توریت شریف: پَیدایش 40 - Mirpuri-Pahari Bible1 اِنہاں گلاں توں بعد اِس طرح ہویا کہ مصر نے بادشاہ فرعون نا سردار ساقی تے سردار خانساماں دوئے اپݨے مالک نے قصُوروار ہوئی گئے۔ 2 فرعون اپݨے اِنہاں دوآں خادماں توں خفہ ہوئی گیا، 3 تے اِنہاں دوآں کی اُس قید خانے وِچ سٹی شوڑیاس، جیہڑا مُحافظاں نے سِپہ سالار نے کہارے وِچ سی تے جِتھے حضرت یُوسف وی قید سݨ۔ 4 شاہی سِپہ سالار اُنہاں کی حضرت یُوسف نے حوالے کِیتا، تے حضرت یُوسف اُنہاں نی خدمت کرݨ لغی پئے۔ 5 قید وِچ رہݨیاں رہݨیاں کُج مدت تُوں بعد، اِک رات مصری بادشاہ نے خانسامے تے ساقی دوآں اِک اِک خواب تکیا، جِنہاں نی تعبیر وی الگ الگ سی۔ 6 حضرت یُوسف سویرے اُنہاں کول اندر آئے تے تکیا کہ او دوئے پریشان سݨ۔ 7 اِس واسطے اُنہاں اِنہاں کولوں پُچھیا، ”اج تُساں کِیئاں پریشان او؟“ 8 اُنہاں آخیا، «اَساں دوآں اِک اِک خواب تکیا اَے، جس نا مطلب دسݨے آلا کوئی نی۔» حضرت یُوسف اُنہاں کی آخیا، ”تعبیر نی قدرت اللّٰہ تعالیٰ کول نی؟ مِکی ذرا خواب دَسو۔» 9 تاں فِر سردار ساقی اپݨا خواب حضرت یُوسف کی سُݨایا۔ اُس آخیا، «میں خواب تکیا کہ انگورے نی بیل مہاڑے سامݨے اَے، 10 تے اُس بیل وِچ تَرے شاخاں اݨ۔ جُوں ہی اُنہاں وِچ کلیاں لغیاں، فِر پھُل نِکلے تے اُس نے ساریاں گُچھیاں وِچ پکے پکے انگور لغے۔ 11 تے فرعون نا پیالہ مہاڑے ہتھے وِچ اَے، تے میں اِنہاں انگوراں کی کہنی کے فرعون نے پیالے وِچ نچوڑیا، تے او پیالہ میں فرعون نے ہتھے وِچ دِتا۔» 12 حضرت یُوسف اُس کی آخیا، «اُس نا مطلب اے اَے کہ او ترَے شاخاں ترَے دیہاڑے اݨ۔ 13 ہُݨ تَریاں دیہاڑیاں نے اندر فرعون تُکی قید خانے تُوں باہر کڈسی، تے تُکی دوبارہ تہاڑے عُہدے پر بحال کری شوڑسی، تے پہلے نی طرح تُوں اُس نا ساقی ہی رہسیں تے پیالہ اُس نے ہتھے وِچ دیا کرسیں۔ 14 پر جدوں تُوں خوش حال ہوئی جاسیں، تے مِکی یاد رخیاں. تے مہربانی کری کے بادشاہ اگے مہاڑی گل کریاں، تے مِکی اِس قید توں آزاد کروایاں۔ 15 کِیئانکہ عِبرانیاں نے مُلخے وِچوں مِکی زوری کہنی آئے، تے اِتھے وی میں کوئی اِیئے جیا کم نی کِیتا جس نی وجہ نال مِکی قید خانے وِچ ڈکی شوڑیا نیں۔“ 16 جس ویلے سردار خانسامے تکیا کہ تعبِیر چنگی سی، تے فِر اُس وی حضرت یُوسف کی آخیا، «میں وی اِک خواب تکیا اَے کہ مہاڑے سِرے پر روٹیاں نیاں تَرے ٹوکریاں اݨ، 17 تے اُپر آلے ٹوکرے وِچ مُختلف قسم نی روٹی فرعون واسطے اَے۔ پر پرندے اچھی کے مہاڑے سِرے تُوں ٹوکرے وِچوں کھاݨے اݨ۔» 18 فِر حضرت یُوسف اُس کی آخیا، «اِس نا مطلب اے اَے کہ او ترَے ٹوکریاں ترَے دیہاڑے اݨ۔ 19 اج تُوں لائی تِریاں دیہاڑیاں نے اندر فرعون تُہاڑا سِر تہڑ تُوں لائی شوڑسی تے تُکی بُوٹے نال ٹنگی شوڑسی، تے فِر پرندے تُہاڑا ماس پٹی پٹی کھاسݨ۔» 20 فِر اِس طرح ہی ہویا کہ ترِیئے دیہاڑے جیہڑا فرعون نی سالگرہ نا دیہاڑا سی، اُس دیہاڑے فرعون اپݨے ساریاں خادماں نی دعوت کِیتی۔ اُس موقے پر اُس سردار ساقی تے سردار خانسامے کی قید خانے وِچوں کڈی کے اپݨے دربار وِچ بُلایا۔ 21 فرعون سردار ساقی کی فِر اُس نے کمے پر لائی شوڑیا، تے فِر او فرعون نے ہتھے وِچ کٹورا دیݨ لغی پیا۔ 22 پر فرعون خانسامے کی سزائے موت دیئی کے بُوٹے نال لٹکائی شوڑیا۔ اے سب کُج اُسے طرح ہی ہویا جِس طرح حضرت یُوسف تعبِیر دسی سی۔ 23 پر سردار ساقی حضرت یُوسف کی یاد نی رخیا، بلکہ اُس اُنہاں کی وِساری شوڑیا۔ |