مُکاشفہ 20 - پنجابی نواں عہد نامہ نظرثانی شدہ چھپائی

ہزار ورھے دی بادشاہی

¹ فیر مَیں اِک فرِشتے نُوں اسمانوں اُتر دیاں ویکھیا جِہدے ہتّھ وِچ اتھاہ کھڈے دی کُنجی تے وَڈا سَنگل سی۔

² اوس ناگ یعنی پرانے سَپّ نُوں جیہڑا ابلیس تے شیطان اے پَھڑکے ہزار ورھے لئی بنھیا۔

³ تے اوہنوں اتھاہ کھڈے وِچ بند کر چھڈیا۔ تے اوہدے اُتّے مُہر لا چھڈی۔ پئی اوہ ہزار ورھے دے پُورے ہون تِیکر قوماں نُوں فیر بدراہ نا کرے ایہدے پِچّھوں ضرُور اے۔ پئی تھوڑے چِر لئی فیر کھولیا جائے۔

⁴ فیر مَیں تخت ویکھے تے لوک اوہناں اُتّے بَیٹھ گئے تے عدالت اوہناں دے سپُرد کِیتی گئی۔ تے اوہناں دِیاں رُوحاں نُوں وی ویکھیا۔ جِنہاں دے یِسُوع دی گواہی دین مارِیاں تے خُدا دے کلام مارِیاں سِر وَڈّھے گئے سن۔ تے جِنہاں نا اوس پشُو دی پُوجا کِیتی سی۔ تے نا اوہدے بُت دی۔ تے نا اوہدا ٹھپّہ اپنے مَتّھے تے ہتّھاں اُتّے لیا سی۔ تے اوہ زِندہ ہو کے ہزار ورھے تِیکر مسِیح دے نال بادشاہی کر دے رہے۔

⁵ تے جد تِیکر ایہہ ہزار ورھے مُک نا گئے۔ باقی مُردے زِندہ نا ہوئے۔ پہلی قیامت ایہو اے۔

⁶ مُبارک تے پاک اوہ اے جیہڑا پہلی قیامت وِچ شریک ہوئے اجیہاں اُتّے دُوجی مَوت دا کُجھ وَس نئیں سگوں اوہ خُدا تے مسِیح دے کاہِن ہون گے۔ تے اوہدے نال ہزار ورھے تِیکر بادشاہی کرن گے۔

شیطان دی ہار

⁷ تے جد ہزار ورھے مُک جان گے تے شیطان قید وِچوں چھڈیا جائے گا۔

⁸ تے اوہناں قوماں نُوں جیہڑیاں زمین دے چَواں پاسے ہون گِیاں۔ یعنی جوج تے ماجوج نُوں بدراہ کر کے لڑائی دے لئی اکٹّھیاں کرن نُوں نِکلے گا۔ اوہناں دی گنتری سمُندر دی ریت وانگر ہوئے گی۔

⁹ تے ساری زمین اُتّے کھِلّر جان گِیاں۔ تے پاک لوکاں دیاں پڑاواں نُوں تے پیارے شہر نُوں چَواں پاسیوں گھیر لین گِیاں۔ تے اسمانوں اَگ وَرھ کے اوہناں نُوں کھا جائے گی۔

¹⁰ تے اوہناں دا بدراہ کرن والا ابلیس اَگ تے گندھک دی اوس جِھیل وِچ سُٹّیا جائے گا۔ جِتّھے اوہ پشُو تے جُھوٹھا نبی وی ہوئے گا۔ تے اوہ دِنے راتِیں ہمیشہ تِیکر عذاب وِچ رہن گے۔

اخیرلی عدالت

¹¹ فیر مَیں اِک وڈّے چِٹّے تخت نُوں تے اوہنوں جیہڑا اوہدے اُتّے بَیٹھا ہویا سی ویکھیا۔ جِہدے اگّوں زمین تے اسمان بھج گئے۔ تے اوہناں نُوں کِدھرے تھاں نا مِلیا۔

¹² فیر مَیں سارے نِکّے وڈّے مُردے اوس تخت دے اگّے کھلوتے ہوئے ویکھے۔ تے کِتاباں کھولِیاں گِئیاں۔ فیر اِک ہور کتاب کھولی گئی یعنی حیاتی دی کتاب۔ جیویں اوہناں کِتاباں وِچ لِکھیا ہویا سی۔ اوہناں دیاں کمّاں دے سببّوں مُردیاں دا انصاف کِیتا گیا۔

¹³ تے سمُندر اپنے وِچلے مُردے دے دِتّے۔ تے مَوت تے پاتال نیں اپنے وِچلے مُردے دے دِتّے۔ تے اوہناں وِچوں ہر اِک دے کمّاں پِچّھے اوہدا انصاف کِیتا گیا۔

¹⁴ فیر مَوت تے پاتال اَگ دی جِھیل وِچ سُٹّے گئے۔ ایہہ اَگ دی جِھیل دُوجی مَوت اے۔

¹⁵ تے جِس کِسے دا ناں حیاتی دی کتاب وِچ نا لَبّھیا۔ اوہ اَگ دی جِھیل وِچ سُٹّیا گیا۔