AYUPU 15 - PIPÏLIA

Ngalana odeny 15:1–21:34 Elipas

¹ Atolapay kuyokyï Elipas nyo pö Teman lö,

² “Kïchï mölyöngu chi nyo ngöghom ngal cho le sölwontön akusikö ngal cho le kwïle?

³ Kïchï körtegho kegh ngalana nyi puryö kinyiwut anta gheta kegh ngal cho le kwïle?

⁴ Wölo kepïstenyi kiwaghata Tororöt aikarta saghat ompö tawu nyi.

⁵ Netöy ngokiku kutingu kïngalan akekïlanyi ngala putin.

⁶ Rwokunyi kutingu, melö ani, portoninyi mwaghatengu kegh.

⁷ “Kikïnya so keyiyinyi kïtomö keyï chi anka? Anta kikïnya keyiyinyi kïtomö kïrumï kutïngkot?

⁸ Kiminyi so kokwo Tororöt telïma tötutkachi? Nyi so nyo ichï ngöghom onkït?

⁹ Inkïtönyi ne nyo melö kinkïtöcha? Ne nyo pköchininyi nyo melö pköchinecha?

¹⁰ Kikïnyorucha ngala poy cho echön nko cho mïnkech cho kiyositu ompö kïtïl papongu.

¹¹ Isösenyi so saghsaghata Tororöt lö mökïghnye ompö nyi, anta ngölyontenyi nyo mwowunyi ompö tölosyö?

¹² Ompö ne tökutöninyi mïkulöwungu sïnyoryö? Akwompö ne tökungwïryelöy pich konyiku

¹³ ntewöghökyï sïnyoryengu Tororöt, aikany kïpkana ngala cho lata chï kutingu?

¹⁴ Ngo chi nyo puryö sïrïp? Anta ngo nyo kïyï korka nyo kimuköy kelö pö man?

¹⁵ Melö tigho kegh Tororöt ompö pikachi chini tïlilöch amelö tïlilöch yïmwöy ompö konyichi.

¹⁶ Ekï chi nyu nyo le ptakalyan akïnïnöy, chi nyo gheghöy ngokï le pögh!

¹⁷ “Oporunyi, teranïn aikany omwowun tïkwïn cho kyasïwan

¹⁸ cho kimwoghöy pich cho ngöghomöch cho melö kiwïnga papotïnekwa

¹⁹ cho chane opïn cho kikitö kor amelö kiwö ton ntökïmang kwenungwa.

²⁰ Wongu mwokïyon ompö ngwonïn otini tökïsöpöy nyinte wongu ompö osis löwïr cho kikïrorchï wowes.

²¹ Lïmöy yitichi kutïw cho ighöy nyinte kïmïgh otinö mi kïlentöy möminye tapan kumir nyinte kiwurintö.

²² Meghönönye lö omïlegho tuwïn akïmi meghat kïköngöy nyinte.

²³ Rimotoy kïyörotoy omisyö akïtepöy lö, ‘Ekï mi onö?’ Nkït nyinte lö kikïlekïtit asis nyo kinyoro.

²⁴ Ighöy kiwongunötö nko nyarïl nyinte kïmïgh rïntoy tïkuchoni nyinte le pöytoghin nyo mi kïpsach kupoktö.

²⁵ Ompöwölo kösyol nyinte ewunyi lö oporyegho Tororöt akwigh kegh lö ochï nyakan ompö tawu Kimuktoghin.

²⁶ Nyökorchini ompö menötön, nömöy longoy tökïporyeghö Tororötnoni.

²⁷ Ompöwölo kilïmuma tokochunyi ompö okwoghyö, kinyïghï kïrutenyi kapanayi sunet.

²⁸ Wuchini kanastin cho kikepakachta möngöy korïn cho le kïratis cho kikïpïstö kïlïkwï köpören.

²⁹ Mölïkunye nyinte sïkön, ameghyongönye mökosyenyi ompö ngwïny.

³⁰ Möchïwïtonye wölo mi meghat lipöy lyopötö sanakankachi kïyomö. Kutïtoy kimïny pö Kimuktoghin nyinte kïwö.

³¹ Roko malïs kegh kutwayta kegh kïgh nyo le kwïle, ompöwölo lïku ropöwontenyi kwïle.

³² Yomöy kïtomö kwitïta ato yomo amelö nyörilitu morïnenyi ngat.

³³ Röroköy akwechi cho nyörilöch le ket pö sapipïyon akurarak tapïkokachi le moköngwö.

³⁴ Ompöwölo mönyorunye yiyö pich cho mewöghönye Tororöt, akuwongöy ma korïn cho kikïteka ropïyeni asoya.

³⁵ Miröy chane ghöyityö akïyï ngokï tötöy mïkuliskökwa lïs.”