Titus 3 - Perjanjian Baru Bahasa Melayu Maluku Utara

Kalakuang yang pantas untuk orang percaya

¹ Titus, ngana musti kase inga pa orang-orang percaya supaya dorang salalu dengar-dengaran pa pemerinta deng pa sapa saja yang berkuasa. Kong dorang me musti salalu siap biking apa saja yang bae.

² Dorang tara bole kase tara bae orang pe nama deng tara bole baku malawang. Tapi dorang musti tara kasar deng salalu baku bawa bae-bae pa samua orang.

³ Barang, dulu waktu torang bolong percaya pa Yesus, torang tara mangarti apa-apa. Jadi torang malawang pa Tuhan, torang me tapengaru deng hal-hal yang jahat. Napsu deng keinginan yang tara bae so kuasai di torang pe hati kong torang hidup baku mangiri deng orang laeng. Torang jahat pa orang deng torang salalu baku binci.

⁴ Biar torang so jahat bagitu, tapi Tuhan Allah sayang pa torang kong kase tunju Dia pe bae pa torang sampe torang bole dapa slamat dari torang pe dosa-dosa.

⁵ Tuhan Allah kase slamat pa torang, bukang karna torang so biking barang yang butul, tapi itu karna Dia sayang pa torang. Deng Roh Kudus pe kuasa, Dia biking torang jadi bersi dari torang pe dosa-dosa, la torang pe hubungan deng Tuhan Allah jadi baru, sama deng torang lahir ulang.

⁶ Tuhan Allah kase Dia pe Roh Kudus pa torang talebe-lebe, karna Yesus Kristus mati untuk kase slamat pa torang.

⁷ Tuhan Allah kase Dia pe bae pa torang, itu yang biking torang jadi orang yang tara sala pa Dia pe muka, kong deng bagitu, torang ada hak tarima Tuhan Allah pe janji untuk hidup deng Dia slama-lamanya, sama deng yang torang so harap.

⁸ Samua yang kita so kase ajar ini butul, kong itu bagus deng ada guna untuk samua orang. Kita mau ngana bilang deng tegas ajaran ini pa samua orang yang percaya pa Tuhan Allah, supaya dorang berusaha butul-butul biking barang yang bae.

⁹ Jang ngana baku malawang tentang asal-usul orang tua dulu-dulu deng tentang hal-hal laeng yang tarada dia pe guna. Ngana me tara bole baku malawang deng bakalae tentang aturan yang ada di lima kitab Musa, karna itu tarada dia pe guna deng cuma buang-buang waktu saja.

¹⁰ Kalu ada orang yang biking sampe jemaat so tara satu hati, ngana togor pa dia la dia berenti. Kalu ngana so togor pa dia sampe dua kali kong dia tara dengar, jang ngana badekat lagi pa dia.

¹¹ Barang, ngana tau, orang yang pe pikiran bagitu memang so tara iko apa yang butul. Dia pe dosa yang kase bukti, dia sala. Itu berarti dia sandiri yang hukum dia pe diri sandiri.

Paulus pe ahir surat

¹² Titus, kita mo suru pa Artemas atau Tikhikus pigi ka sana pa ngana. Kalu dia so sampe, ngana berusaha capat-capat datang kamari pa kita di kota Nikopolis, karna kita so ambe keputusan la mo tinggal di kota itu selama musim dingin ini.

¹³ Ngana me berusaha suda tolong pa Zenas ahli hukum itu deng pa Apolos, supaya dong dua bisa barangkat deng tara kurang apa-apa di jalang.

¹⁴ Torang pe orang-orang yang percaya musti rajin biking yang bae supaya bole tolong orang laeng pe keperluan hari-hari. Deng bagitu, dong pe hidup ada dia pe guna.

¹⁵ Titus, samua orang yang sama-sama deng kita di sini ada kirim salam pa ngana. Deng tolong bilang kita pe salam pa torang pe tamang-tamang di situ yang sayang pa torang, yang sama-sama percaya pa Yesus. Kita minta pa Tuhan Allah supaya Dia kase Dia pe bae pa ngoni samua.