2 KORINTO 4 - PIPÏLIA

Mökosyo Mïkulögh cho mi tören

¹ Kïlenyona nyu, ompöwölo kakusyonchecha Tororöt akïkonecha ighisyonï, kemitecha kekilöy kegh.

² Kakïpïstecha ngala arasï löwïr cho wïngote. Melö tökepöghisyeghocha lïs anta kïpöghisyeghö ngölyonto Tororöt ompö putintön. Kiportocha man otini kighecha man atöketönöcha sïkunöto chi anka tïkwïl kurwokyecha ompö tawu Tororöt.

³ Kïrkegh köwïngisyö Lökoyechï Karamach kyomtocha, kïwïngisyot pat ompö pich cho mi kupotyot.

⁴ Melö ghönöy chane ompöwölo körchini tororöt pö ngwïnyinï tuwïn pköchintöngwa, atömemï chane kïsïwa löpoyïn pö Lökoy cho Karamach cho pö töroryo Kristo* nyo le kïton pö Tororöt.

⁵ Melö kyomtocha kegh achane, wölo kyomtocha Yeso Kristo nyo le Echotyon, kïchicha achane mötworikwa ompö Yeso.

⁶ Ompöwölo Tororötini nyo kimwa lö, “Nya kulïwunö löpoyïn tuwïn,” nyoni lïwchini mïkulöwecha tökïkonecha löpoyïn pö kinkïtöt nyo pö töroryo Tororöt nyo lïwuno tokochu Kristo.

⁷ Kïlatecha nyu cho kïtïng mökosyononi pö mïkulögh kari tören, atökïrumtö lasiny lö, ngwïno owesyononi wow wölo mi Tororöt amelö ngwïnonecha achane kegh.

⁸ Kinyörilecha kong ompö or anka tïkwïl, wölo tomönye kewanyecha. Kïtomtomönecha, wölo melö meghsonecha mutïnö.

⁹ Kichopecha kong, wölo möminye ato melö kïtïngetecha kingarakat. Akï kïrkegh kakikotönecha kïnomnyö, wölo tomönye kewanyecha.

¹⁰ Kïkösönecha megha Yeso ompö porwöyicho kïnomnyö, atökïrumteghö tïkwïl söpontanyi porwöyicha.

¹¹ Kïmitecha tapanpa meghat ompöwölo kighönecha Yeso kïnomnyö, atökumï söpontanyi tïkwïl kïrumteghö porwöyicha cho wonyot.

¹² Poru nyoni lö pöghisyegho meghat orincha, kïmi söpon kïpöghisyegho orinkwa.

¹³ Mwoghöy Kikirut lö, “Kyangalanan ompöwölo kyaghanan.” Kïtïngetecha mïkulöwunoni pö kighanat. Kïlenyona kïngölonecha.

¹⁴ Kinkïtöcha lö, Tororöt nyo kigh Echotyon Yeso kututï. Kwighecha tïkwïl ketutunö le nyinte, akumïtecha nko akwa kepe tawunyi.

¹⁵ Pö ngalechoni löwïr tösunötenkwa tö ato tasa pöropcho Tororöt kïghömï pich cho chang kuyokyï sörö chane, töroryo Tororöt.

Ketïpï ompö kïghanat

¹⁶ Kïlenyona nyu, melö meghsonecha mutïnö, akï kïrkegh könïnö porwöyicha, kighöy mïkulisköcha kïrelachitu kïtenö osis.

¹⁷ Kïnyorunecha kömpölelut ye atö ipkecha ororyö nyo tïlöy kinonutköcha löwïr, ororyö nyo mötïngnye söröm.

¹⁸ Kïlenyona nyu, mökeros tya tïkwïn cho kïsïwïyi, poto cho melö kïsïwïyi. Ompöwölo pö osis cho ngörï pat tïkwïn cho kïsïwïyi, poto cho melö kïsïwïyi cho pö kokay.