwan kïtïng nyo tagh tokochu kerupim akïtïng nyo pö odeny tokochu chi, kïtïng nyo sömök tokochu ngötïny kïtïng nyo pö angwan tokochu sich.

¹⁵ Kïnget kerupimtinechay kïpa yïm, chane chay kyosöchan lalwa Kepar.

¹⁶ Akïnyini kïpa kerupimtinechay kïpa koropetin tïkwïl ompö kamasungwa. Akïnyini kangany köpepokökwa tökupiltoy, melö rïmöy koropetinechay mi kamasungwa.

¹⁷ Nyini kighyö, kughyö tïkwïl koropetinechay, kïkany kupiltoy tïkuchay, kupiltö koropetinechay tïkwïl kïpa yïm ompö wölini kimi oringwa mïkulöwu tïkuchay sötote.

¹⁸ Kïngeta ororyo ECHOTYON tïtïka kö akughyongö paraku kerupim.

¹⁹ Atolapay kïsyol kerupimtin köpepokökwa tökupiltoy, asïwïyan kïpetöy nko koropetinechay kimi kamasungwa, atolapay kughyongö kuka ara Kö pö Tororöt ompö okumpö kongasis akïmi ororyo Tororöt pö pipö Israel parakungwa.

²⁰ Kyosöwan lö, kerupimtinechay kyosöchan ngwïnyi Tororöt pö Israel ompö lalwa Kepar.

²¹ Kitïng anka tïkwïl tokoch angwan nko köpepoy angwan nko tïkwïn cho lata ewuno chi cho mi köpepoy ori.

²² Kikarkegh tokochwekwa nko chanye kyosöchan lalwa Kepar, kïpetöy kutongöy wölo kaparta mötöwöy.