توریت شریف: پَیدایش 44 - Mirpuri-Pahari Bible1 حضرت یُوسف اپݨے کہرے نے ملازمے کی حکم دِتا، «اِنہاں بندیاں نیاں بوریاں وِچ جِتنا غلہ کھڑی سکݨ پہری کے چائی دے، تے ہر بندے نے نقد پیسے وی اِنہاں نیاں بوریاں نے مونہیں وِچ بائی سٹ۔ 2 تے مہاڑے چاندی نا پیالہ ساریاں کولوں نِکے نی بوری نے موئیں وِچ اُس نے نقد پیسیاں نال رخی شوڑ۔» فِر اُس بندے حضرت یُوسف نے آخݨے نے مطابق کِیتا۔ 3 سویلے لَوہ ہوݨیاں ہی سارے بندے اُنہاں نیاں کھوتیاں سمیت روانہ کِیتے گئے۔ 4 او شہرے وِچوں نکلی کے زیادہ دُور وی نی گئے سݨ کہ حضرت یُوسف اپݨے کہرے نے ملازمے کی آخیا، «جلدی کر! اُنہاں لوکاں نے پِچھے جا، تے پُہنچی کے آخ کہ ”تُساں نیکی نے بدلے وِچ بُرائیاں کِیئاں کرنے او؟ تُساں مہاڑا چاندی نا پیالہ کِیئاں چھپایا؟ 5 اے او ہی پیالہ نی جس وِچ مہاڑے مالک پیݨے اݨ، تے اُس نی وجہ نال او فال وی کڈݨے اݨ؟ تُساں جو کُج کِیتا، پہیڑا کیتا۔“» 6 او ملازم جِسلے اُنہاں کول پُہنچیا، تے اُس اُنہاں نال اے ساریاں گلاں کیتیاں۔ 7 فِر اُنہاں اُس بندے کی آخیا، «اَساں نے مالک، تُساں اِیئے جہیاں گلاں کِیئاں کرنے او؟ اللّٰہ تعالیٰ ناں کرے کہ اساں تُساں نے خادم اِیئے جہیا کم کَراں! 8 تکو! جیہڑے نقد پیسے اَساں کی اپݨیاں بوریاں نے مونہیں وِچ لبھے سݨ، اُنہاں کی اُس مُلخے کَنعان وِچوں تساں کول موڑی کہنی آئے آں۔ فِر تُساں نے مالکے نے کہروں اساں سونا یا چاندی کِیئاں چھُپاں یے؟ 9 تکو! اَساں وِچوں کُسے کولوں وی اے نِکلی اچھَے، تے اُس کی ماری شوڑیا جائے، تے اَساں وی تُساں نے غلام ہوئی جاساں۔» 10 اُس آخیا، «تُساں جِسرح آخݨے او، اُسے طرح ہی سہی! جِس کولوں وی پیالہ نکلی آیا، او مہاڑا غلام ہوسی، تے باقی بے غُناہ سمجھے جاسݨ۔» 11 تاں فِر اُنہاں تاول کیتی تے اپݨیاں اپݨیاں بوریاں زمین اپر لَوائی کے کھولیاں۔ 12 فِر ملازم بوریاں وِچ لوڑݨ لغی پیا، پہلے ساریاں کولوں بڑے نی تلاشی شروع کیتی، تے ساریاں کولوں نِکے پر ختم کیتی. تے پیالہ بن یامِین نی بوری وِچوں لبھی گیا! 13 اے تکی کے ساریاں غمیں نال اپݨے کپڑے پھاڑے، تے اپݨے کھوتے لَدی کے مُڑی شہر در گئے۔ 14 فِر یہوداہ تے اُس نے پہرآ حضرت یُوسف نے کہار پُہنچے، تے اِس ویلے تک حضرت یُوسف اُتھے ہی سݨ۔ تے او سارے اُنہاں نیاں پَیراں وِچ ٹہٹھے۔ 15 حضرت یُوسف اُنہاں کی آخیا، ”تُساں اے کَے کیتا؟ تُساں کی پتہ نی سی کہ مہاڑے جیا بندہ فال کڈی سکݨا؟» 16 یہُودہ جواب دِتا، «جناب عالی، اساں تُساں کی کَے آخاں؟ اساں کے گل کراں؟ یا کِس طرح آپے کی بری کرواں؟ اللّٰہ تعالیٰ تُساں نے خادماں نی غلطی پغڑی کِہندی اے۔ تکو! اساں وی، تے او وی جس کولوں پیالہ نکلیا، سارے تُساں نے غلام آں۔» 17 فِر حضرت یُوسف آخیا، «اللّٰہ تعالیٰ ناں کرے کہ میں اِس طرح کراں۔ جس بندے کولوں پیالہ نکلیا سی، او ہی بندہ مہاڑا غلام ہوسی، تے باقی اپݨے پیؤ کول خیری نال جاؤ۔» 18 تاں فِر یہُودہ اُنہاں نے نیڑے جائی کے آخݨ لغا، «جناب عالی، اپݨے خادم کی اجازت دیو کہ تُساں کی اِک گل آخاں. تُساں مہاڑے پر غصہ ناں کرو، کِیئانکہ تُساں وی بادشاہ سلامت نی طرح او۔ 19 عالی جاہ! تُساں سوال کِیتا سی کہ اَساں نا پیؤ یا پہرآ اَے؟ 20 تے اَساں تُساں کی دسیا سی کہ اَساں نا اِک بُڈھا پیؤ اے، تے اُس نے بُڑھاپے نا اِک نِکا پُتر وی اَے، تے اُس نا سکا پہرآ مری گیا سی، تے او اپݨی ماؤ نا کہلا پُتر رہی گیا سی. اِس واسطے اُس نا پیؤ اُس پر جان وارنا۔ 21 فِر تُساں اساں کی آخیا کہ تُساں اُس کی مہاڑے کول کہنی اچھو کہ میں آپوں اُس کی تکاں. 22 جناب عالی، اَساں تُساں کی دسیا سی کہ او مُنڈا اپݨے پیؤ کی کہلا نی چھوڑی سکݨا. جے اپݨے پیؤ کی چھوڑسی، تے اُس نا پیؤ مری جاسی. 23 پر تساں اساں کی آخیا کہ جس ویلے تک تُساں نا نکا پہرآ تُساں نال ناں اچھسی، تے تُساں مہاڑا مُونہ فِر کدے ناں تکسو. 24 فِر اِس طرح ہویا کہ جِسلے اساں اپݨے پیؤ کول جیہڑا تُساں نا خادم اَے پہنچے، تے جو کُج تُساں آخیا سی اساں او سارا اُنہاں کی دسی شوڑیا۔ 25 کُج مُدت تُوں بعد اَساں نا پیؤ آخݨ لغا کہ تُساں فِر جاؤ تے اساں واسطے کُج ہور غلہ خریدی کے کِنہی اچھو. 26 اَساں اپݨے پیؤ کی آخیا سی کہ اساں ناں جائی سکݨے۔ جے اَساں نا نکا پہرآ اَساں نال جاسی، تے اَساں تاں جاساں۔ کِیئانکہ جس ویلے تک اَساں نا نِکا پہرآ اَساں نال ناں ہوسی، اَساں اُس بندے نا مُونہ ناں تکی سکݨے. 27 تُساں نے خادم مہاڑے پیؤ اَساں کی اے آخیا کہ تُساں کی پتہ اَے کہ مہاڑی زناݨی راحل وِچوں مہاڑے دو ہی پُتر سݨ۔ 28 اِک مِکی چھوڑی گیا اَے، تے مہاڑے خیالے وِچ او ضرور چِیریا پھاڑیا گیا ہوسی. میں اُس ویلے توں اِس ویلے تک اُس کی نی تکیا۔ 29 ہُݨ جے تُساں اِس کی وی مہاڑے کولوں کہنی جاسو تے فِر اُس پر کوئی آفت آئی، تے تساں مِکی بُڈھے کی غمے نال قبرے وِچ پُہنچاسو. 30 یہُودہ اپݨی گل جاری رخی، ”جناب عالی، ہُݨ جے میں تُساں نے خادم مہاڑے پیؤ کول مُڑی کے جاں، 31 تے او تکݨ کہ مُنڈا مہاڑے نال کوئی نی، تے او مری جاسݨ. اُنہاں نی زندگی اتنی زیادہ اِس مُنڈے نی زندگی پر منحصر اے، کہ اساں نی اِیئے جہئی حرکت تُوں اِس بُڈھی عمر وِچ او غمے نال قبر وِچ پہنچی جاسݨ. 32 تے میں تساں نا خادم اپݨے پیؤ اگے اِس مُنڈے نا ضمانتی وی آں، تے میں اپݨے پیؤ نال اے اقرار وی کِیتا سی کہ جے میں اِس مُنڈے کی تُساں کول موڑی کے ناں آݨاں، تے میں ہمیشہ واسطے تُساں نا غنہگار ہوساں! 33 اِس واسطے ہُݨ میں تُساں اگے عرض کرساں کہ اِس مُنڈے نے بدلے وِچ میں اپݨے جناب نا غلام ہوئی کے اِتھے ہی رِہی جاݨا آں، تے اِس مُنڈے کی اپݨے پہراواں نال جاݨے نی اجازت دیو. 34 اِس مُنڈے بغیر میں کیہڑا مُونہ کہنی کے اپݨے پیؤ کول جاساں؟ کدے اِس طرح ناں ہووے کہ مِکی او مصیبت تکݨی پئے جیہڑی مہاڑے پیؤ اپر اچھے۔» |