Efesus 4 - Perjanjian Baru Bahasa Melayu Maluku Utara

Orang-orang percaya musti jadi satu biar dorang pe tugas baku beda-beda

¹ Sudara-sudara, karna Tuhan so kase Dia pe bae yang basar itu pa torang, jadi ini nasehat dari kita yang skarang ada di penjara gara-gara kita jaga biking apa yang Tuhan suru. Tuhan so pangge pa ngoni la iko pa Dia, jadi kita bilang pa ngoni supaya ngoni hidup butul sama deng yang pantas untuk orang yang so iko pa Dia.

² Ngoni pe hidup musti bagini: tara basombong, tara kasar pa orang, deng salalu sabar. Biar ada orang yang biking sala pa ngoni, jang capat mara, barang ngoni so baku sayang.

³ Ngoni musti berusaha sunggu-sunggu supaya hidup baku bawa bae-bae, karna Roh Kudus so biking torang jadi satu.

⁴ Torang yang percaya pa Yesus so jadi satu, sama deng torang so jadi satu badan, deng Roh Kudus yang ada pa torang me cuma satu. Kong cuma pa Tuhan Allah saja torang baharap karna Dia yang pangge pa torang untuk iko pa Dia.

⁵ Torang pe Tuhan cuma satu, torang pe percaya cuma satu, deng torang dapa baptis me pe tujuan cuma satu, untuk iko pa Dia.

⁶ Turus, torang pe Tuhan Allah lagi cuma satu, Dia itu torang samua pe Bapa. Dia yang berkuasa lebe dari samua yang ada, deng yang bakarja pa torang samua pe hidup, Dia itu yang ada pa torang samua pe hati.

⁷ Tapi Yesus Kristus so kase pa torang yang percaya, kemampuan yang baku beda-beda untuk layani orang. Dia kase itu karna Dia pe bae yang cuma-cuma pa torang, kong kemampuan-kemampuan yang Dia kase pa torang itu iko Dia pe mau.

⁸ Itu butul, karna ini yang so tatulis di Kitab Suci, “Waktu Dia nae di tampa yang tinggi, Dia bawa Dia pe musu-musu yang Dia so kase kala itu, kong Dia kase hal-hal yang bae deng cuma-cuma pa manusia.”

⁹ Jadi kalu di situ bilang, “Dia so nae di tampa yang tinggi,” itu berarti, Dia lagi so perna turung di bagian yang paling bawa, itu di bumi, to?

¹⁰ Dia yang so perna turung, Dia itu suda Yesus Kristus. Dia me yang so perna nae di tampa yang tinggi di sorga, supaya Dia bole berkuasa pa samua-samua yang ada.

¹¹ Yesus Kristus itu suda yang kase kemampuan pa Dia pe umat yang baku-baku beda: ada yang jadi Yesus Kristus pe utusan-utusan yang orang sebut rasul-rasul, ada yang jadi nabi-nabi yang jaga kase turus Tuhan Allah pe pasáng, ada yang kase tau Kabar Bae tentang Yesus Kristus di tampa yang orang-orang bolong dengar, ada yang jadi pemimpin di jemaat sama deng gembala jaga dia pe domba bae-bae, deng ada lagi yang mangajar di jemaat.

¹² Yesus Kristus kase Dia pe kemampuan pa dorang itu, supaya dorang bole tolong pa orang-orang yang so jadi Tuhan Allah pe umat. Tuhan Allah pe umat itu sama deng Yesus Kristus pe badan. Kalu Tuhan Allah pe umat dapa tolong bagitu, Dia pe umat bole biking dorang pe tugas, deng dorang lagi bole baku kase kuat dong pe percaya,

¹³ sampe torang samua jadi satu karna sama-sama percaya pa Yesus Kristus, deng torang bole kanal pa Dia, Anak Allah. Torang lagi bole butul-butul iko pa Dia, deng torang pe sifat lebe hari lebe tamba bae sampe sama deng Yesus Kristus pe sifat.

¹⁴ Kalu torang pe percaya so kuat bagitu, torang so tara gampang dapa tipu sama deng ana kacil. Jadi kalu ada orang yang datang kase ajar ajaran macam-macam yang tara butul untuk pengaru pa torang, torang tara akan gampang taiko pa dorang. Torang tara akan sama deng omba yang kasana-kamari iko angin batiop.

¹⁵ Tapi torang bilang yang butul pa orang laeng karna torang sayang pa dorang. Kong dalam samua hal, torang pe sifat lebe hari lebe tamba bae sampe sama deng Yesus Kristus pe sifat. Dia itu torang samua yang percaya pe pemimpin, sama deng Dia itu torang pe kapala.

¹⁶ Kong Dia yang biking torang yang percaya jadi satu, sama deng torang ini satu badan: torang ini sama deng Dia pe kaki, tangan, deng samua-samua yang ada pa Dia pe badan. Dia pe kuasa ada pa torang samua, jadi kalu torang masing-masing biking tong pe tugas yang Dia so kase, kuasa itu biking torang lebe hari lebe tamba baku sayang deng lebe tamba baku kase kuat torang pe percaya.

Buang kalakuang yang tara bae kong biking yang butul

¹⁷ Jadi, karna torang so jadi satu, kita kase inga bae-bae pa ngoni pake Tuhan pe kuasa: jang lagi ngoni hidup sama deng orang yang tara kanal pa Tuhan Allah, dorang yang cuma pikir hal-hal yang tarada dia pe guna.

¹⁸ Dorang pe pikiran itu so galap, dorang susa mo tau yang butul. Dorang pe hidup so jao dari hidup yang Tuhan Allah mo kase pa dorang karna dorang tara mau tau tentang Dia deng karna dorang pe kapala batu.

¹⁹ Dorang pe urat malu so putus, dorang kase dong pe diri untuk hidup iko dong pe napsu yang tara bae, deng dorang paling suka biking hal-hal yang cafarune.

²⁰ Tapi ajaran yang ngoni so dengar tentang Yesus Kristus itu, bukang kase ajar untuk hidup tara bae macam bagitu!

²¹ Barang, ngoni so dengar deng so tarima ajaran yang butul, kong ajaran yang butul itu memang ada pa Tuhan Yesus.

²² Jadi, buang suda ngoni pe kalakuang tara bae yang ngoni biking waktu ngoni bolong percaya pa Yesus Kristus, karna ngoni pe keinginan yang tara bae itu yang biking ngoni dapa tipu sampe ngoni pe hidup jadi rusak.

²³ Tapi kase biar suda Tuhan Allah ruba ngoni pe hati deng pikiran,

²⁴ supaya ngoni pe hidup beruba jadi baru, karna memang Tuhan Allah so cipta pa ngoni untuk iko Dia pe sifat. Deng bagitu, ngoni jadi orang yang bole biking barang yang butul deng hidup deng hati yang bersi.

²⁵ Jadi, berenti suda bicara yang foya-foya, tapi bicara suda yang butul-butul satu deng yang laeng, karna torang orang percaya ini so taika jadi satu sama deng kaki, tangan, deng samua-samua yang ada pa torang pe badan.

²⁶ Kalu ngoni mara pa orang, jang sampe mara itu biking ngoni jadi berdosa. Deng jang ngoni simpang ngoni pe mara itu sampe matahari maso,

²⁷ supaya jang Iblis, setang-setang pe raja dapa kesempatan pengaru pa ngoni untuk biking dosa.

²⁸ Orang yang papancuri, berenti suda bapancuri. Tapi lebe bae dia rajin bakarja, supaya deng dia pe hasil karja itu dia bole barbage pa orang yang ada kekurangan.

²⁹ Kalu ngoni bicara, jang ada kata-kata tara bae kaluar dari ngoni pe mulu. Lebe bae, yang musti ngoni pake waktu bicara itu, kata-kata yang bisa kase kuat orang laeng pe hati, deng kata-kata yang perlu dorang dengar untuk dong pe bae.

³⁰ Jang sampe deng ngoni pe bicara yang tara bae itu, ngoni biking Tuhan Allah pe Roh Kudus jadi sedi. Inga, Tuhan Allah pe Roh Kudus yang ada pa torang itu jadi tanda, torang ini Tuhan Allah punya, sampe di waktu Dia datang ulang untuk kase slamat pa torang.

³¹ Ngoni musti buang suda samua ngoni pe hati saki, simpang hati, deng mara-mara. Ngoni berenti suda mara-mara sampe marontak. Berenti suda kase tara bae orang pe nama, deng berenti lagi biking samua yang jahat.

³² Tapi lebe bae ngoni bae-bae pa orang laeng deng sayang pa dorang. Ngoni kase ampun suda pa orang yang biking sala pa ngoni, sama deng Tuhan Allah so kase ampun pa ngoni yang so percaya pa Yesus Kristus.