توریت شریف: پَیدایش 50 - Mirpuri-Pahari Bible1 جدوں او انتقال کری گئے، تے حضرت یُوسف اپݨے پیؤ نے مُونہ نال لغی کے بہُوں روئے تے اُنہاں کی بوسہ دِتا۔ 2 اُنہاں اپݨے مُلازم حکیماں کی اپݨے پیؤ نی لاش کی محفوظ کرنے واسطے مصالحہ لاݨے نا حُکم دِتا۔ فِر حکیماں اِسرح ہی کِیتا. 3 اِس پر پوری چالی دیہاڑے لغے، کِیئانکہ مصالحہ لاݨے وِچ اِتنے ہی دیہاڑے لغݨے. مصری لوکاں پورے سہتر دیہاڑے ماتم کِیتا۔ 4 جس ویلے ماتمے نے دیہاڑے گُزری گئے، تے حضرت یُوسف فرعون نے درباریاں کی آخیا، «جے تُساں مہاڑے پر مہربانی کرو، تے فرعون اگے عرض کرو کہ 5 ”مہاڑے پیؤ مہاڑے کولوں قسم کِہندی کہ میں مرنے آلا آں. توں مِکی مہاڑی قبرے وِچ دَبیاں، جیہڑی مُلخ کَنعان وِچ میں اپݨے واسطے کھݨوائی سی۔ اِس واسطے ذرا مِکی اجازت دیو کہ میں اُتھے جائی کے اپݨے پیؤ کی دَبی شوڑاں تے فِر میں مُڑی کے آئی جاساں۔» 6 فرعون آخیا، «جائی کے اپݨے پیؤ کی جس طرح اُس تُکی قسم دَوائی سی، اُس جغہ وِچ دبی شوڑ۔» 7 فِر حضرت یُوسف اپݨے پیؤ کی دبݨے واسطے روانہ ہوئے. فرعون نے سارے درباری، اُنہاں نے بزرگ، تے مُلک مصر نے بزرگ، 8 حضرت یُوسف نے کہرے نے سارے لوک، اُنہاں نے پہراہ، تے اُنہاں نے پیؤ نے کہرے نے بندے وی اُنہاں نال گئے. صرف اُنہاں نے اپݨے بال بچے پہڈاں، بکریاں، گانئیاں تے داند جوشن نے علاقے وِچ رہی گئے۔ 9 اُنہاں نال ٹانگے تے گہوڑسوار وی گئے، تے اِس طرح اے بہُوں بڑا جلوس سی۔ 10 جدوں او اتد نامی بندے نی کݨک گہاݨ آلی جغہ تک پُہچے جیہڑی دریائے اُردن نے پار اے، تے اُتھے اُنہاں اُچی تے دردناک واز وِچ ماتم کِیتا. حضرت یُوسف نا اے ماتم ست دیہاڑے تک سی۔ 11 جس ویلے اُس مُلخے نیاں لوکاں، یعنی کنعانیاں، اتد نے کݨک گہاݨ آلی جغہ وِچ اُس طرح نا ماتم تکیا، تے آخݨ لغے، «اے مصریاں نا اِک بہُوں ہی دردناک ماتم اے۔» اِس واسطے او اُس جغہ کی، جیہڑی دریائے اُردن نے پار اے، ابیل مصریم آخݨ لغے، مطلب مصریاں نی ماتم نی جغہ۔ 12 حضرت یعقُوب نیاں پُتراں اِسے طرح کِیتا جس طرح اُنہاں نے پیُؤ اُنہاں کی وصیت کیتی سی: 13 اُنہاں اُس کی مُلخ کَنعان وِچ آݨی کے ممرے نے سامݨے مکفیلہ نی باڑی نے غارے وِچ دبی شوڑیا، جس کی حضرت ابراہیئم باڑی سمیت ہتی قبِیلے نے عِفرون نامی بندے کولوں خریدی کے قبرستان واسطے اپݨی ملکیت بݨائی سی۔ 14 اپݨے پیؤ کی دبݨے تُوں بعد، حضرت یُوسف، اُنہاں نے پہراہ، تے سارے لوک جیہڑے جنازے نال گئے سݨ، مصر مُڑی آئے۔ 15 جدوں حضرت یُوسف نے پہراواں تکیا کہ اُنہاں نا پِیؤ مری گیا اے، او آخݨ لغے کہ ”شائد ہݨ یُوسف اساں نال دُشمݨی کرے، تے او ساری بُرائی جیہڑی اساں اُس نال کیتی سی، اُس نا پُورا پورا بدلہ کِہنے.“ 16 اِس واسطے اُنہاں حضرت یُوسف کی اے سنیہا پہیجیا، «تُساں نے پیؤ اپݨے مرنے تُوں پہلے اے حکم دِتا سی، 17 تُساں یُوسف کی اے آخیا کہ میں تُکی آخݨاں: تُوں اپݨے پہراواں نے غلط کم تے دوئے غناہ، یعنی جیہڑا اُنہاں تہاڑے نال مندا کِیتا سی، بخشی شوڑ۔ ہُݨ تُساں اپݨے پیؤ نے خُدا نے بندیاں نی غلطی معاف کری شوڑو۔» اُنہاں نی اے گل سُݨی کے حضرت یُوسف روݨ لغی پئے۔ 18 فِر اُنہاں نے پہرآ اچھی کے اُنہاں نے پیراں وِچ ٹہٹھے تے آخݨ لغے، «تکو! اساں تُساں نے غُلام آں۔» 19 پر حضرت یُوسف اُنہاں کی آخیا، «تُساں ناں ڈرو! میں خُدا ناں! 20 بے شک تُساں تے مہاڑے نال بدی کرنے نا ارادہ کِیتا سی. پر اللّٰہ تعالیٰ اُس تُوں نیکی بناݨے نا اِرادہ کری شوڑیا سی، تانکہ بہُوں لوکاں نی جان بچی رہے، تے اَج نے دیہاڑے اے ہی ہوݨا پیا۔ 21 اِس واسطے تساں ناں ڈرو! میں تُساں نی تے تُساں نیاں بال بچیاں نی پرورش کرنا رہساں۔» اِس طرح اُنہاں اپݨیاں نرم گلاں نال اُنہاں کی تَسلی دِتی۔ 22 حضرت یُوسف تے اُنہاں نے پیؤ نے کہرے نے لوک مصر وِچ ہی رہݨے رہے. تے حضرت یُوسف اِک سو دَس سال نی عمر کِہنی کے جِیݨے رہے۔ 23 اُنہاں افرائیم نی اولاد ترَے پُشتاں تک تکی، تے مَنَسّی نے پُتر مکیر نی اولاد وی حضرت یُوسف نی اولاد وِچ شامل ہوئی گئی۔ 24 فِر اِک دیہاڑے حضرت یُوسف اپݨے پہرواں کی آخیا، «میں مرنے آلا آں! اللّٰہ تعالیٰ یعقیناً تُساں نی مدد کرسی، تے تُساں کی اِس مُلخے وِچوں اُس مُلخے وِچ پُہنچاسی، جس نے دیݨے نی خُدا پیؤ یعقُوب ، دادے اسحاق، تے پڑدادے ابراہیم نال قسم کھادی سی۔» 25 حضرت یُوسف اُنہاں کولوں قسم کہنی کے آخیا، «رب ضرور تُساں نی مدد کرسی، تے تُساں ضرور مہاڑی لاش کی اِتھوں کہنی جُلیائے۔» 26 فِر حضرت یُوسف اِک سو دَس سال نے ہوئی کے مِصر وِچ فوت ہوئی گئے. مصریاں اُنہاں نی لاش پر مصالحہ لایا، تے اُس کی اِک پیٹی وِچ رَخیا۔ |