EPRANIA 8 - PIPÏLIA

¹ Anyï nyu kïgh nyo wow nyo kïmwowunecha lö, kïtïngetecha Tïsin nyo Wow* nyo lata nyoni nyo töpuno ewu tagh nyo pö ngacharu paytaghpa Tororöt Kimuktoghin nyo mi yïm.

² Pöghisïyi nyinte le Tïsin nyo Wow ompö Wölo Tïlil Tya,* nyoni kï orito emanoni pö man, kitek Echotyon amelö ptangengmöt.

³ Kïkïlöy Tïsin anka tïkwïl nyo Wow atökutö Tororöt ropöw nko kyak cho kïpelchini nyinte kïlïkwï amörostin. Kïlenyoni tïkwïl ompö Tïsintencha nyo Wow, mïchini nyu kïtïng nyinte kïgh nyo roptoy.

⁴ Ntökipö nyinte ngwïnyinete, melö kitölïku nyinte tïsin nyonikïny, ompöwölo mi tïsï wölete cho roptoy tïkwïn kïrïp kegh nko kirurut pö pipö Yaudi.

⁵ Lata ighisyononi pö tïsï körkeyïn akïlata rurwö nyo pö tïpö yïm. Karkegh nko wölo kilata Musa ato kimököy kïteköy ema, kïlenchï Tororöt, “Irosïta lasiny aigh kïgh anka tïkwïl kïrïp kegh nko körkeyïnay kisöchinyi kutïng parak.”

⁶ Wölo kakitö ye nyu Yeso kïlïkwï tïsin nyo pö tïlat, kïlenyona kulinyö pich nko Tororöt ompö muma nyo karam tya nyo kikïteka towunöto teksyo kiyomisöto man.

⁷ Ompöwölo ntökitenate muma* nyo pö tagh, kitömökïminye machata nyo pö muma nyo pö odeny.

⁸ Ompöwölo kigheghchï Tororöt pikachi ato kimwa lö, “Pkonöy osiswö, ato oman muma nyo rel nko pipö Israel nko Yuda.

⁹ Sisitu mumanoni nko nyay kyaman nko kukötïnekwa, osiswechanya kyamïtunan chane koro Misri. Ompöwölo melö kirïp chane mumenyan ompö kighanat, kïmelö kitökïyang nyu chane.

¹⁰ Anyï muma nyo oman nko pipö Israel, mwoghöy Echotyon otöninan kirurutkachu kinonutkökwa ori, akirchï kirurutchoni mïkulöwekwa. Olïkunan Tororötïngwa, kïlïkwï chane piköchan.

¹¹ Mökïminye nyu chi nyo netöy chitöngwa akïmökïminye chi nyo ruröy werïngwa lö, ‘Nkïtunö Echotyon.’ Ompöwölo nkïtunanïn pich tïkwïl, kïngeta nyo mïnïng ntökwit nyo wow.

¹² Olöstoghchinan chane ngokikwa amononanye ngat lelutkökwa.”

¹³ Kikuyit Tororöt mumananya pö tagh lö kiyosit otini ngölono nyinte muma nyo rel. Akï kïgh nyo kiyosit akïwïr, kï kirik kupot lö weng.