1 Tesalonika 1 - Perjanjian Baru Bahasa Melayu Maluku Utara

Paulus pe salam

¹ Sudara-sudara jemaat di kota Tesalonika yang so percaya pa Tuhan Allah, torang pe Bapa, deng pa Tuhan Yesus Kristus. Salam dari kita Paulus, deng kita pe tamang-tamang Silwanus deng Timotius. Torang minta pa Tuhan Allah supaya Dia kase Dia pe bae pa ngoni, deng Dia salalu biking ngoni pe hati tetap tenang.

Paulus bilang tarimakasi pa Tuhan Allah karna jemaat Tesalonika pe percaya pa Tuhan

² Torang salalu bilang tarimakasi pa Tuhan Allah karna ngoni samua pe percaya pa Dia. Siang malam torang berdoa untuk ngoni.

³ Tiap kali torang berdoa pa Tuhan Allah torang pe Bapa, torang inga pa ngoni jemaat di kota Tesalonika. Torang inga samua yang ngoni biking karna ngoni pe percaya. Torang inga ngoni pe bae pa orang-orang karna ngoni sayang pa dorang. Torang inga lagi bagimana ngoni tetap biking barang yang bae biar ngoni dapa susa, karna ngoni salalu batahang percaya deng yakin pa Yesus Kristus, torang pe Tuhan.

⁴ Sudara-sudara yang Tuhan Allah sayang, Tuhan Allah so pili pa ngoni jadi Dia pe umat yang percaya pa Dia. Torang tau Dia pili pa ngoni,

⁵ karna pertama kali waktu torang kase tau Kabar Bae tentang Yesus Kristus pa ngoni, ngoni bukang cuma dengar torang pe kata-kata saja, tapi ngoni me lia Tuhan pe kuasa dari Roh Kudus. Roh Kudus yang kase yakin sampe ngoni jadi percaya Kabar Bae itu. Ngoni me lia torang pe kalakuang yang bae, sampe ngoni tau Kabar Bae itu butul.

⁶ Turus, torang pe cara hidup itu ngoni iko. Conto itu dari Tuhan sandiri. Biar ada orang yang siksa pa ngoni, Roh Kudus bantu pa ngoni sampe ngoni tetap tarima Kabar Bae deng sanang.

⁷ Deng bagitu, ngoni pe percaya so jadi conto untuk samua orang yang percaya pa Yesus di daera Makedonia deng Akhaya.

⁸ Kong bukang cuma di Makedonia deng Akhaya saja, tapi mulai dari ngoni, Tuhan pe Kabar Bae so sampe di mana-mana. Jadi torang so tara perlu lagi mo bilang apa-apa, karna orang-orang so dengar tentang ngoni pe percaya pa Tuhan Allah.

⁹ Orang-orang itu sandiri bacarita, ngoni tarima bae-bae pa torang waktu torang bawa Kabar Bae pa ngoni. Dorang me carita bagimana sampe ngoni so kase tinggal ngoni pe puji-puji, kong so semba pa Tuhan Allah yang hidup deng yang butul,

¹⁰ deng ngoni me tunggu-tunggu Anak Allah yang mo datang ulang dari sorga. Dia itu suda Yesus, yang biar so mati tapi Tuhan Allah so kase hidup ulang pa Dia. Yesus itu suda yang kase slamat pa torang yang percaya pa Dia dari Tuhan Allah pe hukuman nanti.