2 SAMWEL 8 - PIPÏLIA

¹ Ato mi lötï kïporyeghö Daudi pipö Pilisti akïrïnta akïchenga chane Metek Ama.

² Kïrïnta Daudi pipö Moap akïtat chane kïruyö ngwïny akupima pörköyö, kupim pörköy odeny cho kïpöröy, kïpïstö porköyö akonga kïsöpchö, kïlïkwï pipö Moap mötwori Daudi akïkwöghchï nyinte surï.

³ Kïrïnta tïkwïl Daudi Adadeser wero Reop, pöytoghinto Sopa, otini kirich kïnyorï paytagh kïngeta lalwa Yuparet.

⁴ Kïnam Daudi pipö Adadeser 1,700 cho pö angoletin nko pipö lïk cho pegho kelyön 20,000, kïtörotör Daudi angoletine chepkintolay cho kichutöy nkaritin, kïpoto cho le 100 cho pö nkaritin.

⁵ Kuyokwï pipö Sirya cho pö Damaska pipö lïk kungarak Adadeser pöytoghinto Sopa, kïpar Daudi cho le 22,000.

⁶ Kïtek Daudi möngenyi pö lïk Sirya nyo pö Damaska, kïlïkwï pipö Sirya mötwori Daudi akï kwöghchï nyinte surï. Kutö ECHOTYON Daudi rïntagh ompö wop anka tïkwïl wölo kiwö poryot.

⁷ Kïcheng Daudi longo pö koltin cho kipöy mötwori Adadeser pöytoghinto Sopa akwip Yerusalem.

⁸ Kwipunö Daudi kari taghoy Peta nko Perotay kanastina Adadeser.

⁹ Nyini kilïm Toy pöytoghinto Amat lö kirïnta Daudi pipö lïk löwïr cho pö Adadeser,

¹⁰ kïyonta werïnyi Yoram wölo mi Daudi kutakwes nyinte akuyokyï sörö, ompöwölo karïnta Adadeser nyo köporyot nko nyinte su. Kwipchï Yoram Daudi koltin nko silpa nko taghoy.

¹¹ Kïngotchï Daudi tïkuchi ECHOTYON nko silpa nko koltin cho kichenga puntoni,

¹² Edom nko Moap nko Amon nko Pilisti nko Amalek cho kirïnta nko cho kichenga Adadeser wero Reop pöytoghinto Sopa.

¹³ Kwororit Daudi tya otini kimïlegha wölo kipara pipö Edom cho le 18,000 ompö mpöghoghyo Paryan.

¹⁴ Kïtek möngenyi pö lïk kuwit Edom, kïlïkwï pipö Edom mötwori Daudi. Kutö ECHOTYON Daudi rïntagh ompö wop anka tïkwïl wölo kiwö poryot.

¹⁵ Kïpayta Daudi koro Israel kïmïkul akurwokyï pikachi löwïr ompö man.

¹⁶ Ki wowö lïk Yoap nyo kile kame Seruya, kï kikirinto osis Yeosyapat wero Ailud,

¹⁷ kï ki tïsin Sadok wero Aitup nko Aimelek wero Apyatar, kï kikirinte Seraya,

¹⁸ kï wowïn pö pipö Keret nko Pelet Penaya wero Yeoyada, kï ki tïsi werpö Daudi.