1 TESALONIKE 1 - PIPÏLIA

¹ Kakirwan palalyantanï ante Paulö nko Silpano nko Timoteo. Kikirchinecha pipö kanisa cho mi Tesalonike cho pö Papo Tororöt Akï Pö Echotyon Yeso Kristo.* Nya kïtöpö nko akwa pöropchö nko kalya.

Otöp nko kighanata pipö Tesalonike

² Kiyokyinecha sörö Tororöt kïtenö osis akwompö akwa lapay akenonecha akwa kïtenö osis ompö sowutköcha.

³ Kinonecha ompö tawu Tororöt akï Paponyo ighisyenkwa nyo pö kighanat nko pöghisyo chomnyogh nko chïchïmata kikönötenkwa ompö Echotyontenyo Yeso Kristo.

⁴ Kinkïtöcha tupchenichu cho chömöy Tororöt lö kikïlakwa nyinte alïkuna pikachi.

⁵ Ompöwölo atanye kikïpkanacha kyomwokwa Lökoy cho Karamach, amelö kikyomucha ngal opïn pat, wölo kikyomucha tïkwïl ompö owesyo Mïkulögh nyo Tïlil, akenkïtöcha lö onkïtökwa manto lökoyechoni. Onkïtökwa otöptöncha atanye kikïmitecha nko akwa lö ki ompö tösunötenkwa.

⁶ Kyarïpakwa otöptöncha nko nyo pö Echotyon akï kïrkegh kyowongukwa nyoman, wölo kyatachakwa ngölyontononi ompö ngörekyö nyo kikonokwa Mïkulögh nyo Tïlil.

⁷ Kïlenyona, alïkukwa nyu körkeyïn nyo karam ompö kighönï löwïr cho pö Makedonia nko Akaya.

⁸ Ompöwölo kilïm pich tïkwïl ngaleko kighanatenkwa ompö Tororöt amelö ompö Makedonia nko Akaya kïpoto, wölo kighömï kighanatenkwa nyo otïngetekwa ompö Tororöt wop anka tïkwïl. Melö tökïmi ye nyu machata kemwaghacha kïgh anka ngat.

⁹ Ngölono pich tïkwïl wölo kyataktekwa acha, atanya kikïrutowucha nko wölo kyataghtekwa saghata körkeyïntin, apöghisyechï Tororöt pö man nyo söpöy,

¹⁰ amitö oköngöy Werïnyi nyo ngwïno yïm nyo kigh Tororöt kututunö ngwen, nyoni kï Yeso akï nyinte nyo sörunenecha nörekyo Tororöt nyo ngwïnöy.