2 TIMOTEO 1 - PIPÏLIA

¹ Kakirwan palalyantanï ante Paulö kiyoktoghinto* Kristo* Yeso ompö machata Tororöt, ani nyo kikïyonton amwatïta ngala kiyomisöto söpon nyo kïsïkecha otini kökïtuyecha nko Kristo Yeso.

² Kakirunyi werïnyu Timoteo, nyo ichï chamanenyan. Nya kïkonïn Papo Tororöt nko Echotyontenyo Kristo Yeso, pöropchö nko kisyönöt nko kalya.

Keyokyï sörö nko ngala kikilöto kegh

³ Oyokyinan sörö Tororöt nyini opöghisyechinan ompö choghïn nyo karam, kïle wölini kipöghisyeghchini papotïnechan. Oyokinan nyinte sörö otini omitan ononinyi ompö sowutköchan nangat nko pöghet.

⁴ Ononan lokeku ompö ani, akwomanïn emö nyoman asïwinyi atangarak lasiny.

⁵ Ononan tïkwïl kighanat nyo puryö lïs nyo itïngetenyi, kighanat nyo karkegh nko nyo kitïng kokötöngu Lois nko yongu Yunis akï nyo otïngetan man lö mi oringu tïkwïl.

⁶ Nka nyoni ononunyi lö wïkyinö ma ropöwonto Tororöt nyo kinyorunyi atanye kyakanaghinyi morïn.

⁷ Ompöwölo meghechanye Mïkulögh nyo Tïlil nyo kikonecha Tororöt kenyökoritunö, wölo konecha owesyö nko chomnyogh nko ripöto kegh.

⁸ Kïlenyona melalïyan isöwintönchï Echotyontenyo, amelalïyan ompö ani nyo kikïtorchon chela ompö parakunyi. Wölo chengchinö kegh kareran nyo pö kiwongunöt ompö amtagh pö Lökoy cho Karamach, kïle wölini koninyi Tororöt owesyö.

⁹ Kisörwecha nyinte akïkurecha kelïkuna pikachi kegh. Kighwecha lenyoni amelö ompö wölo mi kïgh nyo kikighacha, wölo ompö machatenyi nko pöropchenyi nyo kikiyomiswecha pöropchononi könyisyok ompö ara Kristo Yeso,

¹⁰ wölo kikengongwecha ye pöropchononi ompö kingwïnata Ghetintenyo Kristo Yeso. Nyinte nyo kewany owesyo meghat akïngongwï söpon pö kokay kuwerï Lökoy cho Karamach.

¹¹ Kikïlanïn Tororöt alïkwan kiyoktoghin alïkwï konetin nyo omtoy Lökoy cho Karamach,

¹² nka nyoni omitan owonguno ngalechoni. Wölo mosïwïyanye arasï ompöwölo onkïtön chichini kaghanan, ankïtön nyoman lö, muköy kïkomönöy lasiny kïyoni kökonanïn ntökwit asispa mïlaghtanyi.

¹³ Rïpa lasiny kinetut pö man chay kyanetinyi, amepïstö kighanat nko chomnyogh ompöwölo chicha tïkuchoni otini kökïlinyecha nko Kristo Yeso.

¹⁴ Ikaman tïkuchoni karamach kökoninyi Tororöt ompö owesyo Mïkulögh nyo Tïlil nyo töpo orincha.

¹⁵ Inkïtönyi lö, kinategha kegh pich löwïr ompö wölo omitan cho pö Esya. Pïchoni walaka kï ompö Pukelo nko Ermokene.

¹⁶ Nya kusyonchï Echotyon ka Onesiporo, ompöwölo kingarakanïn kïnyïl cho chang amölalïyannye ompöwölo kyomitan chela,

¹⁷ wölo otini lawel kitï Rumi, kïmaranïn ntökïtenö kïnyorwanïn

¹⁸ Nya kutö Echotyon nyinte kisyonötenyi asispa mïlaghtanyi. Olentan inkïtönyi lasiny wölanye kingaraktanïn nyinte ompö kanasyanta Epeso.