AMOS 6 - PIPÏLIA

¹ Heywey akwa cho kyakalyan ompö Sayon* nko pich lentöy kikïlalyan ompö kutïng pö Samaria. Akwa pipö Israel cho echön cho sorokwa pich.

² Ape Kalne tasïwena apa Amat kanasyantanay mamïnïng, aröytö Kat ompö koro Pilisti. Ayo, karamach so chane kïtïl pöyunötino Yuda nko Israel? Echön so koroschoni kïtïl korenkwa?

³ Olentekwa, “Metunye kokay asispa kinyarat,” wölo nyu oghekwa asisoni kungwïn lawel.

⁴ Ochech akwa cho oruyot pöröyis cho kikigha kela pelöw aghïteghö kegh sopen, amöy panya mökol nko mogh!

⁵ Ochömekwa omïne tumwöy atumö pkurerun le wölo kitumöy pöytoghintö Daudi.

⁶ Akïghegho dipay* pakulin akuyila kegh mwowöy cho ngutoy lö pïlpïlpïl. Wölo melö syonöy kinyarata Yosep.

⁷ Kïlenyona lïku ye nyu chane cho tagh kïpa pïnotön akuwonyö ichontino pïchay chïritöy kegh.

⁸ Kikuwalwal kegh ECHOTYON, Tororöt Kimuktoghin lö, lilanïn menöto pipö Yakopo töghanïn kisön wölo lentöy aghïgh otötonan nyu kanasyantengwa nko kïgh anka tïkwïl nyo mi ori.

⁹ Ato ngotï pich tamanï ompö kaw akonga kïmeghot lömïs.

¹⁰ Chutöy chi chitöngwa nyo kama ompö kö. Atolapay kïkur chichay chitöngwa anka akïtep ato mi chi anka nyo kongotï köyoni. Kïlö chichay, “Ewo.” Atolapay kïlenchï weri nyinö mi sany, “Sisa, kikiröy, mökurönye chi kaynata ECHOTYON.”

¹¹ Nyini kangalan ECHOTYON, kityoröy korïn cho echön nko cho mïnkech kïrulyö kïlïkwï mïnchïran.

¹² Ekï ryogho angoletinö ghatoy, akïngoroy pich nanam eghin? Kyawaghakwa man kïlïkwï kawat, aghakwa kïgh nyo karam kïghaghit.

¹³ Kongörechekwa otï kaparakwa kanasyanta Lo Depar, okwolökwa kegh lö kïchicha owesöch cho kakïnam Karnaim.

¹⁴ Lenchini ECHOTYON, Tororöt Kimuktoghin pipö Israel pïsyinan pung kïpka kïpïrokwa kïngata ara Amat ntökwit lalwa Arapa.