Yakobus 1 - Perjanjian Baru Bahasa Melayu Maluku Utara

Yakobus pe salam

¹ Sudara-sudara dua blas suku Israel yang so percaya pa Yesus Kristus, yang merantau di tampa-tampa laeng. Salam dari kita, Yakobus. Kita ini orang yang jaga biking apa yang Tuhan Allah deng Tuhan Yesus Kristus suru.

Tetap batahang percaya biar dapa cobaan

² Sudara-sudara, kalu ngoni dapa cobaan apa saja, ngoni musti tarima deng sanang hati.

³ Karna ngoni sandiri tau, kalu torang dapa cobaan tapi tetap percaya pa Tuhan, itu biking torang pe percaya jadi lebe kuat.

⁴ Jang ngoni berenti percaya, tetap batahang bagitu. Kalu ngoni biking bagitu turus, ngoni pe percaya mo tamba kuat, deng ngoni pe percaya jadi sempurna deng tara kurang apa-apa.

Orang yang minta apa-apa pa Tuhan, dia musti yakin Tuhan akan kase

⁵ Kalu ada dari ngoni yang tara tau mana yang bae yang dia musti biking, dia musti berdoa tanya pa Tuhan Allah supaya Tuhan Allah kase tau. Barang, Tuhan pe hati bae, sapa saja yang minta pa Dia, Dia tara mara tapi pasti Dia kase.

⁶ Tapi waktu orang itu minta pa Tuhan, dia musti percaya butul-butul, jang ragu-ragu. Karna orang yang ragu-ragu, dia itu sama deng omba yang angin tiop kasana-kamari.

⁷ Jadi orang yang ragu-ragu, jang pikir dia mo dapa apa-apa dari Tuhan.

⁸ Karna orang yang pe hati deng pikiran tara tetap pa Tuhan, dia pe hidup tara akan tenang.

Nasehat untuk orang miskin deng orang kaya

⁹ Orang miskin yang percaya pa Yesus musti sanang, karna biar dia tara arti apa-apa di dunia, tapi Tuhan angka pa dia jadi orang penting pa Tuhan Allah pe muka.

¹⁰ Orang kaya yang percaya pa Yesus me, musti sanang lagi, biar lagi Tuhan Allah biking dia jadi orang yang tara ada apa-apa. Karna satu hari nanti, orang kaya itu me akan mati, itu sama deng rumpu yang babunga bagus tapi tara lama akan mati.

¹¹ Waktu matahari nae kong panas kanal di bunga, bunga itu jadi layu kong jatu, kong dia pe bagus me ilang. Bagitu lagi deng orang kaya, waktu dia sementara sibuk deng karja untuk cari doi lebe banya, dia pe hidup di dunia ini me akan abis.

Samua yang bae deng sempurna, itu dari Tuhan Allah

¹² Orang yang dapa cobaan kong batahang deng tetap percaya pa Tuhan, dia itu orang yang paling sanang. Karna kalu dia berhasil lolos dari samua cobaan itu, dia mo dapa hadia. Hadia itu, hidup deng Tuhan Allah slama-lamanya. Itu yang Tuhan Allah so janji mo kase pa orang-orang yang sayang pa Dia.

¹³ Kalu ada orang yang dapa cobaan kong tagoda biking yang jahat, jang dia bilang bagini, “Cobaan ini dari Tuhan Allah”, karna Tuhan Allah tara perna tagoda biking yang jahat. Jadi, Dia tara kase cobaan pa orang la orang itu tagoda biking yang jahat.

¹⁴ Tapi kalu ada orang yang dapa cobaan kong tagoda biking yang jahat, itu karna dia iko dia pe mau sandiri. Dia lia yang dia suka, turus kalu dia tara tahang, langsung dia biking.

¹⁵ Kong kalu orang itu so iko dia pe mau yang jahat, itu dia so berdosa. Jadi kalu dosa itu so kuasai pa dia, dia itu akan mati tapisa deng Tuhan Allah sampe slama-lamanya.

¹⁶ Sudara-sudara yang kita sayang, jang sampe ngoni dapa tipu. Tuhan Allah tara perna kase cobaan pa ngoni la ngoni tagoda biking yang jahat.

¹⁷ Barang, samua yang bae deng sempurna yang torang dapa, itu datang dari Tuhan Allah yang di sorga. Dia itu torang pe Bapa yang biking matahari, bulan, deng bintang untuk kase tarang langit. Matahari, bulan, deng bintang itu basinar iko dia pe waktu untuk kase tarang dunia ini. Tapi Tuhan Allah tara bagitu, Dia tara beruba, Dia salalu bae.

¹⁸ Tuhan Allah biking torang jadi Dia pe ana-ana itu iko Dia pe mau sandiri, karna torang percaya Dia pe ajaran yang butul. Dia biking torang jadi Dia pe ana-ana supaya torang jadi yang paling penting dari samua yang Dia cipta.

Dengar deng iko Tuhan pe firman

¹⁹ Sudara-sudara yang kita sayang, ngoni musti inga hal-hal ini: kalu ada orang sementara bicara, ngoni dengar bae-bae dulu pa dia, jang ngoni capat bicara deng jang ngoni capat mara.

²⁰ Karna orang kalu so mara, dia tara akan biking barang yang butul pa Tuhan Allah pe muka.

²¹ Jadi ngoni musti berenti biking samua hal yang tara bae deng yang jahat. Ngoni musti tarima Tuhan Allah pe firman deng hati yang tara sombong. Firman itu so ada di ngoni pe hati, kong punya kuasa untuk kase slamat pa ngoni.

²² Jadi jang ngoni cuma dengar Tuhan Allah pe firman saja, tapi ngoni musti biking itu. Karna kalu tarada, itu sama deng ngoni tipu ngoni pe diri sandiri.

²³ Orang yang cuma dengar firman tapi tara biking, dia itu sama deng orang yang ada perhatikan bae-bae dia pe muka yang sebenarnya di kaca.

²⁴ Tapi waktu dia bale muka, dia langsung lupa bagimana dia pe muka itu pe rupa.

²⁵ Tapi kalu orang cari tau deng perhatikan bae-bae kong biking firman itu, bukang cuma dengar kong lupa, pasti Tuhan Allah akan biking dia jadi orang yang paling sanang. Tuhan Allah pe firman itu, aturan yang sempurna, deng yang bole kase lapas orang dari dosa-dosa.

²⁶ Kalu ada orang yang anggap dia pe diri rajin baibada, tapi dia salalu bicara yang tara bae atau tara jaga dia pe mulu, itu dia tipu dia pe diri sandiri. Jadi dia pe ibada pa Tuhan itu tarada guna.

²⁷ Tapi ibada yang butul yang torang musti biking pa Tuhan Allah, torang pe Bapa pe muka itu, bagini: tolong pa ana-ana yang dong pe orang tua so tarada, tolong pa janda-janda yang susa, deng jaga diri bae-bae la tara tagoda iko dunia pe mau yang jahat.