Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Korintus 11 - Perjanjian Baru Bahasa Melayu Maluku Utara


Jang tapengaru deng orang yang kase ajaran yang tara butul

1 Sudara-sudara, kita minta jang ngoni pastiu deng yang kita mo bilang ini, biar apa yang kita mo bilang ini orang anggap sama deng orang bodo pe bicara. Kita tau, ngoni memang sabar deng kita.

2 Kita jaga bae-bae pa ngoni sama deng Tuhan Allah sandiri jaga pa ngoni, jang sampe ada yang ganggu ngoni pe percaya pa Yesus Kristus. Kita sama deng papa satu yang so janji mo kase kawing dia pe ana parampuang deng laki-laki satu, jadi papa itu jaga turus pa ana parampuang itu supaya dia tetap bersi sampe dia kawing deng dia pe calon kawing.

3 Tapi kita tako jang sampe ada yang pengaru pa ngoni deng dong pe ajaran yang sala sampe ngoni so tara percaya lagi pa Yesus Kristus deng hati yang sunggu-sunggu. Itu sama deng Hawa dulu yang dapa tipu dari ular sampe malawang Tuhan Allah pe parenta karna ular pe putar bale itu.

4 Kita bicara bagitu, barang ngoni itu gampang skali tarima orang laeng, biar itu dorang ajar yang sala tentang Yesus Kristus, atau tentang roh yang baku beda deng Roh Kudus yang ngoni so tarima, atau tentang kabar bae yang baku beda deng Kabar Bae tentang Yesus Kristus yang ngoni so tarima dari torang.

5 Dorang yang datang ajar pa ngoni itu, orang bilang dorang itu, “Tuhan pe utusan-utusan yang hebat”, tapi menurut kita, dorang itu tara lebe hebat dari kita.

6 Biar lagi kita tara pintar bicara di orang-orang pe muka, tapi kalu tentang Tuhan Allah pe firman, kita tau butul. Ngoni tau itu to, karna kita so ulang-ulang kase tunju deng jelas pa ngoni dalam sagala hal.

7 Waktu kita kase tau Kabar Bae dari Tuhan Allah pa ngoni, kita tara minta ngoni bayar pa kita. Tapi kita karja cari kita pe doi sandiri untuk kita pe hidup hari-hari. Kita karja sama deng orang biasa bagitu, itu karna kita hormati pa ngoni la ngoni bole dengar Kabar Bae itu deng cuma-cuma. Jadi apa kita sala tara minta apa-apa dari ngoni? Pasti tarada to?

8 Waktu kita kase tau Kabar Bae itu pa ngoni, yang bantu ongkos kita pe hidup hari-hari itu jemaat laeng. Jadi itu sama deng, kita so kase rugi pa jemaat laeng supaya kita bisa layani pa ngoni.

9 Waktu kita ada sama-sama deng ngoni kong kita kekurangan, kita tara minta dari ngoni biar cuma dari satu orang saja. Karna untuk tutu kita pe kekurangan itu, sudara-sudara yang percaya yang datang dari daera Makedonia yang bantu pa kita. Jadi kita tara jadi beban pa ngoni, deng bagitu kita akan tetap kase tau Kabar Bae itu turus-turus deng cuma-cuma pa ngoni.

10 Kita rasa sanang skali karna kita tara perna minta apa-apa dari ngoni atau orang laeng, kong kita akan sanang lagi karna kita bole kase turus Kabar Bae itu deng cuma-cuma pa samua orang di daera Akhaya. Kong ngoni bole tau yang kita bilang itu butul karna Yesus Kristus pe ajaran ada di kita pe hati.

11 Tapi biar kita tara minta apa-apa pa ngoni, jang kira kata, kita tara sayang pa ngoni. Tuhan Allah tau, kita sayang skali pa ngoni!

12 Kita tetap tara akan minta apa-apa dari ngoni, supaya orang-orang yang bilang kata, dorang itu Tuhan pe utusan-utusan yang hebat, tara ada alasan untuk kase puji dong pe diri, kata, dorang itu ada karja untuk layani pa ngoni sama deng torang layani pa ngoni.

13 Barang, dorang itu bukang Tuhan Yesus yang utus. Dorang bakarja deng cara yang tara butul. Dorang cuma babafoya, dorang biking dong pe diri sama deng Yesus Kristus pe utusan-utusan, padahal bukang.

14 Jang ngoni herang suda deng orang yang macam bagitu. Barang, Iblis, setang-setang pe raja saja biking diri sama deng malaekat yang hati bae deng bawa tarang.

15 Jadi jang ngoni herang, orang yang karja untuk Iblis, dorang itu me cuma babafoya biking dong pe diri sama deng orang yang jaga biking barang yang butul. Kong dorang itu nanti mo dapa hukuman yang pantas dari Tuhan Allah, iko apa yang dong so biking.


Paulus carita tentang tantangan yang dia dapa waktu biking pelayanan

16 Kita bilang ulang e: jang ngoni anggap kita bodo. Tapi biar ngoni anggap kita bodo, tara apa suda. Kita cuma minta ngoni dengar yang kita mo bilang ini tentang apa yang kita so perna biking supaya kita bole bapuji diri sadiki.

17 Kita puji diri bagini, bukang karna Tuhan Allah yang suru kita bicara sama deng orang bodo, tapi kita sandiri yang bicara bagini.

18 Memang banya orang yang suka puji dong pe diri. Dorang bilang samua yang dong biking, iko manusia pe cara yang sombong. Jadi kita me mo puji kita pe diri. Tapi tara apa, to?

19 Ngoni so biasa dengar pa utusan-utusan yang puji dong pe diri sama deng orang bodo, karna ngoni me anggap ngoni pe diri pande.

20 Kong bukang cuma itu saja, ngoni me kase biar utusan-utusan yang bilang kata, dong itu hebat, dong biking pa ngoni macam deng orang karja yang tara dapa bayar. Dorang makang doi dari ngoni, dorang kuasai pa ngoni, dorang basombong kong injang-injang pa ngoni, deng dorang tampeleng pa ngoni.

21 Jadi apa kita musti malu karna kita tara karas pa ngoni bagitu? Tarada! Tapi kalu utusan-utusan itu barani bapuji diri, kita me barani puji kita pe diri sama deng dorang! (Kita bicara ini sama deng orang bodo pe bicara.)

22 Dorang puji dong pe diri, barang dorang dari bangsa Ibrani, orang Israel pe turunan, deng Abraham pe turunan. Tapi biar bagitu, kita me bole puji kita pe diri sama deng dorang, karna kita me dari bangsa Ibrani, kita me orang Israel pe turunan, deng kita me Abraham pe turunan.

23 Dorang bilang dorang itu orang-orang yang jaga biking apa yang Yesus Kristus suru. Tapi kita, kita ini orang yang jaga biking apa yang Yesus Kristus suru, lebe dari dorang itu. (Kita bicara ini sama deng orang yang so tara waras bicara!) Tapi sebenarnya kita ini yang karja karas lebe dari dorang itu, sampe banya kali kita maso penjara, banya kali kita dapa pukul deng dapa siksa sampe tara mampo hitung, kong banya kali lagi kita amper mati.

24 So lima kali orang Yahudi yang satu bangsa deng kita tangka kong siksa pa kita. Tiap kali dong tangka, dong pukul pa kita tiga pulu sembilan kali deng tali yang ada barang tajam di dia pe ujung.

25 Perna lagi tiga kali dong pukul pa kita ulang-ulang deng kayu. Ada lagi satu kali dong lempar ulang-ulang pa kita deng batu. Kong perna lagi tiga kali kapal yang kita nae tenggelam, turus kita anyor-anyor saja di laut selama satu hari satu malam.

26 So ulang-ulang kita pigi ka mana-mana kase tau Kabar Bae tentang Yesus Kristus, banya kali bahaya yang kita dapa yang biking kita amper mati macam deng bagini: kita dapa banjir, kita dapa rampok, kita dapa tantang dari orang-orang satu bangsa deng kita deng dari orang-orang yang bukang Yahudi lagi. Kita mangada lagi bahaya yang ada di kota deng bahaya di padang gurun, bahaya di laut, deng bahaya dari orang-orang yang bilang dong percaya pa Tuhan Yesus, padahal tarada.

27 Kita banya karja banting tulang, laeng kali kita tara tidor-tidor, laeng kali kita tara makang deng minum, laeng kali kita tara ada makanang, deng laeng kali kita tadingin-dingin karna tarada baju tabal.

28 Kong selain dari samua itu, tiap hari kita hawater karna kita pikiran skali pa samua jemaat.

29 Barang, kalu ada satu dari kita pe sudara yang percaya rasa tara kuat, kita me hati susa. Kalu ada orang yang tagoda biking dosa sampe dia so tara percaya pa Tuhan, kita pe hati lagi jadi susa skali.

30 Kalu kita musti puji kita pe diri sandiri, kita lebe suka mo puji tentang hal-hal yang kita tara mampo biking supaya ngoni tau kita tara kuat.

31 Yang kita bilang itu, butul. Tuhan Allah, torang pe Tuhan Yesus pe Bapa, Dia tau kita tara bafoya. Puji suda pa Dia sampe slama-lamanya.

32 Waktu kita ada di kota Damsyik, orang yang raja Aretas angka jadi gubernur suru pa pengawal-pengawal jaga bae-bae kota pe pintu gerbang, la kalu kita kaluar dong bisa tangka pa kita.

33 Tapi kita lolos saja, barang kita pe tamang-tamang kase maso pa kita di karanjang basar satu kong kase turung pa kita pake tali dari pagar tembok yang kase kuliling kota itu. Deng bagitu, gubernur tara dapa tangka pa kita.

Perjanjian Baru Bahasa Melayu Maluku Utara @ Lembaga Alkitab Indonesia 2020

Indonesian Bible Society
ကြှနျုပျတို့နောကျလိုကျပါ:



ကြော်ငြာတွေ