Kolose 3 - Perjanjian Baru Bahasa Melayu Maluku Utara

Hidup bae-bae karna Yesus Kristus so ruba torang pe hidup jadi baru

¹ Sudara-sudara yang percaya, karna Yesus Kristus so mati kong so hidup ulang, ngoni lagi sama deng so mati kong hidup ulang, kong ngoni dapa hidup deng Tuhan Allah slama-lamanya. Karna itu, taru suda ngoni pe hati deng pikiran pa apa yang ada di sorga, tampa Yesus Kristus ada, tampa yang terhormat, pa Tuhan Allah pe sabla kanan.

² Ngoni pikir suda turus hal-hal yang ada di sorga, bukang hal-hal yang ada di dunia.

³ Barang, ngoni so tara iko dunia pe mau lagi, jadi bole bilang, ngoni pe hidup yang lama so mati sama-sama deng Yesus Kristus. Skarang ngoni so percaya pa Dia jadi so satu hati deng Dia yang hidup sama-sama deng Tuhan Allah. Tapi orang-orang yang tara percaya pa Tuhan tara mampo mangarti ngoni pe hidup yang baru ini.

⁴ Yesus Kristus itu suda yang ruba ngoni pe hidup jadi baru. Jadi nanti waktu Dia datang ulang yang kedua kali, samua orang akan lia pa Dia deng lia pa ngoni lagi, kong ngoni dapa puji deng hormat sama-sama deng Dia.

⁵ Jadi, karna Yesus Kristus so ruba ngoni pe hidup jadi baru, ngoni berenti suda iko dunia pe mau, macam deng: baseks sabarang, biking hal-hal yang cafarune, iko napsu yang tara bae, ingin biking barang yang jahat, deng golojo orang pe barang. Karna kalu torang golojo orang pe barang, itu berarti, torang so kase lebe penting barang itu daripada Tuhan.

⁶ Pa orang yang biking samua hal yang jahat macam bagitu, Tuhan Allah jadi mara kong akan hukum pa dorang [yang tara dengar-dengaran pa Dia].

⁷ Dulu, ngoni me biking hal-hal itu lagi waktu ngoni masi hidup iko dunia pe mau.

⁸ Tapi skarang, ngoni buang suda samua yang tara bae, macam ini: pangmara, mara-mara sampe marontak, binci sampe biking barang jahat, kase tara bae orang pe nama, deng kase kaluar kata-kata kotor.

⁹ Jang ngoni baku kase foya satu deng yang laeng, karna ngoni so buang ngoni pe hidup yang lama deng dia pe kalakuang yang tara bae itu.

¹⁰ Kong skarang ngoni yang so jadi percaya, ngoni pe hidup so beruba jadi baru, kong lebe hari Tuhan Allah lebe tamba ruba turus-turus ngoni pe sifat la jadi sama deng Dia pe sifat. Dia biking bagitu la ngoni bisa lebe tamba kanal pa Dia.

¹¹ Ngoni yang so percaya, ngoni pe hidup so beruba jadi baru, jadi tara penting kalu ngoni itu orang Yahudi ka, bukang Yahudi ka, ngoni so sunat ka, tarada ka, atau biar ngoni orang luar ka, orang yang cuma tinggal di utang ka, atau ngoni orang karja yang orang so bili ka, tarada ka, itu tara penting. Tapi yang paling penting itu percaya pa Yesus Kristus. Dia itu ada sama-sama deng torang samua yang percaya pa Dia.

¹² Tuhan Allah so pili pa ngoni, ngoni yang so jadi Dia pe umat, deng yang Dia sayang. Jadi ngoni pe hidup musti bagini: ada rasa kasiang, hati bae, tara sombong, tara kasar, deng salalu sabar.

¹³ Kalu ada orang yang biking sala pa ngoni, ngoni musti tahang jang sampe mara, deng kalu ada yang taru dendam pa ngoni, jang ngoni simpang hati, tapi ngoni musti baku kase ampun. Inga! Tuhan Allah so kase ampun ngoni pe dosa, jadi ngoni lagi musti kase ampun orang yang biking sala pa ngoni.

¹⁴ Kong yang paling penting dari samua itu, ngoni musti baku-baku sayang satu deng yang laeng. Barang, deng ngoni baku-baku sayang bagitu, ngoni taika jadi satu, deng sempurna.

¹⁵ Biar suda Yesus Kristus biking ngoni pe hati tetap tenang, karna Tuhan Allah so pangge pa ngoni untuk hidup baku bawa bae-bae satu deng yang laeng, sama deng ngoni jadi Yesus Kristus pe badan yang taika satu deng yang laeng. Kong ngoni lagi musti salalu bilang tarimakasi banya pa Tuhan Allah.

¹⁶ Ngoni musti inga turus-turus Yesus Kristus pe ajaran, deng simpang itu bae-bae di ngoni pe hati, supaya ajaran itu bisa bawa hasil yang basar pa ngoni pe hidup. Pake suda hikmat yang Tuhan Allah kase pa ngoni untuk baku kase ajar deng baku kase inga Dia pe ajaran. Pake lagi lagu-lagu mazmur, lagu-lagu yang puji pa Tuhan, deng lagu-lagu laeng yang Roh Kudus kase pa ngoni. Ngoni manyanyi suda deng hati yang bilang tarimakasi banya pa Tuhan Allah.

¹⁷ Kong samua yang ngoni biking deng ngoni bilang, ngoni biking suda samua itu deng bae-bae, karna ngoni Tuhan Yesus pe wakil di dunia. Kong ngoni lagi musti salalu bilang tarimakasi banya pa Tuhan Allah, torang pe Bapa karna apa yang Tuhan Yesus so biking.

Nasehat untuk orang yang percaya

¹⁸ Ngoni bini-bini, ngoni musti dengar-dengaran pa ngoni pe laki, karna itu memang pantas untuk parampuang yang so percaya pa Tuhan.

¹⁹ Ngoni laki-laki yang so kawing, ngoni musti sayang pa ngoni pe bini, deng jang ngoni kasar pa dia.

²⁰ Ngoni ana-ana, ngoni musti dengar-dengaran pa ngoni pe orang tua dalam sagala hal, karna itu suda yang pantas untuk orang yang percaya biking, deng itu yang biking Tuhan pe hati sanang.

²¹ Deng ngoni papa-papa, jang ngoni kasar pa ngoni pe ana-ana sampe biking dong jadi hati saki kong ilang smangat.

²² Bagitu lagi deng ngoni orang-orang karja yang ngoni pe tuang so bili, ngoni musti dengar-dengaran pa ngoni pe tuang di dunia ini dalam sagala hal. Jang ngoni dengar-dengaran pa ngoni pe tuang cuma untuk cari muka pa dia. Tapi ngoni bakarja deng sunggu-sunggu karna ngoni tako pa Tuhan.

²³ Apa saja yang ngoni biking, ngoni biking itu suda deng hati yang sunggu-sunggu, macam deng ngoni biking untuk Tuhan, bukang untuk manusia.

²⁴ Inga, ngoni ada karja untuk Yesus Kristus, sama deng Dia itu ngoni pe tuang. Deng Dia akan kase pa ngoni samua yang bae yang Dia so janji pa Dia pe ana-ana.

²⁵ Jadi sapa saja yang biking barang yang tara butul, dia mo dapa hukum dari Tuhan Allah, karna Tuhan Allah itu tara pili-pili orang waktu kase hukuman.