2 SAMWEL 22 - PIPÏLIA

¹ Kïngölonchï Daudi ECHOTYON ngalechï ompö tum, asisini kisörï ECHOTYON nyinte ompö mori pungkachi löwïr nko Saulö.

² Kïlö, ECHOTYON kï ghatyenyan nko wölo oghïponan, akï sörunintenyan,

³ Tororöt kï köpönenyan wölo orïpchinan, longenyan nyinte, owesyeto sörunötenyan, pchörinyan nyinte nyo orïpchinan, sörunintenyan, sörwanïn nyinte ompö rïmöt.

⁴ Okuran ECHOTYON nyo mïchini kekwol, konyorwan sörunöt ompö pungköchan.

⁵ Kiwitanïn mirtino meghat, kulumanïn puseryonto ngwen.

⁶ Kiratanïn pörköyi ngwen, kutö pïrïm ngöghöpunyi psach ompö ani.

⁷ Okurön ECHOTYON ompö nyarïltanyan, okuran okurön Tororötïnyan. Kïlïm nyinte kutinyan ompö Konyi, kit lokechan yitichi.

⁸ Kïpotan ngwïnya akuyotyot, kipotonchö pchörino yïm akurïngring, ompöwölo kinyala Tororöt.

⁹ Kïpusta ighöt nyo kingwïna sörunöyichi, kungwïna lyopötö nyo ngwan kutinyi, kingwïtu ngöset cho nöghyot.

¹⁰ Kupun yïmwöy akungwïn ngwïny akimi polta nyo tuw kelyechi.

¹¹ Kilang nyinte kerupim* akupiltö, kirumunö nyinte köpepoy pö yomöt.

¹² Kuluma kegh tuwïn, kuwit poltoy nyinte cho kinyïghï pögh.

¹³ Kinöghö ngöset ompö kiryal nyo kimi tawunyi.

¹⁴ Kïtïl ECHOTYON ompö yïm, kelïm kuti Tororöt nyo Töror Tya.

¹⁵ Kïwutïtö kotichi kutoyö chane, kïyon chane ompö kiryal.

¹⁶ Kïrumï ngwïnya nyo pö nanam, kengany pchörino ngwïny, otini kisyal ECHOTYON, otini kitorunö kimungöt sörunöyichi.

¹⁷ Kingwïna ECHOTYON yïm akïnamanïn, kingwïsunenanïn nyinte ngwïnyi pögh.

¹⁸ Kisörunenanïn pungköchan cho owesöch, chane cho kireyanïn, kyowesöch chane ompö ani.

¹⁹ Kipokyanïn chane ato kyomitan nyarïl, wölo kungarakanïn ECHOTYON.

²⁰ Kityakanïn nyinte, kisörwanïn, ompöwölo kichömanïn.

²¹ Kikonanïn ECHOTYON perur, ompöwölo ochan chi pö man. Kesoyönanïn ompöwölo motïngetanye ghöyityö.

²² Karïpan ara ECHOTYON amelö kopïstan Tororötïnyan.

²³ Karïpan ortïnechi löwïr, amelö mi nyo kopïstan.

²⁴ Motïngetanye kigheghchin ompö nyinte ompöwölo melö kyarikan ngokï.

²⁵ Kökonanïn ECHOTYON perur, ompöwölo oghan man, nkït nyinte lö, motïngetanye ghöyityö.

²⁶ Iporchinenyi pich cho ghönote ichinyi ghanate, iporchinyi kitenat chane cho tenote.

²⁷ Iporchinenyi cho tïlilöch lö ichinyi tïlil, iporchinyi pkatis lö ichinyi pkatyan.

²⁸ Isörunenyi chane cho tölose, irekunenyi chane cho ipöy kegh parak.

²⁹ Ichinyi kitömöwontenyan, we ECHOTYON ilöpochinenyi wölo tuw ompö ani.

³⁰ Ikonanïn owesyö nyo orïntegho pungköchan nko owesyö nyo onyoro nayat nyo körtegho kegh.

³¹ Pö man ara Tororöt poru ayomistanyi lö man, longa nyinte ompö chane cho ryöghchini nyinte.

³² Möminye Tororöt anka, kïpoto ECHOTYON akï möminye köpön anka kïpoto Tororötïncha.

³³ Tororöt kwawes wölo nyo orïpchinan, kegh ortïnechan kïkaramachitu.

³⁴ Kegh kelyechan kïkarkegh nko cho pö cheptirkich, akutönanïn wölo sïtote.

³⁵ Kenetanïn nyinte ompö poryot, atökumï ewunechan kïpöghisyeghö kïwanti sakalïm.

³⁶ Kelïkunyi longenyan nyo ripanïn, kïkonanïn kingörokutyengu owesyö.

³⁷ Kekonaninyi pöroyïn owestan, amelö kachïntan.

³⁸ Kyarïpan pungköchan ntökïtenö arïntan, kimopïstanye chane ntökïtenö aparan

³⁹ Kyaparan chane anyerön tömöngetyö, kyarïntan chane nyoman.

⁴⁰ Kinapaninyi lasiny omö poryot aighanyi pungköchan kïpïr töronkwöy.

⁴¹ Kighanyi pungköchan kupertegho tawunyan, kyaparan chane cho kireyanïn.

⁴² Kiyar chane kingörokut, wölo möminye chi nyo kisörï chane. Kilokyï chane ECHOTYON, wölo kimöterchïnye chane.

⁴³ Kyangaghan chane le pïsya, kyatïkan chane le nyïngwïny cho mi or.

⁴⁴ Kisörunenanïn pich cho kitaghanïn airipönyi paytaghtanyan ompö punton, kipöghisyewanïn pich cho monkïtönye.

⁴⁵ Kïtïngchinanïn pipö koros walaka, nyini kalïmanïn chane, kïterwanïn.

⁴⁶ Kimeghö mutïnö pipö punton, kïpkana nöyet cho ki körtegho kegh akï potonchot.

⁴⁷ “Söpöy ECHOTYON, soyönote Ghatyenyan, nya kïsala Tororötïnyan nyo le Sörunintenyan.

⁴⁸ Tororöt nyo kökonanïn rïntagh akutö pipö punton ngwïnyinyan.

⁴⁹ Kösörunenanïn wölo mi pungköchan, kutoteghenanïn otöpan paraku pungköchan akïghetenanïn kwenu pich cho le pkatis.

⁵⁰ Okwolinyi, we ECHOTYON ompö kwenu punton, osölan kaynatengu

⁵¹ Töni Tororöt rïntagh pöytoghintenyi, porchini chomnyogh nyo pö kokay nyo kikïl nyinte ompö Daudi nko monechi kokay.”