EPRANIA 7 - PIPÏLIA

¹ Ki pöytoghinto Salem Melkisedek aki tïsinto Tororöt nyo Töror Tya. Kituyö nyinte nko Apraam otini kimïlegho poryot nyo kipara pöytoghï angwan, kusoyön Melkisedek nyinte.

² Kutö Apraam nyinte kareranpa taman cho pö pöröw löwïr. (Ato kïwaghach kayna Melkisedek nyo pö tagh kelentöy, “Pöytoghinto Man.” Akwompöwölo ki pöytoghinto Salem kuporu kaynenyi tïkwïl lö, “Pöytoghinto Kalya.”)

³ Mötïngnye kwanta amötïngnye kame amötïngnye arengwa, möminye wölo poru lö kikïyï oyï akima oyï. Karkegh nko Wero Tororöt akïtöpo kï tïsin kokay nyinte.

⁴ Arose nyu wölo ki wow chichoni kïlïkwï tökutöni kukötönyo Apraam nyinte kareranpa taman nyo pö pöröwechi löwïr.

⁵ Kinkïtöcha ngat lö kimököy kirurut kïkwagha werpö Lawi cho le tïsï pipö Israel kareranpa taman nyoni kï kïkwagha kareranpa taman pikökwa, kïrkegh ki monïngo Apraam chane löwïr,

⁶ wölo kimöpönye Melkisedek ara Lawi, wölo kïrkegh kïlenyoni kï kitö Apraam kareranpa taman nyinte kesoyön Apraam nyoni kitïng kiyomisöto Tororöt.

⁷ Akï möminye tiyogh nyonikïny lö, wow chi nyo soyönisïyi kïsir nyo kisoyönöy.

⁸ Tïsi cho toköy kareran pö taman kï pich cho meghsot wölo chichï toköy kareranpa taman nyoni kï Melkisedek, akengölono lö, mömeghönye.

⁹ Kimukecha kemwoghe ngat lö otini kitötö Apraam kareranpa taman, kï kitötö Lawi tïkwïl kareranpa taman (nyo kinyoru monechi kareranpa taman).

¹⁰ Ompöwölo kitomönye keyï Lawi kitökïmi koyeko kwanta Apraam otini kituyö Melkisedek nko nyinte.

¹¹ Ki ompö ara tïsöto pipö Lawi nyo kikitönö kirurut pipö Israel. Ntökipuryö nyu lelut ighisyononi pö pipö Lawi, kitömökïminye nyu machata ngat nyo kitökuchumuno tïsinte anka nyo sis, tïsin nyo kirïp tötut pö Melkisedek amelö chanya pö Aron.

¹² Ompöwölo ato waghaka tïsötö, kïmi waghakata kirurut tïkwïl.

¹³ Kingwïna lile anka Echotyontenyo nyete ngölono ngalechï akimöminye chi nyonikïny nyo pö lilonini nyo kipöghisïyi watwa amöros le chi nyo le tïsin.

¹⁴ Nkïtote lasiny lö kiyiyï nyinte pipö lilo Yuda akimöngalananye Musa lilononi otini kingölono pich cho le tïsï.

Tïsinte anka nyo karkegh nko Melkisedek

¹⁵ Rumunote lötok ngölyontonï lö, kakuchumï tïsinte anka nyo karkegh nko Melkisedek.

¹⁶ Kimeghnye chi nyinte kïlïkwï tïsin kïrïp kegh nko otöptino pich, wölo ompö owesyo söpon nyo möminye söröm.

¹⁷ Ompöwölo mwoghöy Kikirut lö, “Ichinyi tïsin kokay, kïrïp kegh nko tötut pö Melkisedek.”

¹⁸ Kakinategha nyu tötutyonay pö köny, ompöwölo ki nyarkalal akimötïngnye kinyiwut.

¹⁹ Ompöwölo kimemïcha Kirurut pö Musa ntökwigh kïgh anka tïkwïl kuten. Wölo kakekonï ye nyu kikönöt nyo pïchigh tya nyo kimukonecha kelekïtitunö nko Tororöt.

²⁰ Katasa Tororöt muma otï le ye kiyomisötenyi nyo kimewolwolchïnye pich cho kipö tagh.

²¹ Wölo kilïkwï Yeso tïsin ompö ara muma, otini kimwochï Tororöt lö, “Komunyi Echotyon muma, amöwöghökönye ngölyontenyi nyo lentöy, ‘Ichinyi tïsin kokay.’ ”

²² Lïku nyu Yeso kighyongtoghin nyo pö muma* nyo karam kïtïl walaka.

²³ Mi sisïntö anka ngat: ki chang pïchoni kile tïsï ompöwölo kimeghsot chane akimemuköcha ntökwigh ighisyengwa kokay.

²⁴ Wölo söpöy Yeso kokay, kïlenyona, möngetonye nyinte ighisyo tïsö.

²⁵ Kïlenyona, muköy nyinte kïsöru pich kokay cho petöy wölo mi Tororöt kuweröy nyinte ompöwölo söpöy nyinte kokay akïsoghchini chane.

²⁶ Yeso nyu onkït nyo le Tïsin nyo Wow* nyo mïchinecha. Tïlil nyinte akïmötïngnye lelut anta ngokï ompö orinyi. Kikepesyö nyinte nko mwokïyis aketotegha kïwö yïm parak.

²⁷ Sis nyinte nko tïsï walaka cho echön, mötïngnye machat nyo tötoy amörostin osis löwïr cho pö ngokichi kegh atolapay kutötö cho pö ngoki pikö walaka. Kigh lenyoni kïnyïl akonga nyo mïchini könyis löwïr otini kikonï kegh nyinte.

²⁸ Cheröy kirurut pich cho nyörkölöl kïlïkwï tïsï cho echön: wölo cheröy kiyomisöto Tororöt nyo kyam ompö muma akïrïpï lötu kirurut Worö nyo kikigh kuten kokay.