Psalms 3 - Holy Bible Nigerian Pidgin English

Prayer For Help For Morning

David Song

¹ My God, make Yu si as my enemies many rish! Many of dem dey kom attack mi.

² Many of dem dey sey, “God nor go save am.”

³ But Yu, my God, na Yu bi di wall wey dey protet mi; na Yu bi my glory and di pesin wey make mi dey alive.

⁴ Wen I kry to God for help, E ansa mi from en holy hill.

⁵ I dey rest, sleep and wake-up well, bikos God dey protet mi.

⁶ I nor dey fear, even doh doz wey dey attack mi from evry korna, plenty well-well.

⁷ My God, make Yu get up! My God, make Yu save mi! Yes, Yu go slap all my enemies for dia face kon break dia tit!

⁸ Viktory dey kom from God. So, I dey beg Yu, God sey, make Yu bless yor pipol.