1 PÖYTOGHÏ 4 - PIPÏLIA

¹ Kïpayta nyu Solomon koro Israel kïmïkul.

² Achï pikö cho kile yetïntin: Tïsinte kï: Asaria wero Sadok

³ Cho le kikirï kï: Eliorep nko Aiya werpö Sisa Kikirinto tïkwïn kï: Yeosyapat wero Ailud

⁴ Yetïn pö lïk kï: Penaya wero Yeoyada Tïsï kï: Sadok nko Apyatar

⁵ Nyo kighyongchini pöytoghiko korononi kï: Asaria wero Natan Nyo kiruröy pöytoghin kï: Sapud wero Natan

⁶ Nyo kighyongchini mötworï cho kipöghisyegho kö pö pöytoghin kï: Aisyar Nyo kighyongchini sekey kï Adoniram wero Apda.

⁷ Kitïng Solomon pich taman nko odeny cho kighyongchini koroswo Israel, akï pïchoni cho kighömïtu omisyewut cho kipkana koroswekwa cho kipöyitu pöytoghin nko piko katanyi. Kikïchöghchï kighyongtoghin anka tïkwïl kïghamïtï omisyö nyo kimïchï arawa akonga ompö köny akonga.

⁸ Achï kaynötutko pöytoghichoni le taman nko odeny nko koroswechini kighyongchini chane: Penur: koro kamaspa Epraim

⁹ Pendeker: kanastina Makas nko Syaalpim nko Pet Syemes nko Elon nko Pet Anan

¹⁰ Penesed: kanastina Arupot nko Soko nko koro Eper kïmïkul

¹¹ Penapinadap: koro Dor kïmïkul (kip nyinte Tapat chepö Solomon)

¹² Paana wero Ailud: kanastina Tanak nko Mekido nko koros löwïr cho kilekïto Pet Syan cho kilekïtö kanasyanta Saretan okumpö tagh nyo pö kanasyanta Yesrel, akïwö ntökwitïta kanasyanta Apel Meola nko kanasyanta Yokmeam

¹³ Penkeper: kanasyanta Ramot Kiliad nko kanastin cho mïnkech cho mi Kiliad, cho kipö Yair, chi nyo kipö ara Manase nko okumpö Arkop nyo mi Pasyan, kanastin cho echön cho le 60 löwïr, cho kikïtek nïyet akekara ortïnekwa kari taghoy

¹⁴ Ainadap wero Ido: koro Maanaim

¹⁵ Aimaas: koro Naptal (kip Pasemat, chepö Solomon anka)

¹⁶ Paana wero Usyay: koro Asyer nko kanasyanta Pealot

¹⁷ Yeosyapat wero Parua: koro Isakar

¹⁸ Syimey wero Ela: koro Penchamen

¹⁹ Keper wero Uri: koro Kiliad, nyo kökipayta Sion pöytoghinto pipö Amori nko Ok pöytoghinto Pasyan. Ompö pïchoni le taman nko odeny, kimi pöytoghintö akong nyo kighyongchini koro Yuda kïmïkul.

Könyorï paytaghpa Solomon kisoyönöt nyo wow

²⁰ Kïchangit tya pipö Yuda nko Israel, kikarkegh chane nko ngayam cho mi sörömu nanam, kwomisyö akïgheghsyö akïngörekyö.

²¹ Kipayta Solomon punton löwïr, kïngeta lalwa Yuparet ntökwit koro pipö Pilisti akïnam rotyo koro Misri. Kïkwagh surï puntonichoni löwïr akwipchï Solomon. Kigh chane lenyoni kokay otini kitökïsöpöy Solomon.

²² Achï tïkwïn cho kipöghisyegho Solomon asis anka tïkwïl: liten 5,000 cho pö pïsya nko liten 10,000 cho pö nkanun

²³ nko eghin taman cho okwoghöch nko eghin tömönut odeny cho kïronguno achey nko kechir 100 kïsis korinyoyï nko chemïloy nko chemnyökosen nko kokorochöy cho okwoghöch.

²⁴ Kipayta nyinte pipö punton cho kimi lalwa Yuparet okumpö kongasis, kïngeta Tipsa ntökwit Kasa, kimi kalya woptine tïkwïl.

²⁵ Kitïpï pipö Yuda nko cho pö Israel ompö kalya kïngeta Dan ntökwit Persyepa otini kitökïsöpöy Solomon. Kitïng pich löwïr keti sapipun nko cho pö makany.

²⁶ Akitïng Solomon kori angoletin 40,000 cho pö nkarinechi nko pich 12,000 cho pegho angoletin.

²⁷ Kikonu chi anka tïkwïl omisyö kïrïp kegh nko tötut nyo kökiketö chane ompö arawa anka tïkwïl, cho kyomöy pöytoghintö Solomon nko cho kipögho pich löwïr cho kipka kwomisyö katanyi. Kinyorï chi anka tïkwïl omisyö nyo kimököy.

²⁸ Kitötö chi anka tïkwïl ompö pïchoni le taman nko odeny, karerantanyi nyo pö matay nko mopö tïkwïl cho pö angoletino lïk.

²⁹ Kitö Tororöt Solomon ngöghomnyö nko pköchin nyo pö töngönchin nko chïreryö nyo möminye nyo kikongityot tïkwïl.

³⁰ Ki wow ngöghomnyo Solomon kïtïl ngöghomnyo pipö Kongasis, aki wow ngat kïtïl ngöghomnyo pipö Misri.

³¹ Ki ngöghom nyinte kïsir chi anka tïkwï, kïtïl Etan, nyo pö pipö Esrati nko Eman nko Kalkol nko Darda werpö Maol. Kwororit nyinte ompö pipö punton löwïr cho kile pöröriskökwa.

³² Kimwa ngala ngötïnyö cho le 3,000 akïmïn tumwöy cho tïlöy 1,000.

³³ Kingalana pitata ket, kïngeta tarakitpa Lepanon nko isop* nyo pito nïyet nko kyak nko törit nko tyonkïn cho chuto mutïn ngwïny nko kaghagh.

³⁴ Kïpka pipö ngwïny kïmïkul kïter ngöghomnyo Solomon nko cho kipka wölo mi pöytoghi ngwïny cho kilïm ngöghomnyenyi.