2 Korintus 1 - Perjanjian Baru Bahasa Melayu Maluku Utara

Paulus pe salam

¹ Sudara-sudara Tuhan Allah pe jemaat yang ada di kota Korintus, deng ngoni samua orang yang so jadi Tuhan Allah pe umat yang ada di seluru daera Akhaya. Salam dari kita Paulus, deng dari Timotius, torang pe sudara yang percaya. Kita ini Kristus Yesus pe utusan yang orang sebut rasul. Kita jadi rasul, itu karna Tuhan Allah pe mau.

² Kita minta pa Tuhan Allah, torang samua pe Bapa, deng pa Tuhan Yesus Kristus, supaya kase yang bae pa ngoni, deng salalu biking ngoni pe hati tetap tenang.

Waktu torang dapa susa, Tuhan Allah kase kuat torang pe hati

³ Mari suda torang puji pa Tuhan Allah, torang pe Tuhan Yesus Kristus pe Bapa! Dia itu Bapa yang salalu kasiang pa torang, deng Dia itu Tuhan Allah yang salalu kase kuat torang pe hati.

⁴ Dia yang kase kuat torang pe hati waktu tong dapa macam-macam sengsara, supaya deng kekuatan itu tong me bole kase kuat orang laeng pe hati yang dapa macam-macam sengsara. Torang bole kase kuat pa dorang sama deng Tuhan Allah so kase kuat pa torang.

⁵ Barang, torang so dapa sengsara sama deng yang Yesus Kristus dapa. Tapi waktu tong dapa sengsara macam-macam itu, Yesus Kristus me kase kuat skali tong pe hati tara abis-abis.

⁶ Biar torang dapa sengsara, Tuhan pake tong pe sengsara itu la tong bisa kase kuat ngoni pe hati, deng ngoni bole slamat dari dosa-dosa. Kong waktu Tuhan kase kuat tong pe hati, tong me bole kase kuat ngoni pe hati supaya ngoni tetap percaya deng sabar biar lagi ngoni dapa sengsara, sama deng sengsara yang tong perna rasa.

⁷ Jadi torang yakin skali ngoni akan tetap batahang percaya pa Tuhan. Barang, ngoni so dapa sengsara sama deng sengsara yang tong rasa, jadi torang tau, pasti Tuhan kase kuat lagi ngoni pe hati sama deng yang torang rasa.

⁸ Sudara-sudara, torang mau ngoni tau tentang sengsara yang perna torang dapa waktu torang di daera Asia Kecil. Sengsara itu tong rasa barát skali, rasa-rasa tong tara mampo tanggung sengsara itu sampe tong pe smangat hidup me ilang.

⁹ Mala torang rasa macam deng torang mo dapa hukuman mati. Tapi samua itu jadi, supaya torang tara bagantong pa tong pe diri sandiri, tapi supaya tong cuma bagantong pa Tuhan Allah, yang ada kuasa untuk kase hidup ulang pa orang-orang yang so mati.

¹⁰ Dia so kase slamat pa torang dari bahaya yang biking tong amper mati. Kong Dia itu suda yang jadi torang pe tampa baharap, Dia akan kase slamat pa torang lagi.

¹¹ Kong ngoni me musti kase berdoa pa torang turus-turus, karna deng ngoni pe doa itu, nanti ada banya orang yang bilang tarimakasi pa Tuhan Allah karna Dia kase Dia pe bae pa torang, deng karna Dia so dengar ngoni samua pe doa itu untuk torang.

Paulus bolong jadi datang di Korintus

¹² Sudara-sudara, yang biking torang pe hati sanang, itu karna tong pe dalam hati sandiri yang kase tau ini butul: torang pe kalakuang pa samua orang di dunia itu bae deng lebe-lebe lagi tong pe hubungan deng ngoni me bae. Torang pe hidup jujur, deng tong pe tujuan butul iko Tuhan Allah pe mau. Kong samua yang tong biking itu bukang karna tong iko manusia pe pande, tapi karna Tuhan Allah pe bae sampe tong mampo biking samua itu.

¹³ Di surat-surat yang tong tulis pa ngoni, tong cuma tulis apa yang bisa ngoni baca deng mangarti. Kita yakin, lama-lama nanti ngoni akan mangarti butul-butul.

¹⁴ Skarang ngoni baru mangarti sadiki kita pe hati. Kita harap nanti waktu Tuhan Yesus datang ulang, ngoni jemaat Korintus mo hati sanang deng torang karna samua yang torang so biking, deng torang me mo hati sanang deng ngoni karna samua yang ngoni so biking.

¹⁵ Kong karna kita yakin ngoni rasa sanang deng torang, kita perna ada rencana mo pigi pa ngoni supaya ngoni bisa tarima samua yang bae lagi yang Tuhan mo kase pa ngoni waktu kita datang pa ngoni yang kedua kali.

¹⁶ Jadi, waktu kita rencana mo pigi di daera Makedonia, kita mo singga dulu lia pa ngoni di kota Korintus. Abis itu, baru kita turus pigi di Makedonia. Pulang dari Makedonia, kita mo singga lagi pa ngoni di Korintus. Deng bagitu, ngoni bisa bantu kita pe perlu supaya kita bisa kase turus kita pe perjalanan di daera Yudea.

¹⁷ Tapi biar kita bolong bisa biking kita pe rencana itu, jang ngoni anggap kita ini ragu-ragu. Kita ini tara biking rencana iko kita pe mau sandiri sama deng orang yang jaga iko dunia pe mau, di mulu bilang “iyo”, di hati bilang “tarada”.

¹⁸ Kita tara bagitu, sudara-sudara! Itu sama deng Tuhan Allah, yang pe janji pa torang tara perna beruba. Bagitu lagi deng torang, kata-kata yang tong so bilang pa ngoni, tara perna beruba.

¹⁹ Ngoni bole percaya kita pe bicara skarang ini, karna Yesus Kristus, Anak Allah yang kita, Silwanus deng Timotius ada kase tau pa ngoni, tetap biking apa yang Dia so bilang. Dia pantas torang percaya. Dia tara perna bilang “iyo” kong di Dia pe hati bilang “tarada”.

²⁰ Torang tau itu butul, barang samua yang Tuhan Allah janji pa Dia pe umat, Dia so biking waktu Yesus Kristus datang untuk kase slamat pa torang. Karna itu torang bilang, “Amin, memang butul”. Kong karna Yesus itu butul, mari torang puji deng hormat pa Tuhan Allah.

²¹ Barang, Tuhan Allah itu yang kase kuat pa torang deng ngoni pe hati, supaya torang samua bisa jadi satu hati deng Yesus Kristus. Dia itu Tuhan Allah yang so pili pa torang jadi Dia pe umat sandiri.

²² Dia me kase Roh Kudus tinggal dalam tong samua pe hati, la tong yakin samua yang Tuhan janji, pasti Dia kase. Dia kase Roh Kudus itu jadi tanda pa torang, torang itu Dia punya.

²³ Tuhan Allah tau, kita bolong jadi datang pa ngoni di kota Korintus, barang kita tara mau togor karas pa ngoni sampe biking ngoni hati saki deng jadi malu. Tuhan Allah yang jadi saksi, barang Dia tau kita pe isi hati.

²⁴ Torang tara mo parenta pa ngoni tentang apa yang ngoni musti percaya, karna ngoni pe percaya pa Yesus Kristus so kuat. Tapi torang pe tujuan untuk bantu pa ngoni supaya deng ngoni iko pa Yesus Kristus, ngoni pe hati bole sanang.