Psalm 93 - Pennsylvania Dutch Bible

Da 93. Psalm. Di Hallichkeit Funn Gott

¹ Da Hah is kaynich, un is geglayt in hallichkeit; da Hah is geglayt in hallichkeit un ohgedu mitt graft. Eah hott di veld fesht gegrund un see kann nett gmooft sei.

² Fumm ohfang voah dei kaynich-shtool ksetzt; du bisht ayvichlich.

³ Di hohcha vassahra hayva sich uf, oh Hah, di hohcha vassahra henn iahra shtimm ufkohva; di hohcha vassahra hayva iahra vella uf.

⁴ Graysah es di yacht funn grohsi vassahra; graysah es di hohcha vella fumm say, is da Hah, hohch un mechtich.

⁵ Dei Vatt shtayt fesht ayvichlich; hallichkeit is ivvah dei haus, oh Hah, fa'immah.