2 SAMWEL 23 - PIPÏLIA

¹ Kisyol Tororöt Daudi wero Yese kïyetï, kïlana Tororöt pö Yakopo, tuminto Israel nyo karam. Chï kï ngala Daudi cho pö söröm:

² Ngölonöy Mïkulöwu ECHOTYON kuwerwanïn, ongölonenan ngölyontenyi nyo mwowanïn.

³ Kangalan Tororöt pö Israel, kölenchanïn ghatya Israel, “Ato payta pöytoghintö pich ompö man, akïkonyïtöy Tororöt,

⁴ kulïwchini chane le löpoyïn pö tökwoghö, le asis nyo möminye polta, nyo ighöy sus kusïl otini kepech korö.”

⁵ “Soyönöy Tororöt konyan, ompöwölo kyam nyinte muma* nyo pö kokay nko ani, nyo kikïtat amöwöghökonye. Ighöy nyinte sörunötenyan nko machatenyan kïtasa.

⁶ Karkegh pich cho ghach nko kato cho kïlöstoy cho mönömonye chi ewunyi,

⁷ Tïngeto chi nyo nömöy rentuy, mïchini kepel lömïs.”

Nyökon pö Daudi

⁸ Achï kaynötut pö pich cho le nyökon cho kimi nko Daudi: Yosyep Pasyepet nyo pö Takemon, ki yetïn nyinte ompö chay le sömök, kipar pich cho le 800 ompö poryot akonga.

⁹ Nyo pö odeny ompö nyökon chay le sömök kï Eleasar wero Dodo wero Aoy. Kimi nyinte nko Daudi asis akonga ato kimwa chane pipö Pilisti chi kikikutuyö kegh ompö poryot. Kïmïlisyö pipö Israel löt,

¹⁰ wölo kughyongtö nyinte akïporyeghö pipö Pilisti akïpar ntömökumukönye eghunyi kïsyolöy choke. Kutö ECHOTYON chane asisoni rïntagh nyo wow, kïmïlisyö nyu pipö Israel akïpka kïpït pïchay kikïmeghö.

¹¹ Nyo pö sömök ompö nyökonchay kï Syama wero Ake chi pö Arar. Kïtuyechï pipö Pilisti Lei wölo kimi denkunö cho chang. Kïryagha pich tawu pipö Pilisti,

¹² wölo kughyongtö Syama akïporyö nko pipö Pilisti akïpar chane. Kutö ECHOTYON chane asisoni rïntagh nyo wow.

¹³ Kiröytö pich cho le sömök ompö nyökon tömönut sömök, kutang köpöno Adulam wölo kimi Daudi ato kirich osiswo ilö akimi lïko Pilisti mpöghoghyo Repaim.

¹⁴ Kimi Daudi osiswechoni wölo tekate, kïmi lïkö Pilisti Petleem.

¹⁵ Kunan Daudi kaw akïlö, “Ntökökonanïn chi pögh cho pö kö pö pögh nyo mi Petleem!”

¹⁶ Kïpa nyökonchay le sömök akuwer möngo Pilisti kwen akïrömunö pögh köyay pö pögh mi Petleem akwipchï Daudi. Wölo melö kigha nyinte, kimïlchï ngwïny le ropöwon ompö ECHOTYON,

¹⁷ akïlö, “Ewo, ECHOTYON, moghanye kïgh nyo lata nyoni kokay, ompöwölo lata ato kagheghan kisön pö pïchï kewusyï söponwekwa ket.” Kïlenyona kïtagh kïgha. Tïkwïn choni cho echön cho kigh nyökon choni le sömök.

¹⁸ Ki yetïn pö chay le tömönut sömök Apisyay werto ompö Yoap nyo kile kame Seruya. Kipara ngot nyinte pich 300 akwororit ompö chay le tömönut sömök.

¹⁹ Kyoror nyinte tya ompö pïchay le tömönut sömök akïlïkwï yetïntöngwa, wölo melö kit ororyenyi nyo pö pïchay le sömök.

²⁰ Ki chi nyo le nyakan Penaya wero Yeoyada nyo pö Kapseel akigh tïkwïn cho echön. Kipar nyökon pö Moap odeny akïwö kïpörchï ngötïny ngötut ompö osiswo kaghïtan.

²¹ Kipar chi pö Misri nyo kikogh akitïng ngot, wölo kïporyeghö Penaya nyinte ompö lïkïp akïsara ngotït akïpara nyinte ngotïnyi.

²² Tïkwïn choni cho kigh Penaya wero Yeoyada akwororit ompö nyökonchay le tömönut sömök.

²³ Kyoror nyinte ompö kwenungwa, wölo melö kit ororyenyi nyo pö pïchay le sömök. Kwigh Daudi nyinte kïlïkwï yetïn pö ripichi.

^24-39 Achï pïchay walaka ompö chay le tömönut sömök: Asael werto ompö Yoap Elanan wero Dodo nyo pö Petleem Syama nko Elika cho pö Arod Eles nyo pö Pelet Ira wero Ikes nyo pö Tekoa Apieser nyo pö Anatot Mepunay nyo pö Usya Salmon nyo pö Aoy Maaray nyo pö Netopa Elep wero Paana nyo pö Netopa Itay wero Ripay nyo pö Kipea akï pö ara Penchamen Penaya nyo pö Piraton Iday nyo ngwïno mpöghoghöyi Kaas Apiyalpon nyo pö Arapa Asmapet nyo pö Paurim Eliapa nyo pö Syaalpon werpö Yasyen Yonatan Syama nyo pö Arar Ayam wero Syarar nyo pö Arar Elipelet wero Aaspay nyo pö Maaka Eliyam wero Aitopel nyo pö Kilo Esro nyo pö Karmel nko Paray nyo pö Ara Ikal wero Natan nyo pö Sopa nko Pani nyo pö Kad Selek nyo pö Amon Naaray nyo pö Peerot nyo kile ipinto ngotpa Yoap wero Seruya Ira nko Karep cho pö Yatie Uriya nyo pö Ititi. Ki 37 chane lapay.