2 SAMWEL 19 - PIPÏLIA

¹ Kemwochï Yoap lö, “Mi Daudi kïloköy akwompö werïnyi Apsolom.”

² Kiwaghaka nyu rïntagh nyo pö asisoni kïlïkwï lok ompö pich, ompöwölo kilïm pich lö, “Mi pöytoghintö kïloköy akwompö werïnyi.”

³ Kïlïtu pich asisoni kanasyan akïsisyonu, le pipö lïk cho tïng arasï ompöwölo köryöghö poryot.

⁴ Kïkarta pöytoghintö konyichi akïlok tya lö, “Heywey Apsolom, werïnyu Apsolom!”

⁵ Kungwïn Yoap kö pö pöytoghin akïlenchï, “Ketönönyi asete arasï mötworiku, cho kösörï söpontöngu nko nyo pö moneku nko nyo pö koruku nko nyo pö chemïnïngweniku,*

⁶ ompöwölo kechamanyi chona reyinyi, itaghanyi chona chöminyi. Keporunyi asete lö yetïntineku pö lïk nko mötworiku kï kwïle ompö nyi. Ompöwölo kosöwan lö, anta kökïmeghecha asete löwïr akïsöp Apsolom, kötengörökenyi.

⁷ Ngeta ye nyu aiwö ingalan mut nko mötworiku, ompöwölo omwowunyi nyo pö nyoman lö, atomewenyinye ingalan nko chane, kï möminye ompö akong nyo söröpunyi aghonete. Akï nyete nyo ghöyitu kïtïl ghöyityö anka tïkwïl nyo kinyorunyi kïngata mïnïngityengu nko nyete le ye.”

⁸ Kïnget pöytoghintö akïwö kïtöpö kuka kanasyan. Kemwochï pich lö, “Mi pöytoghintö kïtöpo kuka kanasyan.” Kïpka pich löwïr wölo mi nyinte. Kökikïryögh ataye pipö Israel, kiwö chi anka tïkwïl katanyi.

Kamïla Daudi Yerusalem

⁹ Kïsyal pipö Israel chane akïlentöy, “Kisörwecha Daudi ompö mori pungköcha akïsörunenecha mori pipö Pilisti akwanyï ye nyu kayona Apsolom nyinte kore.

¹⁰ Kikepar Apsolom nyay kikïkïlacha kïlïkwï pöytoghin. Ompö ne nyu tömömi chi nyo ngölono lö, ‘Mïlo oyï Daudi?’ ”

¹¹ Kïlïm Daudi ngalechay pö Israel, kïyonta Sadok nko Apyatar cho kile tïsï, kïpa kïtep pipö Yuda lö, “Ompö ne talïkunakwa cho pö söröm angaraka pöytoghin kïmïla katanyi?

¹² Ochikwa piko orencha, achikwa monechan, ompö ne nyu talïkunakwa cho pö söröm oyokwanïn?”

¹³ Omwochinö Amasa lö, “Ichinyi montönyan, kïngata ye ilïkunyi yetïn pö lïk nyo pö atay kömi Yoap, nya kïparanïn Tororöt ato maghanye lenyoni.”

¹⁴ Kïkïnkïn Daudi pipö Yuda kïlïkwï akonga, kuyoktö pipö Yuda ngölyon wölo mi Daudi lö, “Mïlena nko mötworiku löwïr.”

¹⁵ Kïmïla pöytoghintö kutöngwï Yordan, kïpka pipö Yuda Kilkal kïtarok nyinte atökungarak kwowï lalwa Yordan.

¹⁶ Kukwïskus tïkwïl lawel Syimey wero Kera nyo pö ara Penchamen nyo ngwïno Paurim akïwö nko pipö Yuda kïtarok pöytoghin Daudi

¹⁷ akimi nko pich cho le 1,000 cho pö ara Penchamen. Kïwö lawel tïkwïl Sipa mötworinto ka Saulö nko werkachi cho le taman nko mut nko mötworichi cho le tömönut odeny kutang Yordan kïtarok pöytoghin.

¹⁸ Kwoghyö lalwa atökungarak pipö kö pö pöytoghin akwighchï kïgh nyo kimwa nyinte. Kïkïtïngö Syimey wero Kera tawu pöytoghin otini kirich kwowï Yordan

Keporchï Daudi köromnyö Syimey

¹⁹ akïlenchï pöytoghin, “Meyitwante lelut anta inan ghöyityö nyo kyaghunyi mötworintengu atay kingwïnonyi Yerusalem, metönö choni mïkulöwungu.

²⁰ Onkïtön lö kyaghan ngokï, nka nyete kangwïnan asete alïkwï nyo pö tagh ompö ka Yosep atarok pöytoghin.”

²¹ Kïlö Apisyay wero Seruya, “Mïchini kepar Syimey ompöwölo kichïp nyinte nyo kikïl ECHOTYON kïlïkwï pöytoghin.”

²² Wölo kïlö Daudi, “Melö lata nyona werpö Seruya, ompö ne tomökekwa olïkune pungköchan asete? Möminye chi nyo kïpöröy asete ompö Israel, ompöwölo ochan pöytoghinto koro Israel kïmïkul asete.”

²³ Atolapay kïlenchï pöytoghintö Syimey, “Owolwolunyi lö, ‘Möminye chi nyo pörinyi.’ ”

Keporchï Daudi köromnyö Mepiposyet

²⁴ Kungwïn Mepiposyet nyo pö ka Saulö kïtarok pöytoghin amelö kiwun kelyechi anta mut tamughyenyi anta mwat sïrokachi, kïngata otini kingeta pöytoghintö Yerusalem ntökïmïla nyo karam.

²⁵ Nyini kituna Mepiposyet Yerusalem kungwïn kïtarok pöytoghin, kïtep pöytoghintö nyinte lö, “Kilïkwï ne tömewenyi nko ani?”

²⁶ Kïlö, “Inkïtönyi we pöytoghin lö, ochan mwolöy, kyomwochan mötworintenyan lö, ‘Rata sïkïryenyan atowan nko nyi,’ wölo kïlïsanïn.

²⁷ Kiwökanïn nyinte ompö wölo imitenyi. Wölo körökegh echotyontenyan nko malaykayanta Tororöt, kïlenyona igha kïgh nyo isïwïyenyi lö karam ompö nyi.

²⁸ Kimïtchinecha meghat, ani nko koto paponyan ompö wölo imitenyi, wölo anyï ye ketönaninyi nko pich cho omisyegho mesengu. Ne kitö nyu anka nyo tosominyi pöytoghin?”

²⁹ Kïlenchï pöytoghintö nyinte, “Ne tengangtena ngaleku cho chang? Kamwaghan lö nyi nko Sipa cho ochöghöy kore.”

³⁰ Kïlenchï Mepiposyet pöytoghin, “Nya kïcheng Sipa onkït, kikïmïchanïn nyini kemïlenyi kaw nyo karam.”

Keporchï Daudi köromnyö Parsilay

³¹ Kingwïn tïkwïl Parsilay nyo pö Kiliad kungwïna Rokelim kïtarok pöytoghin atökungarak kwowï lalwa Yordan.

³² Kikikïyosit Parsilay, kitïng könyis 80 akitö nyinte pöytoghin omisyö atay kimi Maanaim, ompöwölo kimakos nyinte.

³³ Kïlenchï pöytoghintö Parsilay, “Nyonö kepe nko ani Yerusalem atö apaghïn ompö wölini.”

³⁴ Kïlenchï Parsilay pöytoghin, “Tya könyiswö cho tomöngan nya, nyo tomukan owetöy nko pöytoghin Yerusalem?

³⁵ Otïngetan ye könyis 80, melö tosïwïyan kïgh nyo karam nko nyo gha amelö tonkïtön kïgh nyo kyomöy anta cho kïgheghöy amolïmanye kutïwa tumï. Pö ne nyu alïkwan nïkisïn ompö nyi nya pöytoghin?

³⁶ Melö tökïmïchinanïn konunötö nyo tenö nyona, awetan pat nko nyi kite ntetïlanyi Yordan.

³⁷ Kanya amïlan kaw toröpösyan wöloni aketïpchanïn kamasu pïrïmpeto yiyichan. Wölo anyï werïnyan Kimam, nya kïwö nyinte nko nyi, ighchï nyinte kïgh nyo isïwïyenyi lö karam ompö nyi.”

³⁸ Kïlö pöytoghintö, “Wetöy Kimam nko ani aghchinan nyinte kïgh nyo karam ompö nyi awunyi kïgh anka tïkwïl nyo imökenyi.”

³⁹ Kwoghyö pich löwïr Yordan akwoghyö pöytoghintö tïkwïl, kukonköy pöytoghintö Parsilay akusoyön atolapay kïwö Parsilay katanyi.

Kemöl kegh pipö Yuda nko Israel akwompö pöytoghin

⁴⁰ Otini kikwowï pöytoghintö lalwa akimi pipö Yuda löwïr kumïtöy nyinte nko kareranpa pipö Israel, kïwö kutang Kilkal, akïwö Kimam tïkwïl nko nyinte.

⁴¹ Kïpka pipö Israel löwïr wölo mi pöytoghin akïlenchï, “Ompö ne tökwigh kegh werköcha pipö Yuda lö kïtïng man kemïtunyi owunö lalwa Yordan nko katangu nko piköku?”

⁴² Kïwöghökyï pipö Yuda pipö Israel lö, “Kakighacha lenyoni ompöwölo pö pöytoghintö arencha. Ompö ne nyu tökwighakwa nyoni onyölisyenö? Akwanyï melö kökonecha pöytoghintö omisyö anta ropöw.”

⁴³ Kïyokyï pipö Israel pipö Yuda lö, “Kïchicha ortïn taman, kïlenyona kïtïngetecha man ompö Daudi kïtïlakwa, kwompö ne tosösechakwa? Akwanyï ompö acha cho kikïpo tagh kengalanena mïlaghpa pöytoghin.” Wölo kingwonöch pipö Yuda kïtïl pipö Israel.