Wahyu 10 - Perjanjian Baru Bahasa Melayu Maluku Utara

Malaekat satu pegang kitab yang tagulung satu

¹ Abis itu, kita lia malaekat satu lagi yang kuat turung dari sorga. Dia pe badan tabungkus deng awan. Dia pe kapala takuliling deng pelangi. Dia pe muka basinar sama deng matahari, kong dia pe kaki mamanyala sama deng tiang api.

² Pa dia pe tangan ada satu kitab tagulung kacil yang tabuka. Dia pe kaki kanan ada bainjang di laut kong dia pe kaki kiri bainjang di darat.

³ Kong dia bataria kuat-kuat, sama deng singa bataria. Abis dia bataria, tuju guntur sambung bicara kuat-kuat.

⁴ Abis tuju guntur itu bicara, kita mo tulis apa yang guntur bilang, cuma kita dengar suara dari sorga yang bilang bagini, “Jang dulu ngana tulis itu! Jang dulu ngana kase tau pa sapa-sapa apa yang tuju guntur itu bilang.”

⁵ Abis itu, malaekat yang kita lia ada bainjang di laut deng di darat itu, angka dia pe tangan kanan, tunju di langit.

⁶ Malaekat itu basumpa demi Tuhan Allah yang hidup slama-lamanya, deng yang so biking sorga deng dia pe isi, bumi deng dia pe isi, laut deng dia pe isi. Malaekat itu bilang bagini, “Tuhan Allah so tara tunda-tunda lagi. Apa yang Dia so bilang itu so mo jadi!

⁷ Nanti waktu malaekat ketuju tiop dia pe trompet, waktu itu suda Tuhan Allah akan kase jadi Dia pe rencana yang dulu orang bolong tau. Tuhan Allah mo kase jadi Dia pe rencana itu, sama deng yang Dia so janji dulu pa orang-orang yang jaga biking apa yang Dia suru, dorang itu nabi-nabi yang jaga kase turus Dia pe pasáng pa orang-orang.”

⁸ Abis itu, kita dengar suara yang sama deng yang tadi dari sorga bilang pa kita, “Pigi suda, la ambe kitab tagulung yang so tabuka itu dari malaekat pe tangan yang ada bainjang di laut deng di darat itu.”

⁹ Jadi kita pigi pa malaekat itu, turus kita minta pa dia supaya dia kase kitab tagulung kacil itu pa kita. Dia bilang pa kita, “Ambe kitab tagulung kacil ini kong makang suda! Kitab itu mo biking ngana pe puru rasa tara sadap, tapi di ngana pe mulu mo rasa manis sama deng madu.”

¹⁰ Turus kita ambe kitab tagulung kacil itu dari malaekat itu pe tangan, kong kita makang kitab itu. Waktu kita taru kitab itu pa kita pe mulu, dapa rasa manis sama deng madu. Tapi bagitu kita talang, kita pe puru rasa tara sadap.

¹¹ Abis itu, kita dengar ada suara yang parenta pa kita bagini, “Ngana musti kase tau pa orang-orang apa yang Tuhan Allah bilang mo jadi di dunia ini nanti. Ngana kase tau tentang apa yang mo jadi nanti pa banya bangsa, suku bangsa, bahasa, deng raja.”