2 SAMWEL 13 - PIPÏLIA

¹ Kitïng Apsolom wero Daudi cheptangwa nyo kikuro Tamar nyo pïchigh akitomönye kep. Kïpïrchï wero Daudi nyinte anka nyo kikuro Amnon.

² Kinonsyö Amnon ntökïkasa akwompö cheptangwa Tamar. Kikömpölelchï nyu Amnon wölo nyoruntoy nyinte, ompöwölo ki chepkïltït.

³ Kitïng Amnon kongenyi nyo kikïkuro Yonadap wero Syimea werto ompö Daudi aki chi nyo le lïsin.

⁴ Kïlenchï Yonadap Amnon, “Kalïkwï ne nya wena, wero pöytoghin, techinyi narekate osis? Ompö ne tömemwowaninyi?” Kïlenchï Amnon Yonadap, “Opïrchinan Tamar chepto ompö werïncha Apsolom.”

⁵ Kïlenchï Yonadap nyinte, “Rïwö pöroyungu aigh kegh le chi nyo chirate, ato ngwïn papongu kurosinyi, ilenchï nyinte, ‘Nya kungwïn cheptöncha Tamar kïkonanïn makatyan nyo omöy akwighwanïn omisyö akïpaghanïn.’ ”

⁶ Kïrï Amnon pöröyunyi akwigh kegh le chi nyo chirate. Kungwïn pöytoghintö kuros nyinte, kïlenchï Amnon nyinte, “Osominyi lö nya kungwïn Tamar kwighwanïn omisyö ompö yi osïwïyan atö kïpaghanïn.”

⁷ Kïyonta Daudi chi wölo mi Tamar kïmwochï lö, “Wïyö koto werïnkwa Amnon ateghchinö omisyö.”

⁸ Kïwö Tamar koto werïngwa Amnon, kimi Amnon kïrïwöy pöröyunyi. Kïcheng pïsya akïtïntïr akwigh omisyö kïsïwïyi nyinte.

⁹ Atolapay kutö nyinte kwam, wölo kïtagh Amnon kwam akïlö, “Mwochinö chi anka tïkwïl kïwö sany.” Kïwö sany chi anka tïkwïl.

¹⁰ Atolapay kïlenchï Amnon Tamar, “Ipunö omisye wölï le pöröyunyan atö aman atepaghanïn.” Kwipchï Tamar omisyonay werïngwa Amnon.

¹¹ Wölo nyini kirich otini mi nyinte, kïnam nyinte akïlenchï, “Rïwö nko ani.”

¹² Kïlenchï Tamar, “Ewo werïnyo, menamanïn ompö owesyö, memukonye kegh kïgh nyo lata nyoni ompö Israel. Megh kïgh nyo pö sölwontön.

¹³ Lïku nyoni arasï nyo wow ompö ani, kïnyïl nyi ilïkunenyi akonga nyo pö sölwöy ompö Israel. Kïlenyona kaykay omwowunyi lö tepa pöytoghin ompöwölo melö töghöy ipaninyi.”

¹⁴ Wölo kïtagh Amnon ngala Tamar, akwompöwölo kitïng owesyö, kïpatal nyinte.

¹⁵ Atolapay kurey Amnon Tamar tya kïtïl chamat nyo kitïng ompö nyinte ato kile tagh akïlenchï nyinte, “Ngeta wïyö.”

¹⁶ Wölo kïlö Tamar, “Ewo werïnyo, gha nyu tya otï kemwowaninyi lö wïyö kïtïl kïgh nyo keghwaninyi.” Wölo melö kiter Amnon.

¹⁷ Kïkur chi nyo kipöghisyechini nyinte akïlenchï, “Yonena kokonï yi aikar kukat.”

¹⁸ Kïyon chichay Tamar akïkar kukat. Kiloköy Tamar sïra nyo kogh ompöwölo kiloköy lenyoni tipö pöytoghï cho tomöcha kïruyö nko chi.

¹⁹ Kutö Tamar aryon mötïnyi, akïpalpal sïranay kogh kiloköy, akïlokota ompö kut nyo wow akïnömotoy möt kïwetöy.

²⁰ Nyini kisïwa werïngwa Apsolom nyinte kïtep lö, “Köporyegheninyi werïnkwa Amnon so? Mekany kususïn ngölyontonï cheptönyo. Memwochï chi anka ngölyontonï ompöwölo werïnkwa nyinte.” Kïtöpö Tamar koto werïngwa Apsolom onkït akinarekate.

²¹ Nyini kilïm pöytoghintö Daudi ngalechï löwïr, kïnarek nyoman.

²² Kurey Apsolom Amnon nyoman ompöwölo kiporyeghö Tamar cheptöngwa, amelö kitökïngalan nko nyinte.

Ketökisyö Apsolom

²³ Otini kiwer könyiswö odeny, kïmwatïta Apsolom kemut puteko kechiryechi ompö Paal Asor nyo lekïto Epraim. Kïkur Apsolom werpö pöytoghin löwïr.

²⁴ Kïwö Apsolom wölo mi Daudi akïlenchï, “Mito osiswö kïmutöy puto kechiryechan, kïlenyona osominyi lö nyonö nko mötwöriku.”

²⁵ Wölo kïlenchï pöytoghintö Apsolom, “Ewo werïnyu, lïku nïkisïn nyo wow ompö nyi atokïpecha löwïr.” Kïsagh Apsolom nyinte nyoman wölo kïtagh akïlenchï, “Wïyönyi ompö kalya.”

²⁶ Kïlö Apsolom, “Atomölenyona, ikany kïwö werïncha Amnon nko acha.” Kïtep pöytoghintö nyinte lö, “Ompö ne temökenyi wete nko nyinte?”

²⁷ Wölo kïsagh nyinte nyoman, ntökïchömchï Amnon kïwö nko werkökwa.

²⁸ Kïmwochï Apsolom mötworichi lö, “Nyini kasïwekwa lö kikïtamas Amnon, amwowokwa lö, ‘Omïghitö Amon,’ apar nyinte. Mawagh ompöwölo ani nyo komwowokwa, onyökönitu amotomtomön.”

²⁹ Kwigh mötwori Apsolom lenyini kimwa nyinte, kïpar Amnon. Kïtoyö werpö Daudi chinö walaka akïlang sïkïröyikwa akïryagh.

³⁰ Otini kitökïpïn chane or, kemwochï Daudi lö, “Kapar Apsolom werköku löwïr möminye ompö akong nyo köngötï.”

³¹ Kïpalpal Daudi sïrokachi akumelmel ngwïny atökuporï nyarïltanyi. Kipalpal tïkwïl sïrokökwa mötworichi cho kimi nko nyinte.

³² Kïlö Yonadap wero Syimeya werto ompö Daudi, “We pöytoghin, melö kakïpar werköku löwïr, kakïpar Amnon onkït. Kigh lenyoni Apsolom akwompö cheptöngwa Tamar nyo kiporyeghö Amnon.

³³ Kïlenyona meghan lö kömeghö werköku löwïr, Amnon onkït nyo kakïpar.”

³⁴ Kuperta Apsolom. Kïlö mïrönö nyo kiripsïyi otopöntö, kïsïwa kuwitu muyo kutïng pich cho kipkono ara Oronaim.

³⁵ Kïlenchï Yonadap pöytoghin, “Achinö werköku pkonöy le atay komwowunyi.”

³⁶ Otini kiwany kïngalan, kwitï werpö pöytoghin akuteghyö akïriryö. Kïlok tïkwïl nyoman pöytoghintö nko mötworichi löwïr.

^37-38 Kuperta Apsolom kïwö wölo mi Talmay wero Amiud pöytoghinto Kesyur akumpur wölini könyis sömök. Kïrir pöytoghintö Daudi kïtenö osis akwompö werïnyi Amnon.

³⁹ Otini kiwany Daudi kïrir akwompö megha Amnon, kunan werïnyi Apsolom.