توریت شریف: پَیدایش 42 - Mirpuri-Pahari Bible1 جدوں حضرت یعقُوب کی پتہ لغا کہ ملخے مصر وِچ غلہ اَے، تے فِر اُنہاں اپݨیاں پُتراں کی آخیا، ”تُساں کِیئاں اِک دوئے نا مُونہ تکݨے او؟ 2 میں سُݨیا کہ مُلخے مصر وِچ غلہ اَے۔ تُساں اُتھے جاؤ، تے اُتھوں اَساں واسطے غلہ خریدی کے کہنی اچھو، تانکہ اساں وی جِیݨے رہاں، مَراں نہ۔» 3 فِر حضرت یُوسف نے دس پہرآ غلہ کہنݨے واسطے مصر گئے۔ 4 پر حضرت یعقُوب حضرت یُوسف نے سکے پہراؤ بن یامِین کی اُنہاں نے نال نی پہیجیا، کِیئانکہ اُنہاں کی ڈر سی کہ ”کُدرے اِس پر کوئی مُصِیبت ناں اچھے۔» 5 فِر جیہڑے لوک غلہ خریدݨے واسطے آئے، اُنہاں نال حضرت یعقُوب نے پُتر وی آئے، کِیئانکہ ملخے کَنعان وِچ وی قحط سی- 6 حضرت یُوسف مُلخے مصر نے حاکم سݨ، تے او ہی سݨ جیہڑے ساریاں لوکاں کی غلہ بیچݨے سݨ۔ حضرت یُوسف نے پہراواں اچھی کے اُنہاں اگے زِیمی پر چُہکی کے سلام کیتا۔ 7 حضرت یُوسف اپݨیاں پہراواں کی تکی کے سیاݨی کہندا، پر او اپݨیاں پہراواں اگے اَنجان بݨے، تے اُںہاں کولوں سختی نال پُچھیا، ”تُساں کُتھوں آئے او؟» اُنہاں جواب دِتا، ”اساں ملخ کَنعان توں غلہ خریدݨے واسطے آئے آں۔» 8 حضرت یُوسف اپݨیاں پہراواں کی سیاݨی کہندا، پر اُنہاں حضرت یُوسف کی نی سیاݨیا۔ 9 فِر حضرت یُوسف اُنہاں خواباں کی یاد کِیتا، جیہڑے اُنہاں اِنہاں نے بارے وِچ تکے سݨ، تے آخݨ لغے، ”تُساں جاسوس او، تے تساں اے تکݨے واسطے آئے او کہ ساڑا مُلخ کیہڑیاں جغاں پر غیر محفُوظ اے!» 10 اُنہاں حضرت یُوسف کی آخیا، ”جناب، بِلکُل نی! اساں تُساں نے غلام، غلہ خریدݨے واسطے آئے آں! 11 اساں سارے اِک ہی آدمی نے پُتر آں، تے اساں دیانت دار آں، جاسوس ناں۔“ 12 حضرت یُوسف آخیا، ”نہ! تساں اے تکݨے واسطے آئے او کہ ساڑا مُلخ کیہڑیاں جغاں پر غیر محفُوظ اے.» 13 فِر اُنہاں آخیا، ”اساں تُساں نے باراں غلام اِک ہی بندے نے پُتر آں، جیہڑا ملخے کَنعان وِچ رہݨا اے۔ اَساں نا ساریاں کولوں نِکا پہرا اِس ویلے اَساں نے پیؤ کول اے، تے اِک ہور وی سی، پر او نی رہیا۔» 14 فِر حضرت یُوسف اُنہاں کی آخیا، ”میں تُساں کی آخݨا تے پیا آں، کہ تُساں جاسوس او۔ 15 تے فرعون نی قَسم اے کہ تُساں اِتھوں جائی ناں سکݨے، جدوں تک تُساں نا ساریاں کولوں نِکا پہرآ اِتھے ناں آئی جائے. تے اے ہی تُساں نے آزماݨے نا طریقہ اے: 16 تُساں وِچوں اِک کوئی جائی کے اُس پہراؤ کی کہنی اچھے، تے اُس نے اچھݨے تک باقی قید وِچ ڈکے رہسو، تانکہ تُساں نیاں گلاں نا ثبوت ہوئی جائے کہ تُساں سچے او۔ نی، تے فرعون نی قسم تُساں ضرور جاسوس او۔» 17 حضرت یُوسف ساریاں کی ترَے دیہاڑیاں تک قید کری شوڑیا۔ 18 فِر ترِیئے دیہاڑے حضرت یُوسف اُنہاں کی آخیا، ”تُساں اِک کم کرو تے جـِیݨے رہسو، کِیئانکہ مِکی خُدا نا خوف اے: 19 جے تُساں سچے او، تے تُساں اپݨیاں پہراواں وِچوں اِک کی قید خانے وِچ ہی رہݨ دیو، تے باقی اپݨے پُہکھے کہار آلیاں واسطے غلہ کھڑو۔ 20 تے اپݨے ساریاں کولوں نِکے پہراؤ کی مہاڑے کول کہنی اچھو، اِس طرح تُساں نیاں گلاں نی تصدیق ہوئی جاسی، تے تُساں نہ مَرسو۔» اُنہاں مانی کِہندا، 21 تے آپس وِچ آخݨ لغے، ”بیشک اے اُنہاں زیادتیاں نا نتیجہ اے، جیہڑیاں اساں اپݨے پراؤ نال کیتیاں۔ کِیئانکہ جس ویلے اُس اَساں نی منت کیتی سی، تے اے جاݨی کے وی کہ اُس نی جان مصیبتاں وِچ اے، اُس نی اَساں نی سُݨی۔ اِس واسطے اے مصیبت اَساں پر آئی گئی اے۔» 22 فِر حضرت یُوسف نا پَہرا رُوبِن آخݨ لغا، ”میں تُساں کی آخیا سی کہ اِس بچے پر ظلم نہ کرو، پر تُساں نی سُݨی۔ ہُݨ تکو! اُس نے خونے نا بدلہ کِس طرح ہوݨا!» 23 پر اُنہاں کی پتہ نی سی کہ حضرت یُوسف اُنہاں نیاں گلاں سمجھݨے اݨ، کِیئانکہ اُنہاں وِچ اِک ترجمان سی۔ 24 فِر حضرت یُوسف اپݨے پہراواں کولوں بَکھ ہوئی کے روئے۔ پر مُڑی اچھی کے اُنہاں نال گلاں کِیتیاں، تے اُنہاں وِچوں شمعُون کی پغڑی کے اُنہاں نے سامݨے بنی شوڑیا. 25 فِر حضرت یُوسف اپݨے نوکراں کی حکم دِتا، ”اِنہاں نیاں بوریاں وِچ غلہ باؤ، تے ہر بندے نے پیسے اُس نی بوری وِچ ہی رخی شوڑو، تے اُنہاں کی سفری سامان وی دیو۔» تے اِسے طرح ہویا۔ 26 فِر پہراواں اپݨیاں کھوتیاں پر غلہ لدیا، تے اُتھوں ٹری گئے۔ 27 فِر جس ویلے او رات گُزارنے واسطے کُسے جغہ رُکے، تے اُنہاں وِچوں اِک پہرآ اپݨی کھوتی کی چارا دیݨ لغا. اُس اپݨی بوری کھولی، تے اپݨے نقد پیسے بوری نے مُونہے پر رخے وے تکے! 28 فِر اُس اپݨے پہراواں کی آخیا، ”مہاڑے نقد پیسے مُڑی آئے، تے مہاڑی بوری وِچ پئے وے! تکی کہنو!» بس! فِر اُنہاں نے ساہ سُکی گئے، تے ہکے بکے ہوئی کے اِک دوئے دَر تکݨ لغے، تے آخیا، ”خُدا اَساں نال کَے کیتا؟» 29 فِر او اپݨے مُلخے کَنعان وِچ اپݨے پیؤ حضرت یعقُوب کول آئے، تے ساریاں گلاں اُنہاں کی دسی کے آخݨ لغے، 30 «او آدمی جیہڑا اُس مُلخے نا مالک اے، اُس اَساں نال بہوں سختی نال گلاں کِیتیاں سݨ، تے اَساں کی اِس مُلخے نا جاسوس سمجیا سی۔ 31 اَساں اُس کی آخیا کہ اَساں سچے آدمی آں، جاسوس ناں۔ 32 اساں باراں پہرآ آں، تے سارے اِک ہی پیؤ نے پُتر آں۔ اَساں وِچوں اِک نی رہیا، تے اَساں ساریاں کولوں نِکا پہرآ اپݨے پیؤ کول مُلخے کَنعان وِچ اے۔ 33 تے فِر اُس آدمی اساں کی آخیا کہ مِکی اِس گل توں پتہ لغی جاسی کہ تُساں سچے او، بس! اپݨیاں پہراواں وِچوں کُسی اِک کی مہاڑے کول چھوڑی دیو، تے تُساں اپݨے پُہکھے کہار آلیاں واسطے غلہ کہنی کے جاؤ۔ 34 پر اُتھوں تُساں اپݨا ساریاں کولوں نِکا پہرآ مہاڑے کول کہنی اچھو، تے فِر مِکی پتہ لغی جاسی کہ تُساں واقعی سچے او تے جاسوس نی او- فِر میں تُساں نا پہرا تُساں کی موڑی دیساں، تے تُساں اِس مُلخے وِچ آزادی نال اچھی جائی سکھݨے او۔» 35 فِر اِس طرح ہویا کہ جِس ویلے اُنہاں اپݨیاں اپݨیاں بوریاں خالی کِیتیاں، تے ہر اِک بندے نے نقد پیسیاں نی تھیلی اُس نی بوری وِچ رخی وی سی! او تے اُنہاں نا پیؤ نقد پیسے نیاں تھیلیاں تکی کے ڈری گئے۔ 36 اُنہاں نے پیؤ حضرت یعقُوبؑ اُنہاں کی آخیا، ”تُساں مِکی بے اولاد کری شوڑیا! یُوسف وی نی رہیا، تے شمعُون وی نی رہیا! تے ہُݨ تُساں بن یامِین کی وی کھڑنا چاہݨے او! اے ساریاں گلاں مہاڑے خلاف اݨ۔» 37 اے سُݨی کے رُوبِن اپݨے پیؤ کی آخیا، ”کدے میں اِس کی تُساں کول موڑی کے نہ آݨاں، تے تُساں مہاڑیاں دوآں پُتراں کی ماری سٹیا۔ تُساں اِس کی مہاڑے حَوالے کرو، تے فِر میں اِس کی تُساں کول موڑی آݨساں۔» 38 حضرت یعقُوب آخیا، ”مہاڑا پُتر تُساں نال نی جاݨا، کِیئانکہ اِس نا سَکا پہرآ مری گیا، تے اے کَہلا رہی گیا اِے۔ جے کدے راہ وِچ جاݨیاں جاݨیاں اِس پر کوئی بَلا آئی گئی، تے تُساں مہاڑیاں چِٹیاں بالاں نال مِکی غمیں نال قبرے وِچ پُہنچاسو۔» |