1 Petrus 1 - Perjanjian Baru Bahasa Melayu Maluku Utara

Petrus pe salam

¹ Sudara-sudara, ngoni yang so merantau kong tinggal sebagai pendatang di daera Pontus, Galatia, Kapadokia, Asia Kecil, deng Bitinia. Salam dari kita Petrus yang jadi Yesus Kristus pe utusan yang orang sebut rasul.

² Tuhan Allah, torang pe Bapa so pili pa ngoni iko Dia pe rencana yang dari dulu. Kong Dia pe Roh yang biking ngoni jadi Dia pe umat supaya ngoni dengar-dengaran pa Yesus Kristus, deng supaya Dia pe dara yang so tatumpa biking ngoni jadi bersi dari dosa-dosa. Kita minta pa Tuhan Allah, supaya Dia kase Dia pe bae pa ngoni, deng Dia biking ngoni pe hati tetap tenang, kong Dia kase samua itu talebe-lebe.

Orang percaya pe harapan

³ Puji suda pa Tuhan Allah, Dia itu torang pe Tuhan Yesus Kristus pe Bapa. Dia pe rasa kasiang pa torang basar skali, sampe Dia kase pa torang hidup yang baru waktu Dia so kase hidup ulang pa Yesus Kristus. Kong karna itu, torang bole baharap deng percaya sunggu-sunggu pa Dia.

⁴ Torang yakin nanti Tuhan Allah kase pa torang berkat yang Dia so simpang di sorga. Berkat-berkat itu tara ancor, tara perna busu, deng tara beruba.

⁵ Ngoni ini, Tuhan Allah ada jaga deng Dia pe kuasa karna ngoni percaya pa Dia. Dia jaga pa ngoni sampe ngoni mo dapa slamat dari dosa-dosa. Slamat itu yang Dia so kase sadia di hari kiamat nanti.

⁶ Tuhan Allah so biking samua itu, karna itu ngoni basimore suda, biar untuk sementara waktu ngoni pe hati susa karna macam-macam sengsara yang ngoni dapa di dunia skarang ini.

⁷ Sengsara yang ngoni dapa itu jadi bukti, ngoni butul-butul percaya pa Tuhan. Itu sama deng mas yang kalu mo tau dia pe asli musti bakar dulu deng api. Tapi ngoni pe percaya lebe berharga dari mas, karna mas itu tara akan ada turus-turus. Kalu ngoni so lolos dari cobaan itu, nanti di hari kiamat, waktu Yesus Kristus datang ulang, Dia mo puji deng hormat pa ngoni.

⁸ Biar ngoni bolong perna lia pa Yesus Kristus, tapi ngoni sayang pa Dia. Deng biar lagi skarang ngoni tara lia pa Dia, tapi ngoni percaya pa Dia. Ngoni sanang skali, sampe tara bisa bilang pake kata-kata lagi tentang ngoni pe sanang itu.

⁹ Barang, ngoni pe tujuan dari ngoni pe percaya itu, ngoni so dapa. Ngoni pe tujuan itu, ngoni dapa slamat dari dosa-dosa.

¹⁰ Slamat itu suda yang Tuhan Allah kase untuk ngoni cuma karna Dia pe bae. Kong tentang slamat itu, itu so dari dulu Tuhan Allah kase tau pa nabi-nabi. Tapi, biar waktu itu nabi-nabi bolong mangarti, dorang masi tetap cari tau deng cari mangarti bae-bae tentang slamat itu.

¹¹ Yesus Kristus pe Roh yang ada pa nabi-nabi itu yang kase tau pa dorang tentang Dia mo dapa sengsara, deng abis itu dapa puji deng hormat. Jadi, nabi-nabi itu me cari tau lagi bagimana deng tempo apa itu mo jadi.

¹² Yesus Kristus pe Roh itu me yang kase tau pa nabi-nabi itu kalu pasáng yang dorang jaga kase tau itu bukang untuk dorang pe diri sandiri saja, tapi untuk ngoni skarang ini. Yang dorang kase tau itu, Kabar Bae tentang Yesus Kristus. Skarang, ngoni so dengar dari orang-orang yang kase tau Kabar Bae itu pa ngoni. Dorang kase tau itu deng kuasa Roh Kudus yang dari sorga. Kong yang dorang kase tau itu, itu yang malaekat-malaekat me suka cari tau.

Nasehat supaya torang pe kalakuang jadi bae

¹³ Jadi karna ngoni so tau Kabar Bae itu, ngoni musti siap biking hal-hal yang bae, ngoni musti kuasai ngoni pe diri, deng ngoni musti baharap deng yakin Tuhan akan kase Dia pe bae pa ngoni waktu Yesus Kristus datang ulang.

¹⁴ Ngoni ini Tuhan Allah pe ana-ana, jadi ngoni dengar-dengaran suda pa Dia, deng jang ngoni iko keinginan yang tara bae yang kuasai ngoni pe hidup dulu waktu ngoni bolong percaya pa Tuhan.

¹⁵ Tapi ngoni musti hidup suci di samua-samua yang ngoni biking, sama deng Tuhan Allah yang pangge pa ngoni itu suci.

¹⁶ Karna di Kitab Suci so tatulis bagini, “Kita ini kudus. Karna itu ngoni me musti kudus.”

¹⁷ Ngoni pangge Tuhan Allah itu “Bapa” waktu ngoni berdoa pa Dia. Dia itu suda yang mo adili pa samua orang tara pake pili-pili iko deng dorang pe kalakuang. Karna itu, ngoni musti hidup deng rasa tako pa Dia selama ngoni manumpang di dunia ini.

¹⁸ Barang ngoni tau, Tuhan Allah bayar mahal supaya ngoni dapa bebas dari ngoni pe cara hidup yang lama yang tara ada dia pe guna. Cara hidup yang lama itu yang ngoni tarima dari ngoni pe orang tua dulu-dulu. Tuhan Allah bayar mahal supaya ngoni bole bebas, itu Dia tara bayar deng barang yang nanti mo rusak macam deng mas atau perak,

¹⁹ tapi Dia bayar mahal pake Yesus Kristus pe dara yang berharga skali. Yesus itu sama deng domba pe ana yang tara cacat, deng yang tara kurang apa-apa, untuk mo jadi korban persembahan.

²⁰ Waktu dunia ini bolong ada, Tuhan Allah so pili pa Yesus Kristus. Kong di hari-hari yang so dekat deng kiamat ini, Dia so datang di dunia supaya ngoni samua bole slamat dari ngoni pe dosa-dosa.

²¹ Karna Yesus Kristus so kase slamat pa ngoni, ngoni bole percaya pa Tuhan Allah. Tuhan Allah itu yang so kase hidup ulang pa Yesus Kristus waktu Dia mati, deng yang biking Yesus Kristus dapa puji deng hormat. Deng bagitu, ngoni bole percaya deng baharap pa Tuhan Allah.

²² Jadi karna ngoni so iko ajaran yang butul tentang Yesus Kristus, ngoni pe hati so jadi bersi. Deng bagitu, ngoni bisa baku sayang deng hati yang tulus di antara ngoni sudara-sudara yang sama-sama percaya. Karna itu, ngoni musti sunggu-sunggu baku sayang satu deng yang laeng deng hati yang tulus,

²³ barang ngoni ini so dapa hidup yang baru. Ngoni dapa itu bukang dari manusia yang memang mo mati, tapi dari Tuhan Allah yang tetap ada sampe slama-lamanya. Ngoni dapa hidup yang baru itu karna ngoni percaya Tuhan Allah pe firman. Firman itu akan tetap ada turus, kong biking orang bole hidup deng Tuhan Allah slama-lamanya.

²⁴ Karna di Kitab Suci ada tatulis bagini, “Manusia pe hidup deng pe hebat tara mo tahang lama. Manusia sama deng rumpu yang babunga bagus, tapi tara lama bunga itu mo jatu, turus rumpu itu mo kiring,

²⁵ tapi Tuhan pe firman tetap ada sampe slama-lamanya.” Firman itu suda Kabar Bae tentang Yesus Kristus yang orang-orang so kase tau pa ngoni samua.