توریت شریف: پَیدایش 45 - Mirpuri-Pahari Bible1 اے سُݨی کے حضرت یُوسف اُنہاں ساریاں بندیاں نے سامݨے جیہڑے اُنہاں کول کھلتے وے سݨ آپے کی سنبھالی نی سکے، تے اپݨے کہرے نے ملازمے کی اُچی آواز وِچ حُکم دِتا، «مہاڑے کولوں اِنہاں ساریاں بندیاں کی باہر کڈی شوڑ!» تے فِر جس ویلے سارے گئے، تے حضرت یُوسف اپݨے پہراواں پر ظاہر کِیتا کہ میں کوݨ آں۔ 2 فِر حضرت یُوسف زور زور نال روݨ لغے، تے اِتنا روئے کہ مصریاں روݨ نی واز سُݨی، تے فرعون نے محل تک وی پتہ لغی گیا۔ 3 حضرت یُوسف اپݨیاں پہراواں کی آخیا، «میں یُوسف آں! کَے مہاڑا پیؤ جِیݨا؟» پر اُنہاں نے پہرآ اُنہاں کی کوئی جواب ناں دیئی سکے، کِیئانکہ او اُنہاں نے رُعب توں بہُوں ڈری گئے سݨ۔ 4 حضرت یُوسف اپݨے پہراواں کی آخیا، «مہاڑے نیڑے اچھو۔» جدوں او سارے نیڑے آئے، تے فِر اُنہاں آخیا، «میں تُساں نا پہرآ یُوسف آں، جِسی تُساں بیچی کے مصر پہیجیا سی۔ 5 اِس گل توں تُساں غمگین ناں ہووو، تے اپݨے اپر اِس گل نا اِلزام ناں لاؤ کہ تُساں مِکی بیچی شوڑیا سی، کِیئانکہ زندگیاں بچاݨے واسطے اللّٰہ تعالیٰ مِکی تُساں کولوں اگے اِتھے پہیجھی شوڑیا سی۔ 6 اِس واسطے کہ دوآں سالاں توں اِس مُلخے وِچ قحط اَے، تے ہور پنجاں سالاں تک رہسی، جنہاں وِچ ناں تے ہل ماریا جاسی تے ناں فصل کپی جاسی۔ 7 اللّٰہ تعالیٰ مِکی تُساں کولوں اگے پہیجیا سی، تاںکہ تُساں تے تُساں نیاں اچھݨے آلیاں نسلاں زمین پر زِندہ رہݨ، تے اِس حیرت انگیز طریقے نال مرنے تُوں بچی جاݨ۔ 8 مِکی تساں نی، بلکہ اللّٰہ تعالیٰ اِتھے پہیجیا سی. اُس مِکی فرعون نا عظیم وزیر، تے اُس نے سارے کہرے نا مالک، تے سارے مُلخے مِصر نا حاکم بݨائی شوڑیا اَے۔ 9 بس، ہُݨ تُساں تاولے جائی کے مہاڑے پیؤ کی دسو کہ تُساں نا پُتر یُوسف اِس طرح آخݨا کہ اللّٰہ تعالیٰ مِکی سارے مُلخے مصر نا مالک بݨایا اے. تُساں مہاڑے کول آئی جاؤ تے دیر ناں کرو۔ 10 تُساں جَوشن نے علاقے وِچ رہی سکݨے او، تے تُساں نی آل اولاد، تُساں نیاں پہڈاں، بکریاں، گاںئیاں، داند، تے تُساں نا سارا مال مہاڑے نیڑے ہوسی۔ 11 اُتھے ہی میں تُساں نی دیخ پہال کرساں، تانکہ اِس طرح ناں ہووے کہ تُساں تے تُساں نے کہرے آلے کوئی کمی محسوس کرو، کِیئانکہ قحط زیادہ پنج سال ہور رہسی۔» 12 تُساں آپوں، تے تُوں مہاڑا پہرا بن یامِین، تکی سکݨے او کہ میں یُوسف ہی آں جیہڑا تُساں نال گل کرنا پیا. 13 تُساں مہاڑے پیؤ کی مہاڑی ساری شان و شوکت جیہڑی مصر وِچ مِکی لبھی اَے تے جیہڑی تُساں تکی اے، سارا کُج دسو۔ تے تُساں تاولے مہاڑے پیؤ کی مہاڑے کول کہنی آݨو.» 14 فِر او اپݨے پہراؤ بن یامیں نے گَلے نال لغی کے روئے، تے بن یامِین اُنہاں نے گلے نال لغی کے رویا۔ 15 فِر اُنہاں ساریاں پہراواں کی پیار دِتا تے اُنہاں نال گلے لغی کے روئے، تے فِر پہرآ اُنہاں نال گلاں کرݨ لغے۔ 16 فرعون نے محل وِچ اِس گل نا ذکر ہویا کہ حضرت یُوسف نے پہرآ آئے وے، تے فرعون تے اُس نے درباری بہُوں خوش ہوئے۔ 17 فِر فرعون حضرت یُوسف کی آخیا، «اپݨے پہراواں کی اے آخو کہ ”تُساں اپݨے ڈنگراں کی لدی کے مُلخ کَنعان وِچ مُڑی جاؤ۔ 18 اپݨے پیؤ تے اپݨے اپݨے کہرے آلیاں کی کہنی کے مہاڑے کول آئی جاؤ، تے جیہڑا مُلخ مصر وِچ چنگے توں چنگا عِلاقہ اَے، تُساں کی میں دیساں، تے تُساں اِس مُلخے نیاں چنگیاں چنگیاں چیزاں کھائی سکسو.“ 19 تُوں اُنہاں کی اے ہِدایت وی دے کہ ”تُساں اپݨے بال بچیاں واسطے تے اپݨیاں زناݨیاں واسطے مُلخ مصر وِچوں گڈیاں نال کھڑو، تے اپݨے پیؤ کی وی نال کہنی اچھو۔ 20 اپݨے مال و اسباب نا کج فکر ناں کرو، کِیئانکہ مصر وِچ چنگے توں چنگا عِلاقہ تُساں کی لبھسی.“» 21 جضرت یعقُوب نیاں پتراں اِس طرح ہی کِیتا. تے حضرت یُوسف فرعون نے آخݨے تے اُنہاں کی سواری واسطے گڈیاں دِتیاں، تے سفری سامان وی دِتا۔ 22 حضرت یُوسف اُنہاں وِچوں ہر اِک کی اِک اِک جوڑا کپڑیاں نا دِتا، پر بن یامِین کی چاندی نے ترَے سو سکے تے پَنج کپڑیاں نے جوڑے دِتے۔ 23 حضرت یُوسف اپݨے پیؤ واسطے دس کھوتے چنگیاں چنگیاں چیزاں نال لدی کے پہیجے، تے دس کھوتیاں وی پیجیاں جیہڑیاں اِناج، روٹی تے پیؤ نے سفری سامان نال لدیاں ویاں سݨ۔ 24 فِر اُنہاں اپݨے پہراواں کی روانہ کری کے آخیا، «تکو، کہ رائے وِچ لڑائی چہگڑا ناں کریائے!» 25 فِر او مصر توں ٹری گئے، تے مُلخ کَنعان وِچ اپݨے پیؤ حضرت یعقُوب کول پُہچے، 26 تے اُنہاں آخیا، «اللّٰہ تعالیٰ نا شُکر اے یُوسف ہالے تک زندہ ہی اے! تے سارے ملخ مصر نا حاکم او ہی اَے!» اے سُݨی کے حضرت یعقُوب نا دل اِک دم تَہڑکی گیا، کِیئانکہ اُنہاں کی اِس گل پر یقین نی سی اچھݨا پیا۔ 27 فِر جس ویلے پُتراں او ساریاں گلاں جہڑیاں حضرت یُوسف اُنہاں کی دسیاں سݨ اپݨے پیؤ نال کیتیاں، تے جس ویلے حضرت یعقُوب او گڈیاں تکیاں جہڑیاں حضرت یُوسف اُنہاں کی آݨنے واسطے پہیجیاں سݨ، تے بس فِر اُنہاں نی جانی وِچ سَہ پئی گیا۔ 28 او آخݨ لغے، ”بس، ہُݨ مِکی یقین ہوئی گیا کہ مہاڑا پُتر یُوسف جِیݨا۔ تے میں مرنے تُوں پہلے جائی کے اُس کی ضرور تکساں۔» |