توریت شریف: پَیدایش 36 - Mirpuri-Pahari Bible1 حضرت اِیسَو مطلب اَدوم نا شجرہ نسب اے اَے۔ 2 حضرت اِیسَو دو کنعانی کُڑیاں نال بیاہ کیتا: حِتّی قوم نے بندے ایلون نی تہی عَدہ نال، فِر عَنہ نی تہی اُہلی بامہ نال جیہڑی حِوّی قوم نے بندے صِبعون نی دوہتری سی. 3 تے ترِیئا بیاہ حضرت اِسماعِیل نی تہی بشامتھ نال کِیتا، جیہڑی نِبایوت نی پہیݨ سی۔ 4 فِر حضرت اِیسَو نی زناݨی عَدہ توں اِلی فز پَیدا ہویا، تے بشامتھ توں رَعُو ایل پَیدا ہویا، 5 تے اُہلی بامہ توں یَعوس، یعلام تے قورح پَیدا ہوئے۔ اے حضرت اِیسَو نے پُتر سݨ جیہڑے مُلخ کَنعان وِچ پَیدا ہوئے۔ 6 حضرت اِیسَو اپݨیاں زناݨیاں، تیہاں، پُتراں تے اپݨے کہرے نیاں ساریاں نوکراں چاکراں سمیت اپݨے ڈنگراں، سارے مالے تے اپݨیاں ساریاں چیزاں جہڑیاں اُس مُلخے کَنعان وِچوں جمع کیتیاں سݨ کِہندیاں، تے اپݨے پہراؤ حضرت یعقُوب کولوں اِک دوئے مُلخے در ٹُری گئے۔ 7 اُنہاں دوئاں پہراواں کول اتنا زیادہ سامان ہوئی گیا سی کہ او کٹھے نی رہی سکݨے سݨ. اُنہاں نیاں ڈنگراں نی اِتنی زیادہ پیدائِش ہوئی گئی سی کہ جتھے رہݨے سݨ اُتھے چراݨے نی جغہ کٹ سی۔ 8 اِس واسطے حضرت اِیسَو جِنہاں کی ادوم وی آخݨے سݨ سَعِیر نے پہاڑی علاقے وِچ رہݨ لغی پئے۔ 9 حضرت اِیسَو نیاں نسلاں، جِنہاں کی اَدومی اخݨے سݨ، اُنہاں نا شجرہ نسب اے اَے. او سَعِیر نے پہاڑی علاقے وِچ رہݨے سݨ. 10 حضرت اِیسَو نیاں پتراں نے اے ناں سݨ: اِلی فز حضرت اِیسَو نی زناݨی عَدہ نا پُتر، تے رَعُو ایل حضرت اِیسَو نی زناݨی بشامتھ نا پُتر. 11 اَلی فاز نے پتر اے سݨ: تِیمان، اومر، صَفو، جعتام، قنز 12 تے عَمالِیق. عَمالِیق اِلی فز نی لونڈی تِمنع نا پُتر سی۔ اے سارے حضرت اِیسَو نی زناݨی عَدہ نے پوترے سݨ۔ 13 رَعُو ایل نے پتر اے سݨ: نحت، زارح، شَمہ تے مِزّہ. اے حضرت اِیسَو نی زناݨی بشامتھ نے پوترے سݨ۔ 14 اُہلی بامہ نے پتر اے سݨ: یَعوس، یَعلام تے قورح. اُہلی بامہ عَنہ نی تہی تے صِبعون نی دوہتری سی. 15 حضرت اِیسَو کولوں مختلف قبیلیاں نے سردار نکلے۔ اُس نے پہلوٹھی نے پُتر اِلی فز وِچوں اے قبائلی سردار نکلے: تِیمان، اومر، صفو، قنز، 16 قورح، جعتام تے عَمالِیق۔ اے سارے حضرت اِیسَو نی زناݨی عَدہ نے پوترے سݨ. او ملکِ اَدوم وِچ رہݨے سݨ. 17 حضرت اِیسَو نے پُتر رعُو ایل کولوں اے قبائلی سردار نکلے: نحت، زارح، سمّہ تے مِزّہ۔ اے سارے حضرت اِیسَو نی زناݨی بشامتھ نے پوترے سݨ. او ملکِ اَدوم وِچ رہݨے سݨ. 18 حضرت اِیسَو نی زناݨی اُہلی بامہ وِچوں اے قبائلی سردار نکلے: یعوس، یعلام تے قورح۔ اُہلی بامہ عَنہ نی تہی سی. 19 اے سارے سردار حضرت اِیسَو یعنی ادوم نی اولاد سݨ۔ 20 مُلکِ اَدوم نے کُج باشندے حوری قوم نے بندے سَعِیر نی اولاد سݨ۔ اُنہاں نے ناں لوطان، سوبل، صِبعون، عَنہ، 21 دِیسون، ایصر تے دِیسان سݨ۔ سَعِیر نے اے پُتر مُلکِ اَدوم وِچ حوری قبیلے نے سردار سݨ۔ 22 لوطان نے پُتر حوری تے ہیمام سݨ. (تِمنع لوطان نی پہیݨ سی.) 23 سوبل نے پُتر علوان، مانحت، عیبال، سفو تے اونام سݨ۔ 24 صِبعون نے پُتر ایّاہ تے عَنہ سݨ۔ اِس عَنہ کی گرم پاݨِیئے نے چشمے لبھے جدُوں او صحرا وِچ اپݨے پیؤ صِبعون نے کھوتے چَراݨا پیا سی۔ 25 عَنہ نا اِک پُتر دِیسون تے اِک تہی اُہلی بامہ سی۔ 26 دِیسون نے چار پُتر حمدان، اِشبان، یِتران تے کِران سݨ۔ 27 ایصر نے پُتر بِلہان، زعوان تے عَقان سݨ۔ 28 دِیسان نے پُتر عُوض تے اَران سݨ۔ 29 مُلکِ سَعِیر وِچ اے حوری قوم نے سردار سݨ: لوطان، سوبل، صِبعون، عَنہ، 30 دِیسون، ایصر تے دِیسان. 31 اے او بادشاہ سݨ جیہڑے مُلکِ ادوم پر اُس ویلے حکومت کرنے رہے جدوں بنی اسرائیل پر کُسے بادشاہ نی حُکومت نی سی: 32 بالع بِن بعور، جیہڑا دنہابا شہر نا رہݨ آلا سی، مُلکِ ادوم نا پہلا بادشاہ سی۔ 33 بالع مری گیا، تے فِر زارح نا پُتر یوباب، جیہڑا بُصرا شہر نا رہݨ آلا سی، اُس نی جغہ بادشاہ ہویا۔ 34 فِر یوباب مری گیا، تے حُشام، جیہڑا تیمانیوں نے مُلخے نا رہݨ آلا سی، اُس نی جغہ بادشاہ ہویا۔ 35 فِر حُشام مِری گیا، تے بدد نا پُتر ہدد، جس موآب نے میدانے وِچ مِدیانیاں کی شکست دِتی سی، اُس نی جغہ بادشاہ بݨی گیا. اُس نے شہرے نا ناں عَوِیت سی۔ 36 جدوں ہدد مری گیا، تے سملہ، جیہڑا مُسرقہ نا رہݨ آلا سی، اُس نی جغہ بادشاہ بݨی گیا۔ 37 جدوں سملہ مری گیا، تے ساؤل، جیہڑا رحوبوت شہر نا رہݨے آلا سی، اُس نی جغہ بادشاہ بݨی گیا. رحوبوت دریا نے کنارے پر سی۔ 38 جدوں ساؤل مری گیا، تے عکبور نا پُتر بعل حنان اُس نی جغہ بادشاہ بݨی گیا۔ 39 بعل حنان بِن عکبور مری گیا، تے حدد، جیہڑا پاؤ شہر نا رہݨ آلا سی، اُس نی جغہ بادشاہ بݨی گیا۔ اُس نی کہرے آلی نا ناں مہِیطب ایل سی، جیہڑی مَطرِد نی تہی تے میضاہاب نی دوہتری سی۔ 40 حضرت اِیسَو وِچوں اَدومی قبیلیاں نے اے سردار نکلے: تِمنع، علوَہ، یتیت، 41 اُہلی بامہ، ایلہ، فِینون، 42 قنز، تیمان، مِبصار، 43 مجدی ایل تے عِر. جِس جِس جغہ اے قبیلے رہݨے سݨ، اُس جغہ نا ناں قبیلیاں نے ناں اپر رخیا جاݨا سی. |