Colosenses 1 - TÄ̧DO Ä̧CUÄ̧ I̧HUȨNȨ

Pablo huȩyu̧tu̧ hue'inö iglesia ruhuärö, Colosas ötahuiyänä ka̧cuä̧tö̧rö̧

^1-2 Ttö Pablocu, Diosrö pä̧huä̧ rö̧jo̧mȩnä̧ Jesucristo huȩ'ä̧hua̧mä̧, chö̧jä̧hua̧ Timoteocu huȩyu̧tu̧ hue'ösä pi̧yȩ cuyäru Dios i̧tti̧mö̧rö̧, Cristorö esetätörö, Colosas ötahuiyänä ka̧cuä̧tö̧rö̧. Tä'o Dios ucuturu adiu ppädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu iyäcua'a̧nö̧.

Pablo Jesucristorö esetätörö Diosrö ucuocuinö huȩnȩ

³ Ujutumä 'cuäopönä eseunu ucuocuätöjä Diosrö, Tu̧ru̧hua̧ Jesucristo Jä'orö, ucuturu.

⁴ Ucutu Cristo Jesúsru cuesetätucua'a ä̧ju̧cui̧nä̧tö̧jä̧. Ja̧'hua̧ta̧nö̧ o'ca toi'önä Dios i̧tti̧mö̧rö̧ repecuhuätucua'a ä̧ju̧cui̧nä̧tö̧jä̧.

⁵ Ucutu amöcuädö tta̧'ä̧rä̧tö̧jä̧ adihuä juäi hua'adö ku̧nä̧huä̧ mo̧ro̧jä̧ra̧'a̧ttö̧ cuȩmä̧tu̧cuä̧cuȩ. Ucutumä ja̧'hua̧nö̧ tta̧'ä̧rä̧tö̧jä̧ iso päi'önä huȩnȩ, ttö̧ja̧ suronä jȩttö̧ jȩpö̧ icu huȩnȩ, cuä̧ju̧cuä̧tu̧cuo̧mȩnä̧.

⁶ Ja̧u̧ huȩnȩ, cuä̧ju̧cui̧nä̧tu̧cu̧ huȩnȩ, pi̧jä̧nä̧ o'ca juiyönä rö̧ä̧cha̧'a̧. Ja̧'hua̧ta̧nö̧ ucutu äcuomenä Dios i̧huȩnȩ, iso päi'önä repeähuä huȩnȩ, ä̧ju̧cu̧ jȩcu̧'i̧nä̧tu̧cu̧ ta'anö, pärocuätä amöcuädö jȩpä̧tö̧ korotö'inä.

⁷ Ta̧hua̧ru̧hua̧ Epafras, ujutucu aditömä, adihuä huȩnȩ huo̧juȩti̧nö̧ ucuturu. Ja̧u̧ Cristo hueähuä jȩpö̧, adiu ppä'ädö ucuturu.

⁸ Ja̧'hua̧ta̧nö̧ ja̧u̧ ji'ähuinö ujuturu, ucutu Espíritu Santo ppäda'anä repecuhuätucua'a.

⁹ Ja̧'hua̧nö̧ ja̧'a̧ttö̧ ucuturu tä̧ju̧cui̧no̧mȩttö̧ kä̧mä̧dö̧, 'cuäopönä Diosrö ucuocuätöjä ucuturu. Ujutu jä'epätöjä Diosrö, churutä pä̧huä̧ rö̧jö̧tä̧ u̧huo̧juȩtä̧tu̧cua̧cu̧ pä'ö ucuturu. Ja̧'hua̧ta̧nö̧ jä'epätöjä Diosrö, Espíritu Santo huo̧juȩcuä̧nä̧ o'ca juiyönä huo̧ju̧nä̧ cu̧huo̧juä̧tu̧cuä̧cua̧'a̧nö̧.

¹⁰ Ja̧'hua̧ta̧nö̧ 'cuäopönä Tu̧ru̧hua̧rö̧ pä̧huä̧ rö̧jö̧nä̧ eseunu cu̧ja̧cuä̧tu̧cua̧ pä'ö jä'epätöjä. Ja̧'hua̧ta̧nö̧ korotörö ppä'ädö, adihuä juäi jȩcu̧'ä̧tu̧cuä̧cua̧'a̧nö̧. Diosrö rö̧ä̧chi̧'ö̧nä̧ cu̧huo̧juä̧tu̧cua̧ pä'ätöjä.

¹¹ Ucutu cujuruhuätucua pä'ätöjä chutä adihuä ujurunä, o'ca juiyönä eseunu tta̧'ä̧rö̧ cuami 'qui'ächi'ö cu̧ja̧cuä̧tu̧cuä̧cua̧'a̧nö̧.

¹² Ja̧'hua̧ta̧nö̧ esehuätucui Tä'o Diosrö. Chutä ujuturu aditinö, ujutu'inä tȩa̧u̧nä̧ tȩma̧ pä'ö chutä i̧tti̧mö̧rö̧ iya päinömä.

¹³ Dios ujuturu ejädö icuinö yo̧ö̧ ujuruttu. Ja̧'hua̧ta̧nö̧ chutä I̧tti̧ rȩni̧'a̧rö̧ ujutu Tu̧ru̧hua̧ päi'önä ö̧ja̧ pä'ö hue'inö.

¹⁴ Ja̧u̧ 'corupäi'omenä, ujutu suronä jȩtö̧ jȩpö̧ icuinö.

Cristo 'corupäi'omenä, Dios eseäcuähuä iyinö ujuturu

¹⁵ Dios yoröiso uhuäpocömä, I̧tti̧ pi̧jä̧ra̧'a̧ ichomenä, Dios a̧'cua̧rö̧nä̧ uhuäpinödo. Ja̧u̧mä̧ yoröiso o'ca juiyönä äcuomenä ki̧nö̧do.

¹⁶ Ja̧u̧mä̧, o'ca juiyönä mo̧ro̧jä̧nä̧ ka̧cu̧'i̧nä̧, pi̧jä̧nä̧ ka̧cu̧'i̧nä̧ aditinödo. Ja̧'hua̧ta̧nö̧ o'ca juiyönä totocö'inä, totö'inä aditinödo. Ja̧'hua̧ta̧nö̧ o'ca juiyönä hueähuä'inä, hue'ähuotö'inä, pi̧jä̧ isoppanä huȩ'ä̧rä̧tö̧rö̧'i̧nä̧ aditinödo. Ja̧u̧ o'ca juiyönä aditinödo esehua pä'ö.

¹⁷ Cristomä o'ca juiyönä aditinö ä'canä ki̧nö̧. Ja̧u̧ o'ca juiyönä hueähuä i̧sa̧ kö̧.

¹⁸ Ja̧'hua̧ta̧nö̧ ja̧u̧mä̧, Cristomä, o'ca toi'önä ja̧u̧ru̧ esetätörö, ja̧u̧ jä̧ttä̧pä̧ya̧ huotörö, Tu̧ru̧hua̧ päi'önä kö̧. Ja̧u̧ jahuätörö tta̧'cua̧rö̧ iyö. Ja̧u̧ hua'arettö ä'canä tto'ächinö. Ja̧'hua̧nö̧ ja̧'a̧ ja̧u̧ o'ca juiyönä ä'canä ö̧jä̧cua̧.

¹⁹ Diosmä ja̧'hua̧nö̧ hue'inö I̧tti̧rö̧, chutä jö̧ ta'anö ö̧ja̧ pä'ö.

²⁰ Ja̧'hua̧nö̧ ja̧'a̧ttö̧ Diosmä o'ca juiyönä pi̧jä̧nä̧ ka̧cu̧'i̧nä̧, mo̧ro̧jä̧nä̧ ka̧cu̧'i̧nä̧ ttesehuarö pä'inödo. Ja̧'hua̧nö̧ ja̧'a̧ttö̧ Cristo dau isodänä 'corupäi'omenä, eseäcuähuä iyinödo.

^21-22 Pä'äjimä ucutu Diosrö cuamöcuädätucumä oto huinätöjä. Yoröiso suronä amöcuädö jȩcu̧'ä̧tu̧cua̧'a̧ttö̧, Dios aboiyotö pi̧nä̧tö̧jä̧. Ja̧'hua̧nö̧ ja̧'a̧ttö̧ ucutu'inä cuesehuätucuarö pä'ö hue'inö, Cristo ubara ttu'u 'corupäi'omenä. Ja̧u̧ ja̧'hua̧nö̧ jȩpi̧nö̧, ucuturu chutä ä'ca jo̧mȩ adiu cu̧ja̧cuä̧tu̧cua̧ pä'ö, yoröiso surojö juiyönä.

²³ Ja̧'hua̧nö̧ ja̧'a̧nä̧ dau po'tiyä 'quiyönä 'chuhuädö'a̧nö̧, adiu esetätucui. Jarocuhui'ätucuä' adiu tta̧cu̧huä̧rä̧tu̧cu̧ huȩnȩ, ttö̧ja̧ suronä jȩttö̧ jȩpö̧ icu huȩnȩ. Ja̧u̧ huȩnȩ pi̧jä̧ pa̧ja̧cu̧nä̧ ji'ähuätö. Ttö'inä, Pablo, ji'äusä ja̧u̧ huȩnȩ.

Pablo Diosrö esetätörö ppädinö huȩnȩ

²⁴ Jitä ucuturu ppä'ädö, eseunu ubara ttu'usä. Ttömä ja̧'hua̧nö̧ ubara ttudomenä, Cristo jä̧ttä̧pä̧ya̧ huotörö, churutä esetätörö, ppä'ädö ubara ttuhuinö ta'anö, ttö'inä ppä'ädö ubara ttu'usä.

²⁵ Ttö iglesia ruhuärö ppä'ädö adicuä i̧sa̧sä̧. Dios hueäcusä, ucuturu adiu ppä'ädö jidähua pä'ö o'ca juiyönä chutä i̧huȩnȩ.

²⁶ Ja̧'hua̧ta̧nö̧ koro yoröiso ttieru huȩnȩ, tä̧do̧tö̧ mi̧nä̧ ttieruhuinö huȩnȩ, jidähua pä'ö hue'inö. Ja̧u̧ huȩnȩ jitä Dios iyö chutä i̧tti̧mö̧rö̧.

²⁷ Dios judíos huocotörö ja̧u̧ ttieru huȩnȩ, adiu eseäcuähuä huȩnȩ, jiähua pä'inö. Pa̧'a̧nö̧ päa'a ja̧u̧ huȩnȩ: “Cristomä cuami iso'quinä kö̧. Ja̧u̧ru̧ tta̧'ä̧rö̧ ja̧u̧tä̧cu̧ cuesehuäcuähuäcuotöjä pä'ö.”

²⁸ Ujutumä Cristo i̧huȩnȩ ji'ähuätöjä. Ujutumä tä̧bo̧tö̧ huo̧juȩtä̧tö̧jä̧ o'ca toi'önärö, adiu ttu̧huo̧jui̧'ä̧cua̧'a̧nö̧. Ja̧'hua̧nö̧ huo̧juȩtä̧tö̧jä̧ o'ca toi'önä Dios ä'ca jo̧mȩttö̧ adiu ttesetäcua'a̧nö̧ Cristorö.

²⁹ O'ca juiyönä chujuru Cristo iya'attö, ja̧'hua̧nö̧ aditö rohuäusä.