2 SAMWEL 24 - PIPÏLIA

¹ Kïngwanit nörekyo ECHOTYON lö kat ompö pipö Israel ngat akwigh Daudi kutö chane kömpölelyö, kïlenchï ECHOTYON nyinte, “Wïyö yitö pipö Israel nko Yuda.”

² Kïmwochï Daudi Yoap yetïn pö pipö lïk lö, “Ape awera wölo mi ortïna pipö Israel löwïr, kïngata söröm ntökwit sörömu anka ayit pich atonkïtwan lö tya chane.”

³ Wölo kïlenchï Yoap pöytoghin, “Nya kïtas ECHOTYON Tororötïngu pipö Israel kïnyïl 100 ompö chongïntangwa nyo pö ye, akï ngwangwa söpönyi ntesïwa ato ighöy, wölo ompö ne tökïmököy echotyontenyan pöytoghin kïyï?”

⁴ Wölo kïlot pöytoghintö Yoap nko yetïntino pipö lïk. Kïlenyona kïpegha chane wölo mi pöytoghintö akïpa kuyitotö pipö Israel.

⁵ Kwoghyö Yordan akïmang Aroer okumpö ewu tagh, kanasyan nyo mi kwenu mpöghogh ompö koro Kad. Kïpegha atoni akutang Yaser,

⁶ atolapay kutang Kiliad akïpa Kades koro Ititi, akutang Dan Yaan, atolapay kuwit kutang Sidon

⁷ akïpa kutang kanasyanta Tiro nyo tekate, kuwit akïpa kanastina Ipiti löwïr nko cho pö Kanan akïpa kutang Nekep* nyo pö Yuda nyo mi Persyepa.

⁸ Kïmïlisyö nyu chane Yerusalem otini kikuwany kuwit kore kïmïkul ompö aro mut nko angwan nko osis tömönut odeny.

⁹ Kutö Yoap pöytoghin kaynötut pö pich cho kimuköy poryot, pich 800,000 ompö Israel, kï pich ompö Yuda 500,000.

¹⁰ Otini kikïcheng Daudi kiyitutchay pö pich, kusus kegh ompö kinonsyewutkachi akïlenchï ECHOTYON, “Kaghan ngokï cho ghach ompö kïyï. Wölo osoghinyi, we ECHOTYON lö, chenga lelutyo mötworintengu, ompöwölo kaghan ompö sölwontön.”

^11-12 Kïlenchï ECHOTYON Kad nyo le werkoyonto Daudi, “Wïyö mwochinö Daudi lö, ‘Kïla kïgh akonga ompö tïkwïn sömök nyo onoreninyi.’ ” Otini kinget Daudi ato le asïyech tökwoghö,

¹³ kïwö Kad wölo mi nyinte akïmwochï ngalechay kamwa ECHOTYON, akïtep nyinte lö, “Nyono nyo imökenyi? Kömöy nyo pö könyis sömök ompö korengu nya anta rïpenönyi tawu punköku ompö aro sömök anta sömew nyo pö osis sömök ompö korengu? Nana ye nyu aimwowanïn kïgh nyo owetan omwochini ECHOTYON.”

¹⁴ Kïlenchï Daudi Kad, “Omitan ato kampalal! Wölo mochömanye kïkonanïn ptangengmöt sitöt. Nya kïkonecha ECHOTYON sitöt, ompöwölo tïng kisyonöt nyo wow.”

¹⁵ Kutö ECHOTYON sömew pipö Israel nyo kitor tökwoghononi ntökwit otini kikïl ECHOTYON. Kïmeghö pich cho le 70,000 kïngata söröm ntökwit sörömu anka.

¹⁶ Nyini kirich kunyar malaykayantanay pö ECHOTYON Yerusalem, kwotyechï ECHOTYON sitonay kitö pich akïlenchï malaykayantanay kimi kïpöröy pich, “Pïstenö kikïmïchï.” Kimi malaykayantanay atoni atolekïtö ghatya pagh nyo pö Arauna chi pö Yepusi.

¹⁷ Kïsïwa Daudi malaykayan nyo kipöroy pich, kïlenchï ECHOTYON, “Kaghan ngokï akaghan ghöyityö, wölo ne kitö nyo gha nyo kegh pïchï le pörop? Nya kïlïkwï nyinyan site nko katanyan.”

¹⁸ Kungwïn asisoni Kad wölo mi Daudi akïlenchï, “Wïyö tanga ghatya pagh nyo pö Arauna aitekyï ECHOTYON ato kïpelo amöros.”

¹⁹ Kïter Daudi ngölyonto ECHOTYON akïwö le ato kömwochï Kad.

²⁰ Kïtopöntö Arauna kïsïwa pöytoghin kungwïnöy nko mötworichi wölo mi nyinte kïkïtïngchï ompö konyït.

²¹ Kïtep Arauna lö, “Ompö ne tengonönyi wölo omitan nya pöytoghin?” Kïlö Daudi, “Omökan ole ghatyengu pö pagh atotekyï ECHOTYON ato kïpelo amöros, atökïngeta pich sömewö.”

²² Kïlenchï Arauna Daudi, “Chenga aitö ECHOTYON kïgh nyo kemökenyi, achï eghine cho pö amöros nyo kïpelöy nko keti cho kinyertoy nko mïchokineko eghin cho lïku kwenka.”

²³ Kutö Arauna tïkuchï löwïr pöytoghin akïlenchï nyinte, “Nya kïtak ECHOTYON Tororötïngu ropöweku.”

²⁴ Wölo kïlenchï pöytoghintö Arauna, “Melö lenye nyona, olan ompöwölo melö otönan ECHOTYON Tororötïnyan amöros nyo kïpelöy nyo melö kalan.” Kïlenyona kwala Daudi ghatyanay pö pagh nko eghine ropïyeni silpa cho le tömönut mut.

²⁵ Kïtekyï Daudi ECHOTYON ato kïpelo amöros ompö atoni akutö amörostin cho kïpelöy nko cho pö pöghisyö. Kïterchï ECHOTYON nyinte sowutkachi. Kuwonyö sömewö ompö Israel.