توریت شریف: پَیدایش 16 - Mirpuri-Pahari Bible1 ہالے تک حضرت ابرام نی بیوی بی بی ساری کی کوئی اولاد نی سی ہوئی. پر بی بی ساری نی اِک مصری لُونڈی سی جس نا ناں بی بی ہاجرہ سی. 2 تے بی بی ساری حضرت ابرام کی آخیا، ”رب تے مِکی اوترا ہی رخیا اے، تے تُساں مہاڑی نوکراݨی کول جاؤ. شائد اُس نے وسیلے نال مِکی اولاد لبھی جائے.“ تے حضرت ابرام اپݨے کہرے آلی نی گل منی کِہندی۔ 3 حضرت ابرام کی مُلخ کَنعان وِچ رہݨیاں دس سال ہوئی گئے سݨ، تے اُنہاں نی کہرے آلی ساری اپݨی مصری لُونڈی اُنہاں کی دِتی، تانکہ او وی اُنہاں نی کہرے آلی بݨے۔ 4 حضرت ابرام بی بی ہاجرہ کول گئے، تے او حاملہ ہوئی گئی. جدوں بی بی ہاجرہ کی پتہ لغا کہ او حاملہ ہوئی گئی اے، فِر او اپݨی مالکݨ نی قدر کٹ کرنا شُروع ہوئی گئی۔ 5 تے بی بی ساری حضرت ابرام کی آخیا، ”جیہڑا ظلم مہاڑے پر ہویا اے، اُس نے ذمہ دار تُساں او! میں اپݨی لونڈی تُساں کی دِتی سی، ہُݨ او اُمیدوار ہوئی گئی اے تے اُس نیاں نظراں وِچ مہاڑی قدر کٹی گئی. رب مہاڑے تے تُساں نے بشکار انصاف کرے!“ 6 فِر حضرت ابرام آخیا، ”تُہاڑی لُونڈی تہاڑے ہتھے وِچ اے. جیہڑا کُج تُہاڑا دِل آخݨا، تُوں اُس نال کر.“ فِر بی بی ساری بی بی ہاجرہ پر سختی کرݨ لغی پئی، تے بی بی ہاجرہ اُنہاں کولوں نسی گئی۔ 7 فِر رب نے فرشتے کی بی بی ہاجرہؑ شُور نے رائے وِچ ہی اِک چُوئے کول لُگی جغہ لبھی گئی۔ 8 فرشتے اُس کی پُچھیا، ”اے ہاجرہ! تُوں کُتھوں آئی ایں، تے کُدھر جُلی ایں؟“ بی بی ہاجرہ جواب دِتا، ”میں اپݨی مالکݨ بی بی ساری کولوں نسی کے آئی آں۔“ 9 فِر فرشتے آخیا، ”توں اپݨی مالکݨ کول مڑی جا، تے اپݨی جان اُس نے حوالے کری شوڑ۔ 10 میں تُہاڑی اولاد اِتنی بدھاساں کہ کوئی اُنہاں کی گِݨی وی نی سکݨ لغا۔ 11 توں حاملہ ایں، تے تُہاڑا اِک مُنڈا ہوسی. تُوں اُس نا ناں اسماعیل رخیاں، کِیئانکہ رب تُہاڑا دُکھ تے فریاد سُݨی کِہندی۔ 12 مُنڈا اِک سخت جان تے آزاد بندہ ہوسی، جیہڑا ساریاں نے خلاف ہوسی تے سارے اُس نے خلاف ہوسݨ. تے اپݨیاں ساریاں پہراواں نال دُشمݨی وی رخسی.“ 13 بی بی ہاجرہ رب کی، جس اُس نال گلاں کیتیاں سݨ، ”مِکی تکݨے آلے خُدا“ نا ناں دِتا، کِیئانکہ او آخݨ لغی، ”واقعی میں اللّٰہ تعالیٰ کی تکی شوڑیا، تے اُس کی تکݨے توں بعد زندہ بچی گئی آں۔“ 14 اِسے واسطے اُس کھُوئے نا ناں بِیر لحی روئی، مطلب ”زندہ ہستی نا کھُوہ، جیہڑا مِکی تکݨا اے“ رخیا گیا. او قادِش تے بَرد نے بشکار اے. 15 فِر بی بی ہاجرہ نا اِک پُتر ہویا، تے حضرت ابرام اُس نا ناں اِسماعِیل رخیا. 16 جدوں بی بی ہاجرہ نا پُتر جمیا سی حضرت ابرام چھیاسیاں سالاں نے سݨ۔ |