2 Korintus 4 - Perjanjian Baru Bahasa Melayu Maluku Utara

Kabar Bae tentang Yesus Kristus itu sama deng harta yang berharga

¹ Karna Tuhan Allah pe sayang pa torang, Dia pili pa torang untuk kase tau Kabar Bae tentang Yesus Kristus pa orang-orang. Kong karna itu, torang tara ilang smangat waktu biking tugas ini.

² Torang so ambe keputusan, torang tara akan perna pake cara-cara tara bae waktu kase tau Kabar Bae itu, karna cara itu cuma mo biking torang jadi malu. Deng torang tara akan kase bodo pa orang, deng tara akan bicara putar bale tentang Tuhan Allah pe firman. Tapi torang akan kase mangarti butul-butul ajaran itu pa orang, iko Tuhan pe mau. Deng biking bagitu, di dorang pe hati, dorang akan tau sandiri, apa yang torang kase tau itu butul ka tarada.

³ Kalu ada orang yang tara percaya Kabar Bae yang torang kase tau itu, dorang itu pe pikiran tatutu sampe dorang tara percaya Kabar Bae itu. Itu bukang karna tong dua kase tau pa dorang yang tara jelas, tapi karna dorang tara mau percaya Kabar Bae itu, dorang akan tapisa deng Tuhan Allah slama-lamanya.

⁴ Dorang tara percaya Kabar Bae itu karna Iblis, setang-setang pe raja, yang tutu dong pe pikiran. Iblis itu yang orang banya di dunia iko pa dia. Deng bagitu, dorang tara dapa tau Kabar Bae itu butul, deng dorang tara mangarti Yesus Kristus yang pe kuasa luar biasa itu sama persis deng Tuhan Allah.

⁵ Yang torang dua kase tau pa orang-orang, bukang tentang torang pe diri sandiri, tapi torang kase tau tentang Yesus Kristus, Dia itu suda Tuhan, yang pimpin pa torang! Deng torang bawa tong pe diri ini sama deng Tuhan pe orang karja untuk layani pa ngoni, iko Yesus Kristus pe mau.

⁶ Barang, waktu Tuhan Allah biking dunia ini, Dia bicara supaya galap jadi tarang. Bagitu lagi, Dia biking torang pe hati yang galap jadi tarang, supaya tong bole mangarti Tuhan Allah pe kuasa yang luar biasa, kong itu torang bole lia dari Yesus Kristus pe hidup.

⁷ Torang ini cuma manusia yang lema, sama deng pot dari tana liat. Tapi biar bagitu, Tuhan Allah kase percaya Dia pe Kabar Bae tentang Yesus Kristus itu pa torang. Kabar Bae itu hebat skali, bole kase sama deng harta yang berharga. Jadi, deng tong kase tau Kabar Bae itu, itu jadi jelas skali pa orang-orang, kuasa basar yang ada pa torang itu memang dari Tuhan Allah, bukang dari tong pe diri sandiri.

⁸ Torang dapa sengsara macam-macam, tapi Tuhan tetap kase kuat pa torang sampe torang tetap batahang. Torang dapa susa sampe amper-amper torang so tara tau mo bagimana lagi, tapi torang tara perna ilang smangat.

⁹ Torang dapa siksa, tapi Tuhan tara perna kase tinggal pa torang sandiri. Biar torang dapa pukul sampe taguling-guling, tapi torang tara mati.

¹⁰ Torang dapa sengsara deng amper mati sama deng Yesus Kristus, tapi itu jadi supaya orang bisa lia Yesus Kristus pe kuasa ada pa tong pe diri, deng dong bisa tau deng jelas, butul Yesus so hidup ulang.

¹¹ Barang, selama torang masi hidup di dunia ini, ada saja orang yang cari mo bunu pa torang karna torang iko pa Yesus Kristus. Deng dorang biking bagitu, jadi jelas pa samua orang, Yesus Kristus so hidup ulang karna dorang lia Yesus Kristus pe kuasa ada pa torang pe badan yang nanti mo mati ini.

¹² Jadi torang salalu mangada deng orang-orang yang berusaha mo bunu pa torang sampe amper-amper tong mo mati. Tara apa suda. Yang penting torang so kase tau Kabar Bae pa ngoni supaya ngoni bisa percaya pa Tuhan Yesus kong hidup deng Dia slama-lamanya.

¹³ Di Kitab Suci ada tatulis bagini, “Karna kita percaya, jadi kita barani bicara.” Bagitu lagi deng torang. Torang percaya, jadi torang tetap barani kase tau Kabar Bae tentang Yesus Kristus pa orang-orang.

¹⁴ Barang, Tuhan Allah so kase hidup ulang pa Tuhan Yesus, jadi torang me tau, biar torang mati nanti, Dia mo kase hidup ulang pa torang. Dia mo kumpul pa torang deng ngoni sama-sama pa Dia pe muka.

¹⁵ Torang dapa samua siksa itu waktu tong kase tau Kabar Bae tentang Yesus Kristus, tapi samua itu untuk ngoni pe bae. Karna kalu lebe banya orang yang dengar tentang Tuhan Allah pe bae pa manusia, nanti tamba banya orang yang bilang tarimakasi pa Tuhan Allah. Deng bagitu, Tuhan Allah lebe dapa puji deng hormat.

Waktu dapa sengsara, torang musti tetap percaya pa Tuhan

¹⁶ Kong karna torang tau Tuhan akan kase kuat pa torang, torang tara ilang smangat waktu kase tau Kabar Bae tentang Yesus Kristus. Tiap hari torang pe badan lebe tara kuat deng saki lagi, tapi biar bagitu me, tong pe hati lebe hari lebe tamba percaya deng lebe kuat.

¹⁷ Memang, sengsara yang tong dapa di dunia ini barát, tapi kalu tong pikir apa yang Tuhan Allah so sadia pa torang di sorga, sengsara itu bole torang bilang tara barát kong cuma sementara. Jadi kalu torang tetap batahang deng sengsara itu, torang so siap untuk tarima samua yang hebat itu di sorga.

¹⁸ Sudara-sudara, sengsara itu torang rasa cuma selama tong ada di dunia ini saja. Jadi jang cuma torang perhatikan apa yang tong dapa lia deng mata kapala sandiri saja. Tapi perhatikan suda apa yang torang akan dapa nanti, yang Tuhan Allah so kase sadia untuk torang di sorga, karna itu yang akan ada sampe slama-lamanya.