2 Tesalonika 1 - Perjanjian Baru Bahasa Melayu Maluku Utara

Paulus pe salam

¹ Sudara-sudara jemaat di kota Tesalonika yang percaya pa Tuhan Allah, torang pe Bapa, deng pa Tuhan Yesus Kristus. Salam dari kita Paulus, deng kita pe tamang-tamang Silwanus deng Timotius.

² Torang minta pa Tuhan Allah, torang pe Bapa, deng pa Yesus Kristus, torang pe Tuhan, supaya kase yang bae pa ngoni, deng salalu biking ngoni pe hati tetap tenang.

Paulus bilang tarimakasi pa Tuhan Allah

³ Sudara-sudara, torang salalu bilang tarimakasi pa Tuhan Allah untuk ngoni. Torang memang musti biking bagitu karna ngoni pe percaya pa Yesus Kristus lebe tatamba, deng karna ngoni lebe tamba baku sayang.

⁴ Jadi, torang pe hati sanang sampe tong bacarita tentang ngoni pa Tuhan Allah pe jemaat-jemaat, karna biar orang siksa pa ngoni deng ngoni dapa banya susa yang laeng, ngoni tetap batahang deng tetap percaya pa Tuhan Yesus.

⁵ Waktu torang dengar ngoni pe kabar bagitu, torang tau, samua yang Tuhan Allah biking itu adil. Ngoni skarang dapa siksa karna percaya pa Tuhan, tapi ngoni tetap percaya pa Dia. Jadi ngoni pantas jadi Tuhan Allah pe umat yang Dia Berkuasa sebagai Raja pa ngoni pe hidup.

⁶ Deng karna Tuhan Allah itu adil, Dia mo balas pa orang-orang yang siksa pa ngoni.

⁷ Kong Dia mo biking ngoni deng torang samua bebas dari siksa yang skarang ini torang rasa. Itu samua nanti mo jadi waktu Tuhan Yesus datang dari sorga sama-sama deng Dia pe malaekat-malaekat deng kuasa yang basar. Dia mo turung deng api yang mamanyala.

⁸ Kong Dia mo hukum orang-orang yang tara mau kanal pa Tuhan Allah deng yang tara mau iko Kabar Bae tentang Yesus Kristus, torang pe Tuhan.

⁹ Dorang mo dapa hukuman yang biking dorang rasa siksa sampe slama-lamanya. Dorang mo dapa user dari Tuhan pe muka, jadi dorang so tara mo lia lagi Dia pe kuasa yang luar biasa.

¹⁰ Samua itu akan jadi waktu Tuhan Yesus datang ulang. Dia datang itu, orang-orang yang so jadi Tuhan Allah pe umat akan puji deng hormat pa Dia. Samua orang percaya itu akan herang. Ngoni me nanti sama-sama deng dorang, karna ngoni so percaya samua yang torang kase tau pa ngoni.

¹¹ Kong karna torang tau Tuhan mo datang, torang salalu berdoa lagi untuk ngoni. Tuhan Allah so pangge pa ngoni jadi Dia pe umat sandiri, jadi torang berdoa la Tuhan biking ngoni pantas jadi Dia pe umat. Torang me berdoa supaya Tuhan Allah pake Dia pe kuasa la tolong pa ngoni kase selesai samua hal yang bae yang ngoni suka mo biking, ngoni biking samua itu karna ngoni percaya pa Yesus.

¹² Torang berdoa bagitu supaya kalu ngoni pe cara hidup macam bagitu, orang-orang akan puji deng hormat pa torang pe Tuhan, Yesus Kristus. Deng ngoni me mo dapa puji karna ngoni percaya pa Dia. Samua itu jadi, bukang karna torang pe bae, tapi karna torang pe Tuhan Allah deng Tuhan Yesus Kristus pe bae.