1 Tesalonika 5 - Perjanjian Baru Bahasa Melayu Maluku Utara

Bajaga-jaga karna Tuhan Yesus mo datang ulang

¹ Sudara-sudara, torang tara perlu mo tulis pa ngoni tempo apa Tuhan Yesus mo datang ulang.

² Barang, ngoni sandiri so tau, tarada orang yang bisa tau tempo apa Tuhan Yesus mo datang ulang. Kage-kage Dia so datang, sama deng papancuri datang malam-malam.

³ Ada dia pe waktu orang-orang mo bilang bagini, “Torang pe hidup tenang deng aman. Jadi torang tara perlu tako apa-apa.” Tapi kage-kage dorang itu mo dapa siksa skali. Dorang tara lolos dari hukuman itu. Siksa yang dorang rasa itu, sama deng parampuang pe siksa waktu melahirkan.

⁴ Tapi sudara-sudara, ngoni pe hidup tara sama deng orang-orang yang hidup di dalam galap. Jadi nanti waktu Tuhan Yesus datang, ngoni tara takage sama deng orang-orang yang kage kalu pancuri maso pa dong pe ruma.

⁵ Ngoni samua itu hidup di tarang. Jadi torang samua pe hidup tara sama deng orang-orang yang pe kalakuang tara bae, dorang yang hidup di dalam galap.

⁶ Jadi torang musti bajaga-jaga deng kuasai torang pe diri. Jang sama deng orang laeng yang cuma tidor turus.

⁷ Orang-orang yang bagitu biasa cuma tidor-tidor deng mabo-mabo waktu malam.

⁸ Tapi torang ini orang yang hidup di tarang, jadi apa yang torang biking itu musti bae. Torang musti kuasai tong pe diri, deng musti percaya pa Tuhan deng sayang pa orang laeng. Kalu torang biking bagitu, nanti torang pe percaya kuat sama deng tentara yang pake baju besi. Torang lagi musti baharap deng yakin pa Tuhan Allah untuk torang pe keslamatan, sama deng torang ada pake helem di kapala.

⁹ Barang, Tuhan Allah pili pa torang jadi Dia pe umat. Dia tara pili pa torang supaya Dia hukum pa torang, tapi supaya torang dapa slamat karna torang percaya pa Yesus Kristus, torang pe Tuhan.

¹⁰ Yesus Kristus so mati untuk torang samua, supaya torang dapa hidup sama-sama deng Dia nanti waktu Dia datang ulang. Kong tara jadi masala kalu waktu itu torang masi hidup atau so mati.

¹¹ Jadi, ngoni musti carita ulang ajaran ini pa ngoni pe tamang-tamang supaya baku kase hibur deng baku kase kuat orang pe hati, sama deng yang ngoni salalu biking sampe skarang ini.

Cara hidup sebagai orang yang percaya pa Yesus Kristus

¹² Sudara-sudara, torang minta supaya ngoni hormati orang-orang yang Tuhan so pili untuk pimpin pa ngoni. Dorang itu yang karja karas di ngoni pe jemaat, deng dong lagi yang kase nasehat pa ngoni supaya ngoni tetap percaya pa Tuhan.

¹³ Ngoni musti hargai deng sayang pa dorang karna samua yang dorang biking itu untuk tolong pa ngoni. Kong ngoni musti salalu hidup baku bawa bae-bae.

¹⁴ Torang minta lagi pa ngoni, togor bae-bae pa orang yang pamalas supaya dong rajin bakarja, kase kuat orang yang panako pe hati supaya percaya butul-butul pa Tuhan, tolong orang yang perlu mo dapa tolong, deng sabar pa samua orang.

¹⁵ Perhatikan bae-bae, jang sampe ada orang yang balas orang pe jahat deng yang jahat. Tapi ngoni musti salalu berusaha biking yang bae di antara ngoni sandiri deng samua orang.

¹⁶ Ngoni pe hati musti sanang turus.

¹⁷ Ngoni musti salalu berdoa.

¹⁸ Ada apa saja, mo susa ka sanang ka, ngoni musti bilang tarimakasi turus pa Tuhan Allah. Barang, itu Tuhan Allah pe mau untuk samua orang yang percaya pa Kristus Yesus.

¹⁹ Jang lawan Tuhan Allah pe Roh yang sementara bakarja.

²⁰ Kalu Tuhan kase tau Dia pe pasáng pa orang kong orang itu kase tau pasáng itu pa ngoni, jang ngoni pandang enteng pasáng itu.

²¹ Cuma, ngoni musti cari tau bae-bae pasáng itu la tau kalu itu butul-butul dari Tuhan ka tarada. Kalu memang itu butul dari Tuhan, ngoni musti iko itu sunggu-sunggu.

²² Kong ngoni musti bajao dari samua hal yang jahat.

Paulus pe ahir surat

²³ Tuhan Allah yang biking torang pe hati tetap tenang, jadi torang minta supaya Dia biking ngoni jadi Dia pe umat sandiri yang hidup deng hati bersi. Torang minta supaya Dia jaga ngoni pe badan, hati deng jiwa, supaya ngoni tarada sala apa-apa waktu torang pe Tuhan Yesus Kristus datang ulang.

²⁴ Tuhan Allah yang so pangge pa ngoni jadi Dia pe umat, Dia itu setia. Jadi pasti Dia mo biking samua yang Dia so bilang pa torang.

²⁵ Sudara-sudara yang percaya, torang minta ngoni kase berdoa pa torang.

²⁶ Kong kalu ngoni baku dapa, ngoni baku kase salam suda satu deng yang laeng untuk kase tunju ngoni baku sayang.

²⁷ Kita ini Tuhan Yesus Kristus pe utusan, jadi kita minta pa ngoni supaya ngoni baca surat ini pa samua sudara yang percaya pa Tuhan.

²⁸ Torang minta supaya Yesus Kristus, torang pe Tuhan, kase Dia pe bae pa ngoni.