Ibrani 7 - Perjanjian Baru Bahasa Melayu Maluku Utara

Imam Melkisedek lebe hebat dari Abraham

¹ Dulu, Melkisedek jadi raja di kota Salem, deng dia lagi imam dari Tuhan Allah yang Paling Tinggi. Satu kali waktu Abraham pulang dari prang kase kala raja-raja, Melkisedek kaluar dari kota Salem kong jemput pa Abraham deng berdoa minta Tuhan Allah kase berkat pa Abraham.

² Turus, Abraham kase pa Melkisedek spulu persen dari barang-barang yang dia dapa waktu prang itu. Melkisedek pe nama pe arti, ‘Raja yang adil’. Deng, karna dia raja dari kota Salem, orang jaga pangge pa dia lagi raja Salem, yang pe arti, ‘raja yang bawa dame’.

³ Tentang Melkisedek ini, orang tara tau dia pe asal-usul. Dia pe papa sapa, dia pe mama sapa, tarada yang tau. Tara ada lagi yang tau dia lahir tempo apa deng mati tempo apa. Jadi sama deng Anak Allah, Melkisedek tetap jadi imam sampe slama-lamanya.

⁴ Jadi, dari carita itu torang dapa tau Melkisedek itu orang penting skali, karna biar Abraham itu torang pe orang tua dulu-dulu yang hebat, tapi Abraham kase spulu persen pa Melkisedek dari barang yang dia ambe waktu baku prang.

⁵ Kalu iko aturan di lima kitab Musa, cuma imam Lewi pe turunan saja yang bole jadi imam. Dorang itu yang dapa tugas untuk kumpul spulu persen dari dorang pe sudara orang-orang Yahudi pe pendapatan, biar lagi dorang itu sama-sama Abraham pe turunan.

⁶ Tapi Melkisedek itu bukang imam Lewi pe turunan. Biar bagitu, Abraham tetap kase pa Melkisedek spulu persen dari barang-barang yang dia ambe waktu dia menang dari prang. Kong Melkisedek berdoa pa Tuhan Allah, minta Abraham dapa berkat, padahal Abraham itu orang yang so tarima Tuhan Allah pe janji-janji dari dulu.

⁷ Kong torang tau pasti, orang yang kase berdoa minta berkat untuk orang laeng, dia lebe hebat dari orang yang mo tarima berkat itu. Jadi, torang tau Melkisedek itu lebe hebat dari Abraham.

⁸ Kalu imam-imam dari Lewi pe turunan itu, dorang jaga tarima spulu persen dari umat untuk dorang pe hidup, padahal imam-imam itu cuma manusia biasa saja yang nanti mo mati. Jadi Melkisedek ini lebe penting dari imam-imam biasa, karna di Kitab Suci tara tatulis dia mati.

⁹ Dulu cuma Lewi pe turunan yang tarima spulu persen dari orang-orang Israel. Tapi waktu Abraham bakase spulu persen itu, torang bole bilang, itu sama saja deng Abraham pe ana cucu dari suku Lewi so kase spulu persen itu pa Melkisedek.

¹⁰ Barang, waktu Abraham kase spulu persen pa Melkisedek itu, imam Lewi deng dia pe turunan bolong lahir, tapi karna dorang itu lahir dari Abraham pe turunan, jadi bole bilang apa yang Abraham biking itu sama saja deng orang Lewi deng dong pe turunan lagi so sama-sama deng Abraham bakase bagian itu pa raja Melkisedek.

Yesus itu Imam Basar yang Paling Tinggi

¹¹ Waktu Tuhan Allah kase Dia pe aturan di lima kitab Musa pa orang-orang Yahudi, Dia pili pa Lewi pe turunan la jadi imam-imam, kong Dia suru pa dorang untuk ajar pa orang Yahudi iko aturan-aturan itu. Tapi imam-imam itu tara mampo biking orang-orang Yahudi itu jadi sempurna pa Tuhan Allah pe muka. Jadi, Tuhan Allah kase imam laeng yang bukang dari Lewi deng Harun pe turunan. Imam yang laeng itu, sama deng imam Melkisedek.

¹² Deng, karna imam dari Lewi pe turunan dapa ganti deng imam yang laeng, itu berarti, aturan-aturan di lima kitab Musa lagi musti dapa ganti.

^13-14 Kita bicara imam laeng itu, kita pe maksut, torang pe Tuhan sandiri. Barang, torang tau torang pe Tuhan pe asal bukang dari suku Lewi, tapi dari suku Yehuda. Tara perna nabi Musa kase ijin orang dari suku laeng yang bukang suku Lewi untuk jadi imam la biking tugas kase korban persembahan pa Tuhan Allah.

¹⁵ Jadi, so lebe jelas aturan-aturan di lima kitab Musa dapa ganti, kong imam-imam me so dapa ganti. Barang, torang pe Tuhan yang bukang dari Lewi pe turunan itu so datang, kong Dia sama deng imam basar Melkisedek.

¹⁶ Dia jadi Imam bukang iko aturan di lima kitab Musa, karna kalu iko aturan itu, yang jadi imam musti dari Lewi pe turunan. Tapi Dia jadi Imam karna Dia ada kuasa dari Tuhan Allah, deng karna Dia hidup slama-lamanya.

¹⁷ Barang, dulu di Kitab Suci ada tatulis tentang Dia bagini, “Ngana itu Imam untuk slama-lamanya, sama deng Melkisedek me jadi imam.”

¹⁸ Tuhan Allah bilang bagitu, karna aturan-aturan di lima kitab Musa dulu tentang imam-imam so dapa ganti. Barang, aturan-aturan itu so tarada dia pe kuasa lagi deng so tarada dia pe guna.

¹⁹ Aturan-aturan di lima kitab Musa itu tara berhasil biking manusia pe hubungan deng Tuhan Allah jadi sempurna. Tapi skarang, torang so ada tampa baharap yang lebe bae. Itu Yesus suda, Dia yang biking torang bole badekat deng Allah.

Yesus Kristus itu Imam Basar untuk slama-lamanya

²⁰ Torang bole yakin pa Yesus Kristus itu, karna bagini: dulu, waktu Tuhan Allah angka pa Lewi pe turunan jadi imam, Dia tara pake sumpa.

²¹ Tapi waktu Tuhan Allah angka pa Yesus Kristus jadi Imam, Dia kase kuat deng sumpa. Dia basumpa bagini, “Kita ini Tuhan Allah! Kita basumpa, Kita tara akan ruba apa yang Kita bilang ini, ‘Ngana itu Imam untuk slama-lamanya.’ ”

²² Jadi deng Tuhan Allah tentukan Yesus Kristus itu Imam Basar untuk slama-lamanya, torang jadi tau pasti, Dia biking Tuhan Allah pe janji yang baru pa manusia jadi lebe bagus dari janji yang lama.

²³ Dulu itu, imam-imam banya skali. Dorang banya, karna kalu ada yang mati, musti ada yang ganti supaya dorang pe karja jalang turus.

²⁴ Tapi Yesus Kristus, Dia tetap ada sampe slama-lamanya, jadi Dia pegang Dia pe jabatan Imam tara ganti-ganti deng orang laeng.

²⁵ Kong karna Dia Imam slama-lamanya, Dia ada kuasa kase slamat pa orang-orang yang mau datang pa Tuhan Allah, dari skarang sampe slama-lamanya. Dia kase slamat pa torang, barang Dia hidup slama-lamanya untuk kase berdoa pa torang pa Tuhan Allah.

²⁶ Yesus Kristus itu cocok skali jadi torang pe Imam Basar yang kase bae-bae torang pe hubungan deng Tuhan Allah, barang Dia itu Kudus, Dia tarada sala, deng Dia tara perna biking dosa. Tuhan Allah taru pa Yesus Kristus di tampa yang jao dari orang-orang berdosa, kong Dia angka pa Yesus Kristus di tampa yang paling terhormat di sorga.

²⁷ Yesus Kristus tara sama deng imam-imam basar laeng. Tiap hari, imam basar laeng itu musti potong binatang la jadi korban persembahan pa Tuhan Allah untuk hapus dia pe dosa sandiri, baru kase korban persembahan untuk hapus orang-orang pe dosa. Tapi Yesus Kristus tara bagitu. Dia kase Dia pe diri sandiri mati di kayu salib. Dia pe diri itu suda yang jadi korban persembahan pa Tuhan Allah untuk tebus samua manusia pe dosa, satu kali untuk slama-lamanya.

²⁸ Barang, kalu iko aturan-aturan di lima kitab Musa, orang yang dapa angka jadi imam basar, dorang itu cuma manusia biasa saja yang gampang tagoda biking dosa. Tapi abis Tuhan Allah kase aturan-aturan itu, Dia biking lagi janji yang baru deng sumpa la Dia angka Dia pe Anak sandiri, Yesus Kristus. Dia pe Anak itu sempurna, deng Dia jadi Imam yang kase bae-bae torang pe hubungan deng Tuhan Allah sampe slama-lamanya.