2 PETRO 1 - PIPÏLIA

¹ Kakiran palalyantanï ante Simon Petro nyo ochï mötworin achï akonga ompö kiyoktoghinto* Yeso Kristo.* Kakirwakwa cho kyonyorï kighanat nyo pö olyot nyo wow lenyini kikïnyorucha ompö manpa Tororötïncha nko Ghetintencha Yeso Kristo:

² Osoghan Tororöt kïtöswokwa pöropchö nko kalya ompö ara kinkïtöto Tororöt nko Echotyontenyo Yeso.

Kuröto Tororöt nko kïlatenyi

³ Kikonecha owesyo Tororöt kimuytoghin kïgh anka tïkwïl nyo kïmökecha tökumuka ketïpinö otöp nyo kiwöghöy nyinte ompö otini kinkïtöcha nyinte nyini kikurecha atökepara tïkwïl ororyenyi nko köromnyenyi.

⁴ Akwompö aranoni, konecha nyinte kiyomisut cho karamach akï cho pö olyot nyo wow atamuka ompö kiyomisutchoni osïkö otöp nyo pö Tororöt achïwïtyeghö wïrat nyo mi ngwïny nyo ngwïno pïrchin nyo gha.

⁵ Kïlenyona onoghyenö atasena kighanatengwo köromnyö, atasa köromnyengwo ngöghomnyö,

⁶ atasa ngöghomnyengwo ripöto kegh, atasa ripöto kegh mïkukönöt atasa mïkukönötengwo kiwaghata Tororöt,

⁷ atasa kiwaghata Tororöt chomnyo kighonï, atasa chomnyo kighönï, chomnyogh.

⁸ Ato tïkuchoni löwïr ompö chongïn kwighokwa malïkwï körsong anta pich cho puryö akwa, otini konkïtukwa Echotyontenyo Yeso Kristo.

⁹ Wölo chi anka tïkwïl nyo mötïngnye tïkuchoni, kï lata chi nyo karote, nyo merosïtonye lasiny akï nyo kiwutyeghö lö, kiketïlilö ngokichi cho kipö tagh.

¹⁰ Kïlenyona nyu tupchenichu, onoghyenö okilö kegh lasiny atachïchima kuröto Tororöt nko löwönötenyi ompö akwa kwaghïghit, ompöwölo ato aghakwa lenyoni, kïmopïtyinekwanye ngokï nyonikïny.

¹¹ Ompö aranoni onyorunekwa man nyo omuköy ntolït Paytagh nyo pö kokay nyo pö Echotyontenyo akï Sörunintenyo Yeso Kristo.

¹² Nka nyoni omitan ononwokwa ngalechoni kïtenö osis, kïrkegh konkïtökwa, akyachïchïmakwa ompö man nyo kyatakakwa.

¹³ Nyinyan onkït pat angarakakwa mïchinanïn tanana ngalechoni löwïr ato tosöpan.

¹⁴ Onkïtön lö tomönye kite kuwonyö portönyan nyete otïngetan, le wölini kiporwanïn Echotyontenyo Yeso Kristo.

¹⁵ Kïlenyonanyu onoghyonan nyoman ntoporwokwa or nyo onono asïyech ngalechï löwïr ato tenö kyameghan.

Söwi ororyo Kristo

¹⁶ Melö kikïrïpacha kikorön cho kitam pich atanye kikïmitecha kemwowokwa paraku owesyö nko kingwïnata Echotyontenyo Yeso Kristo. Kikïsïweghecha achane konyicho ororyenyi.

¹⁷ Kikïmitecha wölini otini kitö Papo Tororöt nyinte konyït nko ororyö, ato kingwïnchï kut nyo kingwïno nyinte nyo Oror Tya kilö, “Anyï Werïnyan nyo le chamanenyan, nyinte nyoman ongörökinan!”

¹⁸ Kikïlïmacha achane kutinoni kingwïno yïm, otini kikïmitecha nko nyinte kutïngoni tïlil.

¹⁹ Aketïngetecha man ompö lökoy cho kimwowï werkoy. Nyo oghekwa nyo karam ato arïpakwa ngalechoni, ompöwölo karkegh nko kitömöwon nyo lïwuno wölo tuw ntökïtenö kuwas Asisoni akulïwchï mïkuliskökwa löpoyïn pö Kristo le wölo lïwchini kiwasan tapogh pö ngwïny.

²⁰ Wölo nyo wow kïsir, kïmïchini kïpköchokwa lö, möminye chi nyo muköy ompö owesyenyi kegh kïmwa lö kölö ne ngölyon anka tïkwïl nyo pö werköynöno Kikirut.

²¹ Ompöwölo möminye ngölyonto werkoyon nyo le ompö akonga nyo kingwïna machata ptangengmöt, wölo kingalan pich ngölyon nyo kingwïna wölo mi Tororöt otini kintöghoghchini chane Mïkulögh nyo Tïlil.