2 SAMWEL 21 - PIPÏLIA

¹ Kimito kömöy ompö osiswo Daudi nyo kipö könyis sömök cho kirïp kegh, kïtep Daudi ECHOTYON. Kïlö ECHOTYON, “Kimïlta Saulö kisön nko katanyi, ompöwölo kipar pipö Kipyon.”

² (Kïkur Daudi pipö Kipyon. Melö ki akonga nko pipö Israel chane, wölo ki ngötunön pö pipö Amori cho kiwalwal pipö Israel lö möpörönye chi chane. Wölo kimököy Saulö kïpöröy chane atökïtasa kinoghyot nyo kitïng ompö pipö Israel nko Yuda.)

³ Kïtep Daudi pipö Kipyon lö, “Aghwekwa ne? Ompöwölo omökan owonge ghöyityö nyo kikighwekwa, atosoyönökwa pipö ECHOTYON.”

⁴ Kïlenchï pipö Kipyon nyinte, “Melö wöngöy silpa anta koltin syala nyo kïtïngetecha nko Saulö, amelö kïmökecha kepöre chi ompö pipö Israel.” Kïtep Daudi lö, “Omökekwa oghwokwa ne nyu?”

⁵ Kïlenchï chane pöytoghin, “Kimököy Saulö kïpörecha lömïs kïmömi ompö akong nyo ngötu ompö koro Israel.

⁶ Kïlenyona konecha werkachi cho le mut nko odeny atökewisöcha chane ompö tawu ECHOTYON ompö Kipea kanasyanta Saulö nyo kikïl ECHOTYON kïlïkwa pöytoghin.” Kïlö pöytoghintö, “Owöy, okonokwa chane.”

⁷ Wölo kïpïstö Daudi Mepiposyet mompö Yonatan wero Saulö akwompö muma nyo kiwalwal Daudi nko Yonatan ompö kanasyanta ECHOTYON.

⁸ Kïcheng pöytoghintö werpö Saulö Armoni nko Mepiposyet cho kiyichï Rispa chepö Aya nko werpö Merap chepö Saulö cho le mut, cho kiyichï Adriel wero Parsilay nyo pö Meola.

⁹ Akutö chane mori pipö Kipyon cho kiwis chane ompö tawu ECHOTYON ompö kutïng, kuwonyö chane lapay kï mut nko odeny. Kikïpar chane ompö osiswo tagh cho pö ilö ato kikitor kekas matay.

¹⁰ Kïcheng Rispa chepö Aya sarankwachtin akukorkorchï kegh rurwö ompö ghatyanay mitö muntïruch, kïtöpö atoni kïngata osiswo ilö ntökïropan akimöpïsyïnye törit kïpka kwam anta tïpö wudïn ato le oghö.

¹¹ Nyini kikïmwochï Daudi kïgh nyo kigh Rispa chepö Aya nyo kile chemïnïngwo* Saulö,

¹² kïwö kïchengunö koyo Saulö nko cho pö werïnyi Yonatan pipö Yapes Kiliad. (Kichor chane koyechoni ompö ato kïtuyegho ompö kanasyanta Pet Syan kwen, wölo kiwisyï pipö Pilisti, asis nyo kipar chane Saulö ompö Kilpoa.)

¹³ Akwipunö Daudi wöloni koyo Saulö nko cho pö werïnyi Yonatan akusup koyo pïchay kikiwis.

¹⁴ Atolapay kïtïpchï chane koyo Saulö nko cho pö werïnyi Yonatan koro Penchamen ompö Sela, pïrïmpeto paponyi Kis. Kwigh lapay cho kimwochï pöytoghin chane, kïterchï nyu Tororöt chane sowutkökwa kïngata atoni.

Köporyö Israel nko Pilisti

¹⁵ Kïporyö ngat pipö Pilisti nko pipö Israel, kïwö Daudi nko mötworichi poryot, kïporyö nko Pilisti ntökwaghach Daudi.

¹⁶ Kimököy chi nyo wow nyo kikïkuro Ispipenop kïpöröy Daudi akitïng ngot nyo kikigha tay nyo kile kilen sömök nko kwen nko chok nyo tökïrel.

¹⁷ Wölo kungwïn Apisyay wero Seruya kungarak nyinte akïpöryeghö chichay akïpar. Kïlenchï pikachi Daudi, “Mewetenyinye nko acha poryot, ompöwölo melö kïmökecha meghanyi, akwanyï ichinyi kitömöwonto Israel.”

¹⁸ Tomönye kite kïporyö pipö Israel nko pipö Pilisti ompö Kop. Kïpar ompö wöloni Sipekay nyo ngwïno Usya Sap nyo kile mompö pïchay koghöch.

¹⁹ Kïporyö ngat pipö Israel nko Pilisti ompö Kop, kïpar Elanan wero Yair nyo ngwïno Petleem Kolyat chi pö Kit nyo kitenö orïmeto ngotïnyi pïrompïryon.

²⁰ Kïporyö ngat pipö Israel nko pipö Pilisti ompö Kat, wölo kimitö chi akong ompö pïchay koghöch, nyo kitïng morïn mut nko akonga ompö ewunechi kwodeny nko morïn mut nko akonga ompö keltö nyini nko nyini, 24 löwïr.

²¹ Kisas nyinte pipö Israel, wölo kïpar Yonatan wero Syimey werto ompö Daudi nyinte.

²² Kipö pïchï kï angwan ara pïchay koghöch pkono Kat, kïpar Daudi nko pikachi chane.