DANIEL 8 - PIPÏLIA

¹ Kyasïwan sïwïyagh nyo pö odeny ompö könyi sömök nyo pö paytaghpa Pelsyasar.

² Kyomitan ompö sïwïyaghnoni Susa kanasyan nyo wow ompö koro Elam, kyoghyongenan lalwa Ulay.

³ Asïwan makal ompö sörömu lalwanay nyo tïng kuy odeny cho koghöch. Kikogh anka kïtïl anka. Kikogh nyo kipitï lötï ompö nyinö anka.

⁴ Asïwan makalanay kwam sirmoy ompö kuyechi kutang okumpö ta nko okumpö löt nko ewu tagh. Kimöminye tyony nyo kimuköy nyinte anta chïwït ompö owesyö nyo kitïng, kip kegh parak akwigh le ato kimököy.

⁵ Otini kitö omitan ononsïyi, kungwïna kwagha okumpö ta nyo kirïpu nyoman, ntömökïtyökönye kelyön ngwïny. Kitïng kuyögh akonga nyo wow nyo kimi kwenu konyichi.

⁶ Kungwïn akïrökwï makalanay kitïng kuy odeny kyanyaghan asïwa kughyongo sörömu lalwa. Kurïpchï nyinte ompö owesyenyi kïmïkul.

⁷ Asïwan kïporyeghö makalanay. Kutim kïmïrisyö kuyechay kwodeny. Melö kitïng makalanay owesyö nyo kigheto kegh, kïwirchï ngwïny akïtyakatyak. Melö kimi chi nyo kimï kïsörï makalanay.

⁸ Kwip kegh kwaghayay parak nyoman ntökïmïrö kuyöghenyi akong. Atolapay kïpituna otini kuye walaka cho le angwan cho echön cho kipit kïparta woptin angwan cho pö ngwïny.

⁹ Kipituna kuyöghö nyo mïnïng akonga ompö kuyechay. Kwawesit nyinte nyoman kutang okumpö löt nko kongasis akutang Koro Ayomis.

¹⁰ Kwawesit nyoman ntökïporyeghö lïko yïm nko kokel. Kutyorï walaka kïpka ngwïny, akïtyakatyak.

¹¹ Kwip kegh parak ntökwit wölo mi Wowïn pö lïko yïm. Akïtagh amörostine cho kakïpelöy kïnomnyö, akusïmnyon Kö pö Tororöt.*

¹² Kikitö nyinte lïke nko amörostine cho kïpelöy kïnomnyö kupot man, akwigh kuyöghonay le wölo kömöktoy akïsïkönon.

¹³ Alïman malaykayan nyo kïtep anka lö, “Tösöy tagh tïkuchï mi sïwïyagh nko oyï? Ighöy chane ngokï nko oyï kötö pelöy amörostin? Kïtyökotyököy lïko yïm nko Kö pö Tororöt nko oyï?”

¹⁴ Kïlenchï, “Ompö nöngötus 1,150 nko tökwoghötin 1,150 ketïlil nyu Kö pö Tororöt.”

Köngongwï malaykayan Kapïryel ngala sïwïyagh

¹⁵ Kyamachan nyu onkïtï lö mwoghöy ne sïwïyaghnay, panini lawel asïwan akonga nyo lata ptangengmöt kungwïn kughyongö tawunyan.

¹⁶ Alïman kuti chi kïlö ompö lalwa Ulay, “Kapriel, ngongchinö chichona ngala sïwïyaghnay.”

¹⁷ Kïlenyona kungwïn Kapïryel kïrikwï wölo omitan, omïghön nyoman, apïtyan ngwïny. Wölo kïlenchanïn, “Nya kïpköchin we wero chi lö pö ngala sïwïyaghnay sörömu ngwïny.”

¹⁸ Otini kimi kingölonwanïn kïnamanïn rïwöntö nyo nïkis, oköpïghtan mu, wölo kïnamanïn akïtighanïn oghyongö kelyechu,

¹⁹ akïlö, “Tera omwowun ngal cho ighisyot ompö nörekyo Tororöt ompö osiswo söröm.

²⁰ “Makalunay kisïwenyi kitïng kuy odeny kï pöytoghï odeny cho pö Mede nko Pasya.

²¹ Ato kwaghat kï pöytoghinto Krik. Ato kuyöghonay wow nyo kimi kwenu konyichi kï pöytoghinte nyo pö tagh.

²² Ato kuyechay le angwan kipituna atay kimïreghö kuyöghö kï pöytoghï angwan cho pkono korenyi, wölo melö tïng owesyö nyo lata nyenyi.

²³ “Nyini ketïta sörömu paytaghtangwa akwit ngokikwa söröm, kungwïn nyu pöytoghintö nyo körom nyoman akwaghïgh möt akï lïsin.

²⁴ Owesitu wölo melö nyenyi owesye. Ighöy kinyarat nyo gha nyoman akwighisyot tïkuchi löwïr le wölo kömöktoy. Nyoröy pich cho owesöch nko pipö Tororöt tïkwïl.

²⁵ Nyoru tösunöt ompö ngala lïsutkachi. Akwip kegh parak ompö kinonutkachi akunyar pich cho chang kïtomö kïchil. Ngetöy kïporyegho Pöytoghinto pöytoghï, wölo kinyoröy nyinte amelö ompö owesyo ptangengmöt.

²⁶ Sïwïyaghnay pö amörostino nöngötus nko tökwoghötin kïlïku man. Wölo iwïng ngalechï ye, ompöwölo tökïlow ato itïtoy.”

²⁷ Kyotyan, akasan ompö osis cho te. Angetan aghan pöghisyewut pö pöytoghin, wölo kyomïghön ompö sïwïyagh ompöwölo möpköchinanïcha.