EPESO 1 - PIPÏLIA

¹ Ani Paulö nyo le kiyoktoghinto* Kristo* Yeso ompö machata Tororöt nyete, kakirwokwa pipö Tororöt cho omitö Epeso ochï cho ghönote ompö Kristo Yeso.

² Nya kïkonok Paponyo Tororöt nko Echotyon Yeso Kristo pöropchö nko kalya.

Kisoyönut pö mïkulögh ompö Kristo

³ Nya kïsala Tororöt Papoto Echotyontenyo Yeso Kristo! Nyo kisoyönech kenyorunö kisoyönöt anka tïkwïl nyo pö mïkulögh ompö möngot nyo mi yïm kuweri.

⁴ Kïle Kristo wölo kikïltecha Tororöt ompö Kristo kelïkuna chechi otini kitomönye ketor kegh ngwïny, atöketïlilöchitunö akelïkwï pich cho puryö lelut ompö tawunyi, akwompö chomnyenyi.

⁵ Kinya Tororöt kïkïlecha könyisyok kelïkuna monechi ompö ara Yeso Kristo, kïle wölo lata köromnyö nyo pö machatenyi.

⁶ Kesala nyu Tororöt ompö pöropchenyi nyo töror nyo kikonecha nyinte kwïle ompö Werïnyi nyo le chamanenyi!

⁷ Ompöwölo kïtïngetecha sörunöt ompö megha Kristo, akikengongoghta ngokicho kïle wölo lata wowïnto pöropchenyi,

⁸ nyo kikonecha kuwachta ompöwölo nkït Tororöt tïkwïn löwïr.

⁹ Akwighecha kenkïtunö ngal cho kimenkïtnye pich ato le tagh wölo kïcham nyinte kïngongwecha ompö machatenyi kïrïp kegh nko wölo kinontoy nyinte lö oghöy kuwerï Kristo.

¹⁰ Puntoy nyu Tororöt tötutyononi otini ketïta osiswö cho ighöy nyinte tïkwïn löwïr cho kikigh cho mi yïm nko ngwïny kïnam kegh lödak akïlïkwï Kristo pöytoghintengwa.

¹¹ Kikegh tïkwïn löwïr kïrïp kegh nko tötutyo Tororöt nko machatenyi, ompöwölo kikïlecha nyinte kelïkuna pikachi otini kikïlinyecha nko Kristo ompö machatenyi le wölo kilata kinonutyenyi nyo kinonöy otini le wïyay.

¹² Kïlenyona acha chona kikïnyagh kekön Kristo kesal ororyo Tororöt.

¹³ Kighakwa Tororöt alïkuna pikachi akwa chona kyalïm ngölyonto man, nyoni kï Lökoy cho Karamach cho kipkokwa sörunötengwo akyaghanakwa Kristo, akïpelchokwa Tororöt machey nyoni. Kï Mïkulögh nyo Tïlil nyo kikikuyomisï pikachi.

¹⁴ Akwompöwölo kïtïngetecha Mïkulöwunoni pö Tororöt kenkïtöcha nyu nyoman lö kïnyorunecha kïgh anka tïkwïl nyo kiyomisï Tororöt pikachi, porwecha ngölyontononi lö tyoköy Tororöt nyoman pich löwïr cho le chechi. Kesala nyu töroryenyi!

Saghata Paulö

¹⁵ Nka nyoni otini kyalïman kighanatenkwa ompö Echotyon Yeso nko chomnyenkwa nyo ochömöy kighönï löwïr,

¹⁶ kïmelö kyopïstan oyokyï Tororöt sörö ompö akwa ananakwa ompö sowutköchan,

¹⁷ atömanyïl kïkonokwa Tororöt pö, Echotyontenyo Yeso Kristo, Papo nyo pö ororyö, Mïkulögh nyo Tïlil tonkïtunö ngala yïm akïpköchok nyinte.

¹⁸ Osoghan kutö nyinte mïkuliskökwa löpoyïn tasïwena, ankïtï wölo tenö kikönötö nyo kikurchokwa nyinte nko ororyö nyo pö ropöw cho kiyomisï nyinte pikachi,

¹⁹ nko wölo wow kïlïkwï owesyenyi nyo pöghisïyi ompö acha cho kighönöy. Karkegh owesyononi mi orincha nko owesyö nyo wow

²⁰ akwowesyononi nyo kipöghisyeghö nyinte otini kigh Kristo kututunö ngwen akwigh nyinte kïtöpö ewunyi nyo pö tagh ompö wölnö le yïm akutö owesyö.

²¹ Pöytoy Kristo ompö wölini paytagh anka tïkwïl nko wowïn nko owesyö tïkwïl nko echotnön. Pöyu nyinte wowïn anka tïkwïl nyo kimuköy kekuröy ompö ngwïnyinï nko nyo pö ngwïnyi anka nyo tökungwïnöy.

²² Kikutö Tororöt tïkwïn tïkwïl kïtïpï ngwïnyi kelyo Kristo akutö nyinte kïwowitunö kanisa kïmïkul.

²³ Kanisa kï por pö Kristo akï nyinte nyo nyïghitöy tïkwïn tïkwïl ompö woptin löwïr.